سەنتەری خواندنێن فیدرالیزمی ل زانکۆیا دهوک ب هەڤکاری دگەل نڤیسینگەها پەرلەمانێ عێراقێ ل دهوکێ، دانیشتنەکا ئەکادیمی ئەنجامدا لژێر ناڤونیشانێ (رەهەندێن قەیرانا دارایی دناڤبەرا حکومەتا فیدرال و حکومەتا هەرێما کوردستانێدا: ئاستەنگ و ئالاڤێن چارەسەریێ)

ئەڤ دانیشتنە ل 17ی ئەیلونا 2025 ل هۆلا سەنتەرێ رەوشەنبیری و کومەڵایەتی ل زانکۆیا دهوک برێڤەچوو. ل ڤێ دانیشتنێدا، کێشە و ڕەهەندێن قەیرانا دارایی دناڤبەرا بەغدا و هەولێرێدا ژ چەندین لايەنێن یاسایی، سیاسی و دارایی ڤە هاتنە ڤەکولین، و گەلەک ئەنجام و پێشنیار هاتنە دەرخستن کو پاشی هاتنە راگەهاندن و پێشکێشکرن بۆ دەزگەه و لایەنێن پەیوەندیدار ل هەرێمێ و حکومەتا ناڤەندی.

ل دەستپێکێ د. نجم‌ الدین محي الدین ياسين رێڤەبەرێ سەنتەرێ فیدرالیزمی ل زانکۆیا دهوک، بخێرهاتنا مێهڤانان کر و گرنگیا بابەتی و رولێ سەنتەری د چارەسەرکرنا ڤێ قەیرانێدا دیارکر کو ئەنجام بهێنە بکارئینان ژلایێ دەستهەلاتدارێن هەرێم و حکومەتا ناڤەندیڤە .

دانیشتنێ دوو تەوەرێن سەرەکی بخوڤەگرتن:

تەوەرێ ئێکێ: (رەهەندێن ئابووری و دارایی یێن ڤێ قەیرانێ)، ژ لایێ د.ئەحمەد سلیمان صفار، ئەندامێ بەرێ یێ ئەنجوومەنێ نوینەرایەتیا عێراقێ و ئەندامێ لیژنەیا دارایی یا ئەنجوومەنی، هاتە پێشکێشکرن.

تەوەرێ دووێ: (رەهەندێن یاسایی و سیاسی یێن ڤێ قەیرانێ)، ژ لایێ د.رێنجبەر جەمیل شێخو، مامۆستایێ یاسایا دەستووری ل کولیژا یاسای - زانکۆیا دهوکێ، هاتە پێشکێشکرن.

برێڤەبرنا ڤێ دانیشتنێ ژلایێ بەرێز دلگەش سادق سالح، نوینەرێ نڤیسینگەها پەرلەمانێ عێراقێ ل دهوکێ ، هاتە ئەنجامدان.