ل رێكەڤتی 4ـی كانوونا ئێكێ، 2024، سەنتەرێ ڤەكۆلینێن سازی ل زانكۆیا دهۆك روینشتەكا گەنگەشێ یا تایبەت ئەنجامدا ل دۆر "ئاڤاكرنا كاریگەریا سازی و پەرەپێدانا بەردەوام" ل سەنتەرێ كۆنفرانسان ل زانكۆیا دهۆك. روینشتن ب پێشكێشكرنەكا تایبەت دەستپێكر كو د. فایق دیكو، رێڤەبەرێ سەنتەرێ ڤەكۆلینێن سازی باس ل سیاسەت و پلانێن رێڤەبەریا ناڤبری كر.

د ڤێ روینشتنێ دا، كو سەرۆكێ زانكۆیا دهۆك، د. داود سلێمان ئەتروشی، و ئەندامێن جڤاتا زانكۆیێ و ئەندامێن جڤات و مامۆستایێن كۆلیژێن زانكۆیێ و ستافێ رێڤەبەری و سەنتەرێن زانكۆیێ ئامادەبوون، دوو تایبەتمەندێن خواندنا بلند یێن ناڤدەولەتی و ئەندامێن دەستەیا باوەرپێكریا ل زانكۆیا ئەمریكی ل كوردستانێ پشكداربوون، ئەو ژی، د. سیلیست شێنێك و د. باربارا بریتینگهام. و ب رێڤەبرنا سەرۆكێ زانكۆیا دهۆك روینشتنەكا گەنگەشێ ئەنجامدان كو تێدا باس ل بابەتێن جوراجوێن پێشڤەبرن و سازیكرنا زانكۆیێ وگەشەكرنا سیستەمێن خواندنێ برێڤەچوون.

د روینشتنێ دا، چەندین پسیار ژلایێ سەرۆكێ زانكۆیا دهۆك ڤە هاتنە كرن وئاراستەی هەردوو میهڤانین گەنگەشێ بوون ل دۆر پرسێن هەرەگرنگ بۆ زانكۆیا دهۆك وەك بدەستڤەئینانا متمانەبەخشینا ئەكادیمی و پشكداریكرنا قوتابیان د پرۆسەیا خواندنێ دا و چەوانیا باشتركرنا پلانا ستراتیژی یا زانكۆیا دهۆك وچەند بابەتێن دیتر. ژ لایێ خو ڤە ژی، ئامادەبوویان پسیارێن خو ئاراستەی هەردوو مێهڤانان كرن ودانوستاندنێن پرهێز برێڤەچوون.

سەرۆكێ زانكۆیا دهۆك باس كر كو مەرەمێن گرێدانا ڤێ كۆمبوونێ ئەوە هەر كەسەكێ د پرۆسەیا متمانەبەخشینێ دا كاردكەت ئامادەی دانوستاندنا ببیت دا كو نویترین پێشهات وەربگریت د بوارێ متمانەبەخشینا ئەكادیمی دا. و جەخت ل سەر گرنگیا سازیكرنا زانكۆیێ كر دا كو ركابەریا زانكۆیێ جیهانی بكەت و بوارێن ڤەكۆلین و پرۆگرامێن خواندنێ هیزەكا دی ب خو ڤە ببینن

د دانوستاندنان دا، د. سیلیت دەستخۆشی ل زانكۆیا دهۆك كر بۆ وان پێنگاڤێن تا نۆكە هاتینە ئەنجامدان د پرۆسەیا متمانەبەخشینی دا. ودیار كر كو زانكۆیا دهۆك وەك ئێكەم سازیا ئەكادیمی ل كوردستانێ ئەڤ پێنگاڤە ئەنجامدای پێدڤیە ڤێ پرۆسێ بۆ سازیێن دی ژی بنیاسینیت وببیتە سەركردە د ڤێ رێكێ دا. و گۆت ژی كو پشكداریكرنا قوتابیان گرنگیەكا مەزن هەیە د ڤێ پرۆسێ دا و ئەو دشێن راوبۆچوونێن خو ل دۆر پرۆسەیا خواندنێ دەرببرن وەك فیدباك بۆ باشتركرنا كوالیتیا خواندنێ وفێربوونێ ودیسان بدەستڤەئینانا متمانەبەخشینێ ل دویڤ پیڤەرێن پێدڤی.

د. باربارا ژی، ل دۆر پلانا ستراتیژی یا زانكۆیێ دیار كر كو دەستپێشخەریەكا بهێزە و چەندین فاكتەرێن سەركەفتنێ ب خو ڤە دگریت، ئێك ژ وانا ژی، زێدەكرنا رووبەرێن كەسك د ناڤا كەمپا زانكۆیێ دا و گۆت ژی كو پلانا ستراتیژی مل ب ملێ كاراكرنا پرۆسێسا متمانەبەخشینا ئەكادیمی دێ زانكۆیێ بەرەڤ ئاستێن بلندتر ڤە بەت.

هەژی ئاماژێ یە كو ئەڤێ چالاكیێ كەشەكێ گونجای پەیدا كر بۆ دانۆستاندنێن گرێدای بابەتێن خواندنا بلند دناڤبەرا مێهڤانێن خودان پسپوریەكا قوول و ستافێ زانكۆیا دهۆك دا و تێدا لێكگوهرینا هزروبیر ولێكتێگەهشتنا ئەكادیمی گەشەبوو.

بۆ دیتنا دیمەنا لینکێ ل خوارێ کلیک بکە:

https://drive.google.com/drive/folders/1YdbiNqs_61N8KYQyGUzeT6V95oz3R2gP?usp=sharing

راگەهاندنا زانكۆیا دهۆك، 4ـی كانوونا ئێكێ، 2024

فاطمة محمود

فوتۆ: محمەد بێسکى