ب درویشمێ "دەروونناسی و چارەسەریا دەروونی پێخەمەت پاشەرۆژێ: پێكڤە بۆ دروستكرنا ھیڤیان"، پەیمانگەھا چارەسەریا دەروونی و چارەسەریا تراومایێ IPP ل زانكۆیا دھۆك، ئەنجامدانا كۆنفرانسێ ناڤدەولەتی یێ چوارێ یێ دەروونناسی و چارەسەریا دەروونی ل رۆژێن ٢ و ٣ـی چریا دووێ ٢٠٢٤ رادگەھینیت.

ئارمانجا كۆنفرانسی دابینكرنا سەكۆیەكا خۆبخۆییە بۆ ئەكادیمی، ڤەكۆلەر، فێرخواز، پزیشك، پەروەردەكار بۆ لێكگوھۆرینا پێزانین و شارەزاییا و ڤەدیتنێن ڤەكۆلەرا و ئەزموون و نێرین و بۆچوون ل دۆر بابەتێن ھەستیار د بوارێ دەرووناسی و چارەسەریا دەروونی دا.

كۆنفرانس دێ تەكەزێ ل سەر ڤەگۆھاستن و وەرگرتن و كارلێكرنا رێك و رێبازێن چارەسەركرنا دەروونیا جڤاكی و چارەسەركرنا دەروونی و تراومایا دەروونی یێن جیھانی و ناڤخۆیی كەت، ب تایبەتی ل دەڤەرێن ھەڤركیێ و پشتی ھەڤركیێ، دێ پشكدارێن كۆنفرانسی دەلیڤا ڤەدیتنا نویترین داھێنان و ئاراستە و ئاستەنگ و چارەسەریا د بوارێ پالپشتیا دەروونی و جڤاكی و كارێ جڤاكی و چارەسەریا دەروونی و پزیشكیا دەروونی و بوارێن پەیوەندیدار ھەبیت، ھەروەسا د كارناما كۆنفرانسی دا دێ گەنگەشا شێوازێن بیانی و ناڤخۆیی یێن چارەسەریا دەروونی ھێتەكرن.

پشكداریكرن ب ڤەكۆلینان:

پەیمانگەھا چارەسەریا دەروونی و چارەسەریا تراومایێ IPP داخازێ ژ ڤەكۆلەرا دكەت ڤەكۆلین و پانێل و مێزگەرد ل سەر لایەنێن جودا یێن دەرووناسی و چارەسەریا دەروونی پێشكێشبكەن، كو د سنوورێ ڤان بابەتێن خوارێ دا بن:

• پەرەپێدانا ھەڤكاریێ د ناڤبەرا ڤەكۆلەر و چارەسەرێن دەروونی دا.
• گونجاندنا تێگەھ و نێرینا د ناڤبەرا ڤەكۆلینێن زانستی و ئەنجامدانێن چارەسەركرنێ دا.
• پێشئێخستنا گرێمانێن ڤەكۆلینێن نوی بۆ دەستنیشانكرنا مایتێكرنێن ئارمانجدار و نوی.
• تێكچوونێن دەروونی و چارەسەری.
• ساخلەمیا عەقلی و پالپشتیا دەروونی و جڤاكی.
• تراوما و جینوساید و شێوەیێن دی یێن توندوتیژیا كۆمی.
• نێرینێن جۆرێ جڤاكی ل دویڤ بۆچوونێن رۆژئاڤای و رۆژھەلاتی.
• تراوما ل دەف زارۆكا و چارەسەری و فێركرن.
• كەمینەیێن نەتەوەیی و ئایینی و تراوما دەروونی.
• ئالودەبوون و كەلتور و مایتێكرن.
• ڤەگۆھاستنا تراوما ژ نەوەیان.

پالپشتیا دەروونی و جڤاكی و چارەسەریا دەروونی و شێوازێن دی ل دەڤەرێن ھەڤركیێ و پشتی ھەڤركیێ.

پەیمانگەھا چارەسەریا دەروونی و چارەسەریا تراومایێ IPP ھاندانا ڤەكۆلەرا دكەت ل دویڤ رێباز و بسپۆرێن جودا ب رۆشناییا تیۆری ڤەكۆلینێن خۆ ئەنجام بدەن، زێدەباری دانوستاندنێن فرە بسپۆری، پەیمانگەھا چارەسەریا دەروونی و چارەسەریا تراومایێ IPP خۆشحالە ب پێشكێشكرنا ڤەكۆلینا ژ لایێ زانا و قوتابیێن خواندنا بلند و چارەسەر و ڤەكۆلەرێن د سازیێن حكومی و رێكخراوێن نەحكومی و رێكخراوێن پەیوەندیدار دا كاردكەن.

تێبینی: ئەڤ راگەھاندنا ب تنێ داخازا پێشكێشكرنا ڤەكۆلینیە، دێ د داھاتی دا ھویركاتیێن تۆماركرنێ بۆ كۆنفرانسی ھێنە بەلاڤكرن.

داخوازا پێشکێشکرنا ڤەکۆلینان

فلایەرێ کۆنفرانسی

راگەھاندنا زانكۆیا دھۆك؛ ١ـی ئیلۆنێ ٢٠٢٤

وەرگێران: ماهر تاهر کێستەیی
پۆستەر: باوەر محەمەد سەدیق