خۆلا ڕاهێنانا پێداگۆجی ب شێوازەكێ هاتیە دارشتن دا كو مامۆستایێن خواندنا بلند ب شێوازێن پێشكەفتی یێن پێداگۆجی و سەردەمیانە یێن وانەگۆتن و فێربوونێ ئاشنا بكەت. ئارمانجا خۆلێ بەرهەڤكرنا ستافێ ئەكادیمی یێ نوو یە دا كو ببنە ماموستایێن خودان شیان، چالاك و كاریگەر، ئەو ژی ب ڕێكا دابین كرنا بنەمایێن سەرەكی یێن پێداگۆجی، ڤەكۆلینا زانستی، تەكنەلۆجیا پەروەردەیی، سەركردایەتی، و ڕێڤەبەرنا ئەكادیمی.

خۆل بۆ ماوێ شەش هەیڤان یا بەردەوامە و ژ چەندین مۆدیولێن پێكڤەگرێدایی پێكدهێت كو زانینا تیۆری دگەل ئەزمونێن پراكتیكی پێكڤە گرێددەت. پشتی ب ديماهيك هاتنا خولێ سەنتەر دێ باوەرنامەكا باوەرپێكری یا پێداگۆجی ( ) پێشكێشی بەشداربوويێن سەركەفتى كەت. ئەڤ باوەرنامە ژ لایێ وەزیرێ خواندنا بلند و ڤەكۆلینێن زانستی، سەرۆكێ زانكۆیا دهۆك، و ڕێڤەبەرێ سەنتەری ڤە دهێتە ئیمزاكرن. هەروەسا باوەرناما پێداگوجی دهێتە زانین ئێك ژ مەرجێن سەرەكی یێن پێدانا ناسناڤێ زانستی.

هەر ژ دەمێ دامەزراندنا خۆ ل سالا ٢٠١٩ێ، سەنتەری ٢٧ خولێن ڕاهێنانا پێداگۆجی ڕێكخستینە، و د نوكە دا شەش خولێن دی یێن بەردەوامن. ئەڤ خۆلە پابەندبوونا بەردەوام یا سەنتەری بۆ بهێزكرنا كوالتیا وانەگۆتنێ، بلندكرنا ئاستێ ئەكادیمی و پشتەڤانیكردنا گەشەپێدانا پیشەیی یا ستافێ وانەگۆتنێ یێ زانكۆیێ دیار دكەت.

خۆلا راهێنانا پێداگوجی ل سەر ڤان مۆدیولێن سەرەكی یێن خوارێ هاتیە ئاڤاكرن:

• تەكنەلۆجیا زانیاری و پەیوەندییان (ICT)
• ڤەكۆلین و گەشەپێدان (R&D)
• فێربوونا قوتابی-ناڤەند (SCL)
• ڕێبازێن نۆی یێن پێداگۆجی (IPA)
• پڕۆگرامێ خواندنێ یێ ل سەر بنەمایێ شیانان (CBE)
• كارسازییا پەروەردەیی و هەڤكاریا د ناڤبەرا زانكۆ و ژینگەها كاری

مۆدیولێ تەكنەلۆجیا زانیاری و پەیوەندییان (ICT) گرنگی یێ ب پلاتفۆرمێن فێربوونا دیجیتاڵی، بەرنامێن گوگڵ، ئامرازێن فێربوونا ئۆنلاین، سیستەمێن ڕێڤەبەریا ژێدەران، پرۆفایلێن ئەكادیمی، و ئامرازێن دیجیتاڵی وەك پلاتفۆرمێن پێشكەشكرنێ، پەیوەندیكرنێ، و هەڵسەنگاندنێ ددەت. هەروەسا دەلیڤە بۆ پشكداران دهێتە ڕەخساندن دا كو ڕاهێنانێ ل سەر بكارئینانا ڤان ئامرازان بكەن و سیمیناران ئەنجام بدەن.

مۆدیولێ ڤەكۆلین و گەشەپێدان (R&D) پشكداران ب بنەمایێن ڤەكۆلینێن زانستی ئاشنا دكەت، ژوان ژی پێناسە و جۆرێن ڤەكۆلینێ، رێباز و قۆناغێن ڤەكۆلینێ، كۆمكرن و شیكرنا داتایان، دەستپاكییا ئەكادیمی، ئەتیكێتێن ڤەكۆلینێ، نڤێسینا زانستی، ڕێكارێن بەلاڤكرن و ئاڕاستەكرنا ڤەكۆلینان.

مۆدیولێ فێربوونا قوتابی-تەوەر (SCL) گرنگی یێ ب فەلسەفە، بنەما، و بجهئینانا پراكتیكی یا رێبازا قوتابی- تەوەر ددەت. ئەڤ مۆدیولە بەحسێ گرنگیا فێربوونا چالاك، كارامەییێن پەروەردەیی یێن سەدێ بیست و ئێكێ، تیۆریێن فێربوونێ، دەروونناسییا وانەگۆتن و فێربوونێ، و ستراتیژیێن بەرسڤدانا ئاستەنگێن پێشبینیكری و بەرهەنگاربوونا قوتابیان بەرامبەر ڕێبازێن قوتابی-تەوەر دكەت.

مۆدیولێ ڕێبازێن نۆی یێن پێداگۆجی (IPA) شێوازێن سەردەمیانە یێن وانەگۆتنێ، ستراتیژیێن پۆلێ، تیۆریێن گەشەپێدانا گرۆپی، تەكنیكێن پشكداریكرنا قوتابیان، تێكەڵكرنا تەكنەلۆجیا پەروەردەیی، و رێكێن هەڵسەنگاندنێ ددەتە نیاسین. هەروەسا پسیارێن گرێدای ب هەڵسەنگاندنێ، جۆرێن هەڵسەنگاندنا فێربوونێ، و ئامراز و شێوازێن گونجای بۆ هەلسەنگاندنا فێربوونا قوتابیان ڤەدبینیت.

مۆدیولێ فێرکرنا ل سەر بنەمایێ شیانان (CBE) جەختێ ل سەر پەروەردەیا ل سەر بنەمایێ شیانان، پڕۆسێسا بۆلۆنیا، و دارشتنا پڕۆگرامێ خواندنێ یێ ل سەر بنەمایێ كارامەییان دكەت. ئەڤ مۆدیولە پێكهاتەیا پڕۆگرامێ خواندنێ، دەستكەفتێن فێربوونێ، پشتەڤانیكرنا پێكهاتێن پەروەردەیی، شێواز و ژینگه‌هێن فێربوونێ، و ئاستەنگێن گرێدای ب بجهئینانا ڤان شێوازان ل هەرێما كوردستانێ بخۆڤە دگڕیت.

مۆدیولێ كارسازییا پەروەردەیی و هەڤكاریا د ناڤبەرا زانكۆ و ژینگەها كاری دا پشكداران ئاشنا دكەت ب كارسازییا پەروەردەیی (Edupreneurship)، پڕۆسێسێن گۆڕانكاریێ د پەروەردێ دا، فێربوونا ل سەر بنەمایێ كاری و بازاڕی، سەركردایەتیا كارسازی، كارامەییێن پێشكەشكرنێ، هەروەسا هەماهەنگیا د ناڤبەرا زانكۆ و ژینگەها كاری دا، و ئامرازێن پلاندانانا پراكتیكی وەك پۆستەرا (NABC Canvas).

ب ڕێكا ڤان مۆدیولێن گشتگیر، خۆلا ڕاهێنانا پێداگۆجی پشتەڤانیێ د پێشخستنا ستافەكێ ئەكادیمی یێ خودان كارامەیی و داهێنەر دكەت، یێن كو د بەرهەڤن ب شێوەیەكێ كاریگەر پشكداریێ د خواندنا بلند دا بكەن و بەرسڤا پێتڤیێن بەردەوام یێن زانكۆیێ، قوتابیان، و ژینگەها پیشەیی بدەن.