ل رۆژا سێشەمبی رێكەڤتی ١٠ـی ئیلونێ ٢٠٢٤ زانكۆیا دھۆك، ڤەكرنا سەنتەرێ خواندنێن فیدرالیزمێ راگەھاند، كو ب دەستكەڤتەكێ گرنگ دھێتە ھژمارتن، ژبەركو ئێكەم سەنتەرێ بسپۆرە ژ جۆرێ خۆ ل ھەرێما كوردستانێ و عیراقێ. د راگەھاندنێ دا، یاكو ل سەنتەرێ رەوشەنبیری و جڤاكی یێ زانكۆیا دھۆك ھاتیە ئەنجامدان، ھژمارەكا كەسایەتیێن تایبەت ئامادەببوون ژ وان، د. جەعفەر ئیبراھیم ئێمینكی، ئەندامێ كومیتا ناڤەندی یا پارتی دیموكراتی كوردستان و نوینەرێن سەرۆكاتیا ھەرێما كوردستانێ و پەرلەمانتار و یاساناس و مامۆستایێن زانكۆیێ.

د راگەھاندنێ دا، پەیڤەك ژ لایێ سەرۆكێ زانكۆیا دھۆك، د. داود سلێمان ئەتروشی ھاتە پێشكێشكرن، د پەیڤا خۆدا سەرۆكێ زانكۆیێ تەكەز ل سەر رۆلێ سەنتەرێ خواندنێن فیدرالیزمێ د پەرەپێدانا ڤەكۆلینا د بوارێ حوكمرانیا فیدرالی كر. دیسان ئاماژە ب ئەوێ چەندێ دا كو ھەبوونا سەنتەرێ خواندنێن فیدرالیزمێ یا فەرە بۆ تێگەھشتنا مە یا كویرتر بۆ فیدرالیزمێ ل ھەرێما كوردستانێ و عیراقێ، كو ئارمانجا سەنتەری پركرنا ڤالاھیێن مەزنە یێن د ڤەكۆلینێن ئەكادیمی دا د ئەڤی بواری دا ھەین، دیسان پشكداریێ دێ د جێبەجێكرنا كارا بۆ سیستەمێ فیدرالی كەت ھەروەكو د دەستورێ عیراقێ یێ سالا ٢٠٠٥ـێ دا ھاتی.

ھەروەسا پەیڤەك ژ لایێ ھەر ئێك ژ د. سوران عەلی حەسەن، رێڤەبەرێ گشتی یێ پەیمانگەھا كاروبارێن دەستوری و د. نەجمەددین محیەددین یاسین، رێڤەبەرێ سەنتەرێ خواندنێن فیدرالیزمێ، ھاتە پێشكێشكرن، كو باس ل ئەركێ سەنتەرێ خواندنێن فیدرالیزمێ د پالپشتیكرنا ڤەكۆلینا زانستی و شرۆڤەكرنا سیاسەتا دەربارەی فیدرالیزمێ كر، كو ئەڤێ چەندێ گرنگیەكا زۆر بۆ پەرەپێدانا سەقامگیریێ و حوكمرانیا كارا ل عیراقێ ھەیە.

ل دویڤ دا گەنگەشە ل دۆر ئاستەنگ و دەلیڤەیێن فیدرالیێ ل عیراقێ ھاتنە ئەنجامدان، ل گەل تەكەزكرن ل سەر رۆلێ ھەرێما كوردستانێ، دیسان دووپاتی ل سەر پێدڤیا ھەبوونا سەكویەكا ئەكادیمی یا بھێز بۆ تێگەھشتن و چارەسەركرنا ئالوزیێن حوكمرانیا فیدرالی ھاتەكرن.

ل دویماھیا راگەھاندنێ، كۆنگرەكێ رۆژنامەڤانی ژ لایێ سەرۆكێ زانكۆیێ ڤە ھاتە ئەنجامدان، كو سەرۆكێ زانكۆیێ راگەھاند "دامەزراندنا سەنتەرێ خواندنێن فیدرالیزمێ پێنگاڤەكە بۆ پێدڤیا ڤەكۆلین و شرۆڤەكرنا ھویر ل دۆر سیستەمێ فیدرالی، ب تایبەتی رۆلێ ھەرێما كوردستانێ ل كۆمارا عیراقا فیدرالی دا، ئەڤ سەنتەرە دێ بیتە سەكویەك بۆ ڤەدیتنا ئالۆزیێن فیدرالیزمێ و پشكداریێ د سنورێ حوكمرانیێ ل دەڤەرێ دا كەت".

سەنتەرێ خواندنێن فیدرالیزمێ ل زانكۆیا دھۆك ھەولا چارەسەركرن و پركرنا ڤالاھیێن مەزن یێن د ڤەكۆلینێن ئەكادیمی دا ل دۆر فیدرالیزمێ ل عیراقێ دا دكەتن، دیسان ئارمانجا سەنتەری پركرنا ڤالاھیێ یە ب رێكا دابینكرنا سەكۆیەكێ بۆ شرۆڤەكرنا گشتگیر و ڤەكۆلینێ ل دۆر سیستەمێ فیدرالیزمێ، كو بوویە سیستەمەكێ چارەنڤیسساز بۆ گۆرەپانا سیاسی و دەستوری ل عیراقێ. ئەوژب ب رێكا تەكەزكرن ل سەر سیستەمێ فیدرالی یێ د دەقێ دەستورێ عیراقێ یێ سالا ٢٠٠٥ـێ دا ھاتی. ھەروەسا سەنتەر دێ پالپشتیا ڤەدیتنا كویر بۆ رەھەندێن یاسایی و سیاسی و جڤاكی یێن فیدرالیزمێ كەت، كو دھێتە پێشبینیكرن سەنتەر ل گەل خۆدان بەرژەوەندی كاربكەت و پەرەپێدانا تێگەھشتنا گشتی بكەت و داخازا مافێن ھەرێما كوردستانێ د سنورێ فیدرالیزمێ ل عیراقێ دا بكەت.

بۆ پێزانینێن زێدەتر ل دۆر كۆنگرێ رۆژنامەڤانی، ڤێرێ كلیك بكە. بۆ دیتنا وێنەیا ب كوالیتیا بەرز، ڤێرێ كلیك بكە.

https://drive.google.com/drive/folders/1mGuMxYouAOBOUdUvzvrM83iNMYjDV3nF?usp=drive_link

راگەھاندنا زانكۆیا دھۆك؛ ١٠ـی ئیلونێ ٢٠٢٤

عسمەت خابوور و ماھر طاھر كێستەیی

فۆتۆ: محەمەد عەبدولكەریم و عەلی بانكی