ڤەکۆلەرەکێ ماتماتیکێ ژ زانکۆیا دهۆك ڤەکۆلینەکا زانستی ل دۆر سۆلیتۆنێن تیشکی بەلاڤدکەت

محەمەد ئەمین سادق موراد، مامۆستایێ پشکا ماتماتیك ل کۆلیژا زانست، زانکۆیا دهۆك، سەرکێشیا تیمەکا ڤەکۆلینێ یا ناڤدەولەتی كریە بۆ بەلاڤکرنا ڤەکۆلینەکا نوی ل دۆر سۆلیتۆنێن تیشکی و داینامیکیێن پێلێن نە-هێلی ل گۆڤارا Results in Engineering یا ناڤدەولەتی و دەستپێگەهشتنا ئازاد، کو ژ لایێ Elsevier ڤە دهێتە دەرئێخستن.

ڤەکۆلین ب ناڤونیشانێ «چارەسەریا سۆلیتۆنا تیشکی بۆ هاوکێشەیا شرۆدینگەر یا نەهێلی یا دوو-شێوازی و کەرتیا دەمی بکارئینانا ڕێکا فۆنکشنا لێکتێدای یا ڕێژەیی یا گشتگیر»، ل ١٣ـی خزیرانا ٢٠٢٥ێ هاتە بەلاڤکرن، و ب هەماهەنگی ل گەل ڤەکۆلەران ژ زانکۆیا سۆران، شاھنشینا عەرەبی یا سعۆدی، هندستان و میسرێ هاتیە ئەنجامدان.

ڤەکۆلینێ ڕێکا فۆنکشنا لێکتێدای یا ڕێژەیی یا گشتگیر (GERFM) بکارئینایە بۆ ڤەکۆلینا هاوکێشەیا شرۆدینگەر یا نە-هێلی یا دوو-شێوازی و دەرئێخستنا کۆمەکا چارەسەریێن نوی یێن سۆلیتۆنێن تیشکی.

گرنگترین ئەنجامێن ڤەکۆلینێ

• پێشئێخستنا چارەسەریان بۆ سۆلیتۆنێن پێل، تاریكەر، رۆنكەر، تێکەل تاریكەر و رۆنكەر، و یێن تاك.
• ڤەكۆلینا کاریگەریا پلەیا کەرتی و پلەیێن دەمی ل سەر رەفتار و جێگیریا سۆلیتۆنان.
• بكارئینانا لاساییكرنێن گرافیکی یێن دوو و سێ ڕەهەندی و نەخشەیێن کۆنتۆرێ رۆنكرنا چارەسەریان و ڕەفتارا وان.
• پێشكێشكرنا نێرین و تێگەهشتنێن نوی ل دۆر بەلاڤبوونا پێلان د فایبەرێن تیشكی یێن نە-هێلی و سیستەمێن ئالۆز دا.

سۆلیتۆنێن تیشکی گرنگیەكا زۆر د ڤەکۆلینا بەلاڤبوونا پێلێن جێگیر و پەیوەندیێن ب ڕێیا فایبەرێن ئۆپتیکی ھەیە، كو د شیاندایە د بوارێن سیستەمێن کوانتۆم، میکانیکا ئاڤێ، و داینامیکیێن نە-هێلی دا بھێنە بكارئینان. ھەروەسا ئەنجامێن ڤێ ڤەکۆلینێ بنگەهەکێ ماتماتیکی بۆ ڤەکۆلینێن پاشەڕۆژێ ل دۆر دیاردەیێن پێلێن ئالۆز و مۆدێلێن پلە-کەرتی دابین دکەن.

ئەڤ ڤەکۆلینە نیشانەیا پابەندبوونا زانکۆیا دهۆكە ب پێشئێخستنا نایابیا ڤەکۆلینێ، هەماهەنگیا ئەکادیمی یا ناڤدەولەتی، و نویگەری د بوارێن زانست و تەکنۆلۆژیێ دا، و پشتەڤانیا ئاراستەیێن ستراتیژی یێن زانکۆیێ د پێشخستنا شیانێن ڤەکۆلینێ و بەرهەمئینانا زانینێن مفادار د بوارێن زانستی دا دکەت.

ڤەکۆلینا تەمام بخوینە:
Optical Soliton Solution for Dual-Mode Time-Fractional Nonlinear Schrödinger Equation by Generalized Exponential Rational Function Method

نڤیسینگەها راگەهاندنا زانكۆیێ، ئیلۆنا ٢٠٢٦
فاطمە محمود عەلی