د چارچۆڤەیێ بهێزکرنا پەیوەندیێن ئەکادیمی و مرۆڤایەتی یێن د ناڤبەرا هەرێما کوردستانێ و ئەلمانیا دا، ئەڤرۆ رێکەڤتی ٣ـی شوباتێ ٢٠٢٦، پەیمانگەها چارەسەریا دەروونی و تراومایێ (IPP) ل زانکۆیا دهۆک، پێشوازی ل رێزدار خانم بێریڤان ئایماز، جێگرا سەرۆکێ پەرلەمانێ هەرێما نۆردراین-ڤێستڤالنا ئەلمانیا کر و ژ لایێ د. داود سلێمان ئەتروشی، سەرۆکێ زانکۆیا دهۆک، پ. د. یان ئیلهان کزلهان، راگرێ (IPP)، د. بوهار عیسا، هاریکارا راگرێ پەیمانگەهێ و ستافێ پەیمانگەهێ ڤە هاتە پێشوازیکرن.

د روینشتنەکێ دا، د. داود سلێمان ئەتروشی، سەرۆکێ زانکۆیێ، خۆشحالیا خۆ ب ڤێ سەرەدانێ دیار کر و ئاماژە دا کو پشتەڤانیا بەردەوام یا حکومەت و پەرلەمانێ ئەلمانیا، بوویە ئەگەرێ سەرکەڤتنا ڤی پرۆژەی، کو زانکۆ وەکو پرۆژەیەکێ هەرە گرنگ و خودان خزمەتێن فراوان دبینیت، کو وەکو بەرسڤەکا زانستی و مرۆڤی بۆ وان کارەساتێن پشتی سەرهلدانا داعش رویداین، هاتیە دامەزراندن.

ژ ئالیێ خۆڤە، رێزدار خانم بێریڤان ئایماز سوپاسیا پێشوازیا گەرم کر و رۆلێ پەیمانگەهێ بلند نرخاند. وێ دوپات کر کو هەرێما وان دێ بەردەوام بیت لسەر پێشڤەبرنا هەڤکاریێ و پشتەڤانیکرنا پرۆژەیێن مرۆڤی و زانستی و ژینگەهدۆستی.

دهێتە زانین خانم بێریڤان ئایماز، سیاسەتمەدارەکا کوردە ژ پارتا کەسک یا ئەلمانیا و جێگرا سەرۆکێ پەرلەمانێ هەرێما نۆردراین-ڤێستڤالنە. خانم بێریڤان ل باژێرێ چەولیگ ل باکوورێ کوردستانێ ژ دایک بوویە و ژ زارۆکینیێ ڤە ل ئەلمانیا دژیت. خانم ئایماز وەکو دەنگەکێ چالاک یێ بەرەڤانیکرنێ ژ مافێن کوردان، کەمینەیان، و ژینگەهێ دهێتە نیاسین. خانم ئایماز باوەریەکا بهێز ب رۆلێ گەنجان د ژیانا سیاسی دا هەیە و بەردەوام هاندانا گەنجێن کورد دکەت کو پشکداریێ د ژیانا سیاسی و مەدەنی دا بکەن.

نڤیسینگەها راگەهاندنا زانکۆیا دهۆک؛ ٣ـی شوباتێ ٢٠٢٦
وێنە: محەمەد عەبدولکەریم، عەلی حەبیب