ئەڤرۆ رۆژا پێنجشەمبی رێكەڤتی ١٩ـی ئیلونێ ٢٠٢٤، قونسلێ گشتی یێ ویلایەتێن ئێكگرتی یێن ئەمریكا ل ھەولێرێ، ستیڤ بیتنر، سەرەدانا زانكۆیا دھۆك كر، ب مەرەما ڤەدیتنا ھەولێن ھەڤكاریێ و پەرەپێدانا پەیوەندیا د ناڤبەرا زانكۆیا دھۆك و سازیێن جودا ل ویلایەتێن ئێكگرتی یێن ئەمریكا.

قونسلێ گشتی یێ ویلایەتێن ئێكگرتی و شاندێ ل گەل دا ژ لایێ سەرۆكێ زانكۆیا دھۆك، د. داود سلێمان ئەتروشی و ستافێ سەرۆكاتیا زانكۆیا دھۆك ڤە ل كوژیێ ئەمریكی ل زانكۆیا دھۆك ھاتنە پێشوازیكرن. ھەروەسا ئاندی ھالوس بەرپرسێ كاروبارێن گشتی ل بالیۆزخانا ئەمریكی ل بەغدا و كیم سترولو، بەرپرسێ كاروبارێن گشتی ل قونسلخانا گشتی یا ئەمریكی ل ھەولێرێ ئامادە بوون، د روینشتنێ دا گەنگەشە ب پشكداریا بەرپرسێن رێڤەبەریا پەیوەندیێن ناڤدەولەتی و رێڤەبەریا راگەھاندنێ ل زانكۆیا دھۆك ھاتنە ئەنجامدان.

سەرەدانێ تەكەز ل سەر چاڤدێریكرنا پرۆژێن ھەڤپشك د ناڤبەرا زانكۆیا دھۆك و سازیێن ل ویلایەتێن ئێكگرتی ھاتەكرن، ل گەل تەكەزكرن ب شێوەكێ تایبەت ل سەر دەستپێشخەریێن ب ئارمانجا پەرەپێدانا ھەڤكاریا ئەكادیمی و ڤەكۆلین و لێكگوھۆرینا رەوشەنبیری دھێنە ئەنجامدان. دیسان سەرۆكێ زانكۆیا دھۆك، د. داود ئەتروشی رۆلێ زانكۆیا دھۆك وەك سەركردەیەكێ ھەرێمی د پەرەپێدانا ھەڤكاریا ناڤدەولەتی بەرچاڤكر، ھەروەسا ئاماژە ب ئەوێ چەندێ دا كو ھەڤپشكیا زانكۆیا دھۆك ل گەل ویلایەتێن ئێكگرتی پشكداری ب شێوەیەكێ زۆر د پێشڤەبرنا خواندنا بلند ل دەڤەرێ دا كریە.

ژ لایێ خۆڤە د. نزار ئەمین محەمەد، رێڤەبەرێ پەیوەندیێن ناڤدەولەتی ل زانكۆیا دھۆك، باس ل پرۆژێن سەركەڤتی یێن زانكۆیا دھۆك یێن نوكە كر، ھەروەسا بوارێن نوی یێن ھەڤكاریا پێشبینیكری د بوارێن وەكو زانست و تەكنۆلۆژیا و بەرنامێن لێكگوھۆرینا ئەكادیمی دەستنیشانكرن.

ھەروەسا قونسلێ گشتی ستیڤ بیتنر دەربرین ژ كەیفخۆشیا خۆ بۆ پەیوەندیێن بھێز یێن د ناڤبەرا زانكۆیا دھۆك و سازیێن ئەمریكی دا كر، دیسان تەكەز ل سەر گرنگیا فێركرنێ و دیپلۆماسیا رەوشەنبیری د ئاڤاكرنا ھەڤپشكیێن درێژخایەن دا كر، ھەروەسا پەسنا كوژیێ ئەمریكی ل زانكۆیا دھۆك كر بۆ پشكداریكرنا وێ یا كارا د پەرەپێدانا لێكتێگەھشتنێ د ناڤبەرا رەوشەنبیری و لێكگوھۆرینا ئەكادیمی دا.

سەرەدانا قونسلێ گشتی یێ ئەمریكا ب پێنگاڤەكا گرنگ دھێتە ھژمارتن د پێگیریا زانكۆیا دھۆك د بەرفرەھكرنا پەیوەندیێن خۆ یێن ناڤدەولەتی و پەرەپێدانا پەیوەندیێن ئەكادیمی ل گەل سازیا ل سەر ئاستێ جیھانێ.

راگەھاندنا زانكۆیا دھۆك؛ ١٩ـی ئیلونێ ٢٠٢٤

عسمەت خابور وماهر طاهر كێستەیی

فۆتۆ: محەمەد عەبدولكەریم