ل رێکەفتی ٢٦ـی چریا دووێ، ٢٠٢٤، و ب ئامادەبوونا هاریکارێ سەرۆکێ زانکۆیا دهۆک بۆ کاروبارێن کارگیری و دارایی، د. دلشاد عبدالحلیم جبار، ورێڤەبەرێ پەیوەندیێن ناڤدەولەتی، د. نەزار ئەمین، و راگرێ كۆلیژا پزیشكیا ددانان ل زانكۆیا دهۆك، د. سەعید عەلی محەمەد، شاندەكێ كۆلیژا پزیشكیا ددانان ل زانكۆیا موستەنسریە، ب یاوەریا راگرا وێ كولیژێ و ئەنداما جڤاتا نیشتیمانی یا عیراقی یا متمانەبەخشینا كۆلیژێن پزیشكیا ددانان، د. مەها جەمال ئەلعانی، سەرەدانا زانكۆیا دهۆك كر ب مەرەما ئیمزاكرنا یاداشتناما لێكتێگەهشتنێ د ناڤبەرا كولیژێن پزیشكیا ددانان یێن هەردوو زانكۆیان. ئەڤ یاداشتنامە رۆلێ خو دگێریت د خورتكرنا پەیوەندیان دا و وێ چەندێ دیار دكەت كو هەردوو زانكۆ كار و چالاكیێن هەڤپشك یێن گرێدای ڤەكۆلینێن زانستی و چالاکیێن دیتر پێكڤە ئەنجامبدەن ل داهاتی.

ئیك ژ چالاكیێن دی یێن سەرەدانا شاندی ئەو بوو ئەنجامدانا وۆركشۆپەككا دوو رۆژی ئەوا كو ل سپێدێن هەردوو رۆژێن ٢٥ و٢٦ـێن چریا دووێ برێڤەچووین ل زانکۆیا دهۆک ب کۆمبوونا ئەندامێن شاندی ژ راگرا ناڤبری وهاریکارێ راگرێ، د. بلند محمد سەلیم، و بەرپرسا یەکا دلنیا جوری ل زانکۆیا موستەنسریە، د. نور ناتق، دگەل جڤاتا کۆلیژا پزیشکیا ددانان ل زانکۆیا دهۆک و بەرپرسێن هەردوو یەکێن خواندنێن بلند و دلنیا جوری. بابەتێ سەرەکی یێ وۆرکشۆپێ چەوانیا بدەستڤەئینانا متمانەبەخینا ئەکادیمی بوو بۆ کۆلیژا پزیشکیا ددانان یا زانکۆیا دهۆک. و ستانداردێن پێدڤی بۆ بدەستڤەئینانا متمانەبەخشینێ ژ جڤاتا نشتیمانی یا عیراقی هاتنە گەنگەشەکرن د رۆژێن وۆرکشۆپێ دا.

سەبارەت تەوەرێن یاداشتناما لێکتێگەهشتنێ، خالێن هەرەگرنگ د ناڤ دا ئەو بوون کو هەردوو کۆلیژێن پزیشکیا ددانان کارێن هەڤپشک پێکڤە ئەنجامدەن وەک ئەنجامدنا ڤەکۆلینێن زانستی و سەرپەرشتیکرنا هەڤپشک یا ڤەکۆلینێن ماستەر و دکتۆرایێ و دیسان هەڤپشکی د گەنگەشێن نامێن ماستەر و دکتۆرایێ دا دناڤبەرا هەردوو کۆلیژان دا. ژ لایەکێ دی ڤە، هەردوو کۆلیژ کۆنفرانسێن هەڤپشک ئەنجام بدەن ل سەر بنەمایێن زانستی، زێدەباری سەرەدان و کۆمبوونێن بەردەوام دناڤبەرا ئەندامێن هەردوو کۆلیژان دا بۆ لێک نزیکبوون ونیاسینا خالێن هێزێ یێن هەردوو لایان، ئەڤە ژی ئەزموونا زانستی یا هەردوو کۆلیژان گەشتر دکەت.

راگەهاندنا زانكۆیا دهۆك، 27ـی چریا دووێ، 2024

فاطمة محمود

فۆتۆ: حسێن تتمی