ل رۆژا سێشەمبی رێكەڤتی ١٠ـی ئیلونێ ٢٠٢٤، ب ناڤۆنیشنێ "دا چیرۆكا خۆكوشتنێ بگوھۆرین – دەست ب دیالۆگێ بكە"، زانكۆیا دھۆك رۆژا جیھانی یا بەرھنگاربوونا خۆكوشتنێ ل پەیمانگەھا چارەسەریا دەروونی و چارەسەرەیا تراومایێ IPP ب ھەڤكاری ل گەل رێڤەبەریا گشتی یا ساخلەمیا پارێزگەھا دھۆكێ و رێكخراوا " Lotus Flower" ساخكر.

ھژمارەكا زۆر ژ بەرپرسێن حكومی و نوینەرێن پارتێن سیاسی و پیشەكار و ئەكادیمیست ئامادەبوون. د. بھار عیسا، ھاریكارا راگرێ پەیمانگەھا چارەسەریا دەروونی و چارەسەریا تراوما، پەیڤەك پێشكێشكر، ناڤبری د پەیڤا خۆدا تەكەز ل سەر پشكداریێن پەیمانگەھێ و كاریگەریا پرۆژێن وێ یێن دەروونی ل سەر جڤاكی كر. ھەروەسا د. نەوزاد سامی، نوینەرێ رێڤەبەریا گشتی یا ساخلەمیا پارێزگەھا دھۆكێ، باس ل ھەولێن بەردەوام یێن رێڤەبەریێ كر یێن بۆ خۆپاراستن و بەرھنگاربوونا خۆكوشتنێ ل پارێزگەھا دھۆكێ كر، دیسان خانم ڤیان ئەحمەد، رێڤەبەرا رێكخراو " Lotus Flower" باس ل دەستپێشخەریێن رێكخراوێ و دەستكەڤتێن وێ د بەرھنگاربوونا خۆكۆشتنێ كر.

دیسان سمینارەك ژ لایێ تیما ھیلاگارم یا سەر ب پەیمانگەھا ئاشتیێ یا ناڤدەولەتی ل دۆر خۆكوشتنێ ھاتە پێشكێشكرن، د سمینارێ دا ب ھویری دیاردا خۆكوشتنێ و بەلاڤبوونا وێ و خۆپاراستن و بەرھنگاربوونا وێ ھاتنە شرۆڤەكرن، ھەروەسا باس ل پرۆژێ ھیلاگارم بۆ خۆپاراستن ژ خۆكوشتنێ كر، كو دەستپێشخەریەكا ناڤدەولەتی یە ل سالا ٢٠٢١ ب پالپشتیا حكومەتا ئەلمانیا ھاتیە دامەزراندن بۆ چارەسەركرنا كەیسێن خۆكوشتنێ ل پارێزگەھا دھۆكێ. ل دویماھیێ د. بھار عیسا سوپاسیا لایەنێن پشكدارا بۆ ھەولێن وان یێن رژد بۆ بەرھنگاربوونا دیاردا خۆكوشتنێ كر.

راگەھاندنا زانكۆیا دھۆك؛ ١١ـی ئیلونێ ٢٠٢٤

فۆتۆ: محەمەد عبدولکەریم