د پێنگاڤەكا گرنگ دا بەرەڤ پەرەپێدانا ھەڤكاریا ئەكادیمی یا ناڤدەولەتی، زانكۆیا دھۆك و زانكۆیا ئوستراڤا یا تەكنیكی VSB یا وەلاتێ چیك، رێككەڤتنەكا لێكتێگەھشتنێ د كۆمبوونەكا ئونلاین دا ئیمزاكر، ئیمزاكرنا رێككەڤتنێ ب پێنگاڤەكا گرنگ د پەرەپێدانا ھەڤپشكیێن فێركرنێ و ڤەكۆلینێ د ناڤبەرا ھەردوو زانكۆیا دا دھێتە ھژمارتن ب ئارمانجا پەرەپێدانا كارلێكرنا زانستی و لێكگوھۆرینا كەلتوری.

د كۆمبوونێ دا نوینەرێن ھەردوو زانكۆیا ئامادەبوون، كو ژ زانكۆیا دھۆك، سەرۆكێ زانكۆیا دھۆك د. داود سلێمان ئەتروشی و ھاریكارێ سەرۆكێ زانكۆیێ بۆ كاروبارێن قوتابیان د. نەبەز ئیبراھیم محەمەد و د. محەمەد عەزیز ئیبراھیم و د. نزار ئەمین محەمەد و د. جەلال حەسەن یوونس وەکو رێکخەرێ ڤێ رێکەڤتننامێ ژ زانکۆیا دهۆک ئامادە بوون، دیسان ژ زانكۆیا ئوستراڤا یا تەكینیكی VSB سەرۆكێ زانكۆیا ئوستراڤا یا تەكنیكی VSB د. فاتسلاڤ سناسیل و د. فاتسلاڤ زوبیسیك و د. جیری مالیس و نوینەرێن پشكا پەیوەندیێن ناڤدەولەتی، زوزانا ستروبوشوفا و كامیلا بوركورنا و مارتن كلیمبا ئامادە بوون.

سەرۆكێن ھەردوو زانكۆیا دەربرین ژ كەیفخۆشیا خۆ بۆ ئەڤێ ھەڤپشكیا نوی دەربری و سەرۆكێ زانكۆیا دھۆك تەكەز ل سەر گرنگیا ئەڤان جۆرە ھەڤكاریا كر بۆ پەرەپێدانا جیاوازیا فێرركنێ و شیانێن ڤەكۆلینێ، د ھەمان دەمدا سەرۆكێ زانكۆیا ئوستراڤا یا تەكینیكی VSB تەكەز ل سەر گرنگیێن لێكگوھۆری یێن رێككەڤتنا لێكتێگەھشتنێ كر و ئاماژە ب پەیوەندیێن زانكۆیا ئوستراڤا یا تەكینیكی VSB یێن بەری نوكە ل گەل ھەرێما كوردستانێ دا.

ھەژی ئاماژەدانێ یە، رێككەڤتنا لێكتێگەھشتنێ چوارچوڤەكی بۆ ڤەكۆلینێن ب ھەڤكاری و لێكگوھۆرینێن ئەكادیمی و شێوەیێن جودا یێن ھەڤكاریا ئەكادیمی دەستنیشاندكەت، دیسان دھێتە پێشبینیكرن كو ئەڤ ھەڤپشكیە ب شێوەیەكێ مەزن كاریگەریێ ل سەر جڤاكێ ئەكادیمی یێ جیھانی بكەت و پەرەپێدانا داھێنان و لێكتێگەھشتنا د ناڤبەرا كەلتورێن جودا دناڤبەرا ھەرێما كوردستانێ و كۆمارا چیك دا بكەت.

زانكۆیا دھۆك

زانكۆیا دھۆك زانكۆیەكا حكومی یە ل باژێرێ دھۆكێ، ب دویراتیا 150 كیلومەترا ژ باكورێ رۆژئاڤا ھەولێرێ – پایتەختێ ھەرێما كوردستانا عیراقێ. باژێرێ دھۆكێ دكەڤیتە د گەلیەكێ جواندا دەوروبەرێن وی چیایێن بلندن. كەمپا زانكۆیێ دەڤەرەكا كەسك یا مەزنە ل لایێ رۆژئاڤا باژێری و دیمەنەكێ جوان بەرامبەر باژێرێ دھۆكێ و سرۆشتێ دەوروبەر ھەیە. زانكۆیا دھۆك ل چریا ئێكێ 1992 ھاتیە دامەزراندن. ب دوو كۆلیژەیا ب تنێ دەستپێكریە بۆ دابینكرنا داخازیا دەڤەرێ ژ دەرچوویێن بسپور. نوكە زانكۆیا دھۆك ژ 19 كولیژا پێكدھێت كو 67 پشكێن زانستی بخۆڤەدگریت. پتری 24000 قوتابی ل زانكۆیا دھۆك دخوینن و پتری 4000 كادرێ ئەكادیمی و كارگێری ھەیە. قوتابیێن زانكۆیا دھۆك د ناڤ باشترین جڤاكێن ئەكادیمی ل دەڤەرێ دخوینن، د بوارێن جودا دا وەكو چاندن، پزیشكی، پزیشكی فیتێرنەری، تەلارسازی، ئەندازیاری، زانستێن مرۆڤایەتی، زمان، پەروەردا بنەرەت، ئابور و پلاندانانا جھەكی. زانكۆیا دھۆك ھەڤپشكیەكا بھێز ھەیە ب رێكا پەیوەندیێن خۆ ل گەل چەندین سازیێن خواندنا بلند و سەنتەرێن ڤەكۆلینان ل سەرانسەری جیھانێ وەكو: زانكۆیا بوردو، زانكۆیا ئیندیانا IU، زانكۆیا نیویورك NYU، زانكۆیا نوتردام ND، زانكۆیا ئەركنساس ل لیتل رۆك UA، زانكۆیا بریدج ووتر ل ویلایەتێن ئێكگرتی یێن ئەمریكا، زانكۆیا وارسو ل پۆلەندا، زانكۆیا گلاسكۆ ل ئسكوتلەندا، زانكۆیا توینتی ل ھۆلەندا، زانكۆیا لایبزیگ، زانكۆیا LLC، زانكۆیا ئولدنبۆرگ، زانكۆیا فیشتا، زانكۆیا فلینسبۆرگ، زانكۆیا دورتموند TU، زانكۆیا گیسین THM ل ئەلمانیا، زانكۆیا توسیكا، زانكۆیا پاڤیا، زانكۆیا ساپینزا ل ئیتالیا، زانكۆیا دیۆستۆ، زانكۆیا بەرشەلۆنا و زانكۆیا گەرەنادا UGR ل ئسپانیا، زانكۆیا لوند ل سوید، زانكۆیا ساسكس ل بەریتانیا، زانكۆیا تامبیری ل فنلەندا، زانكۆیا شاریقە و زانكۆیا خورفكان ل ئیمارات، و چەندین زانكۆیێن دی. دیسان زانكۆیا دھۆك ئەندامەكا چالاكە ل ئێكەتیا نێڤدەولەتی یا زانكۆیان IAU و ئێكەتیا زانكۆیێن دەریا ناڤەراست UNIMED و ئێكەتیا زانكۆیێن عەرەبی AARU.

راگەھاندنا زانكۆیا دھۆك؛ 4ـی تیرمەھێ 2024

عسمەت خابوور و ماھر طاھر كێستەیی

فۆتۆ: حسێن تتمى