زانکۆیا دهۆك، ٦ـی چریا ئێکێ ٢٠٢٦ | نڤیسینگەها راگەهاندنا زانکۆیێ (UNPO) — پشکا وەرگێرانێ ل کۆلیژا زمانان ل زانکۆیا دهۆك، کۆربەندك بۆ ساخکرنا رۆژا جیهانی یا وەرگێرانێ رێکئێخست، کو تێدا ستافێ ئەکادیمی و قوتابی کۆمکرن بۆ تیشك ئێخستنە سەر گرنگیا وەرگێرانا نڤیسکی و زارەکی و گەكۆلین كر ل سەر پێشهات و گەشەپێدانێن نوی د ڤی پیشەیی دا.

ئەڤ چالاکیە کو ل ٥ـی چریا ئێکێ ٢٠٢٦ ل کۆلیژا زمانان بڕێڤەچوو، ب پەیڤەکا بخێرهاتنێ ژ لایێ د. زین سەعید تەها، هاریكارا راگرێ کۆلیژێ و مامۆستا ل پشکا وەرگێڕانێ ڤە هاتە ڤەکرن، کو تێدا تیشك ئێخستە سەر گرنگیا رۆژا جیهانی یا وەرگێڕانێ و رۆلێ سەرەکی یێ وەرگێڕانێ د گرێدانا زمان، کەلتۆر و جڤاکان ب ئێك ڤە.

ل گۆرەی نەتەوەیێن ئێکگرتی، رۆژا جیهانی یا وەرگێرانێ ساڵانە ل ٣٠ـی ئیلۆنێ دهێتە ساخکرن، وەك رێزگرتنەك بۆ رۆلێ گرنگ یێ وەرگێرێن نڤیسکی و زارەکی د نێزیککرنا گەلان، ئاسانکرنا پەیوەندیان و بەرفرەهکرنا تێگەهشتنێ د ناڤبەرا زمان و کەلتۆرێن جودا دا.

بەرنامێ چالاکیێ چەندین پێشکێشکرن ب خۆ ڤە گرتن کو باس ل پرسێن هەڤچەرخ یێن وەرگێرانا نڤیسکی و زارەکی دکر، ب تایبەتی ژی گرنگیدان ب پراکتیکا پیشەیی، تەکنیکێن وەرگێرانا زارەکی، وەرگێرانا دیتنێ-بهیستنێ، و کاریگەرییا زێدەبووی یا ژیرییا دەستکرد.

پێشکێشکرنێن سەرەکی ئەڤێن ل خوارێ بوون:

- "وەرگێڕان د پراکتیکێ دا: پرسیار و بەرسڤ دگەل وەرگێرەکێ ب ئەزموون"، ژ لایێ د. شیڤان شلێمۆن تۆما ڤە هاتە پێشکێشکرن، کو تێدا ئەزموونێن خۆ یێن پیشەیی پێشکێشکرن و باس ل لێهاتیبوونێن زمانی، کەلتۆری و پیشەیی یێن پێدڤی بۆ وەرگێرانەکا کاریگەر کر.

- "ژ گوهداریکرنێ بۆ وەرگێرانا زارەکی: ڤەدیتنا شیانێن تەکنیکا سێیەرکرنێ (Shadowing Technique)"، ژ لایێ مامۆستا سەمیرە ناسر حیکمەت ڤە هاتە پێشکێشکرن، کو تەكەز کرە سەر تەکنیکێن پێشئێخستنا شیانێن وەرگێڕانا زارەکی.

- "ژێرنڤیسکرن (Subtitling) دژی دۆبلاژێ: دیتنەکا هەڤبەرکرنێ"، ژ لایێ د. زین سەعید تەها ڤە هاتە پێشکێشکرن، کو ل سەر دوو رێبازێن گرنگ یێن وەرگێرانا دیتنی-بهیستنی ڤەكۆلین دکر.

- "چەوا ژیرییا دەستکرد پاشەڕۆژا دۆبلاژێ دگوهۆڕیت"، ژ لایێ مامۆستا شلێر هانی شوکری ڤە هاتە پێشکێشکرن، کو رۆلێ ژیرییا دەستکرد و کاریگەرییا وێ یا چاڤەڕێکری ل سەر پاشەڕۆژا دۆبلاژێ شیکار دکر.

چالاکیێ باس ل چەندین تەوەرێن سەرەکی کر، ژ وان وەرگێڕانا ب هاریكاریا ژیرییا دەستکرد، وەرگێرانا ئامیری، ئالنگاریێن پیشەیی و ئەخلاقی، هەستیاریا کەلتۆری، و گوهۆڕینێن تەکنۆلۆژی، هەڤدەم پلاتفۆرمەك بۆ ئالۆگۆڕیا ئەکادیمی د ناڤبەرا مامۆستا، ڤەکۆلەر، قوتابی، وەرگێڕ و پسپۆرێن ڤی بواری دا رەخساند.

ئەڤ هەلکەڤتە پابەندبوونا زانکۆیا دهۆك ب ئالۆگۆڕیا ئەکادیمی، گەشەپێدانا پیشەیی، ڤەگوهاستنا دیجیتاڵی، و پەروەردا زمانان نیشان ددەت، ب مەرەما پشتەڤانیکرنا قوتابی و ئەکادیمیان د بەرسڤدانا پێدڤیێن گوهۆڕاو یێن پیشەیێ وەرگێرانێ دا.

ڤێره کلیك بكە بۆ دیتنا وێنەیان

نڤیسینگەها راگەهاندنا زانکۆیێ، ٦ـی چریا ئێکێ ٢٠٢٦
راپۆرت ژ لایێ: فاطمە محمود عەلی، نیبار حەجی حسێن
وێنە: محەمەد ع. تاهر

پەیڤێن سەرەكی:

• رۆژا جیهانی یا وەرگێڕانێ
• وەرگێڕانا نڤیسکی و زارەکی
• کۆلیژا زمانان زانکۆیا دهۆك
• وەرگێڕان ب هاریکاریا ژیرییا دەستکرد
• پەروەردا وەرگێڕانێ