د چارچۆڤێ چالاکیێن زانستی و جڤاکی یێن بەردەوام و ب مەبەستا بەلاڤکرنا هوشیارییا دەروونی د ناڤا تەخ و چینێن جودا یێن جڤاکی دا، پەیمانگەها چارەسەرییا دەروونی و ترۆمایێ (IPP) ل زانکۆیا دهۆک پێشوازی ل کۆمەکا قوتابیێن پەیمانگەها داسنیا کر.

د ئەڤێ سەرەدانێ دا، ستافێ پەیمانگەهێ ب شێوەیەکێ تێر و تەسەل بەحسێ تێگەهێ (ساخلەمیا دەروونی) و گرنگیا ئەوێ بۆ تاک و جڤاکی بۆ قوتابیان کر. تیشک ئێخستنە سەر هندێ کو ساخلەمییا دەروونی پشکەکا سەرەکی و نەجودایە ژ ساخلەمیا گشتی یا مرۆڤی، و پێدڤییە گەنج و سنێلە ب تایبەتی ل سەر ئەڤی بابەتێ گرنگ هوشیار بن.

د پشکەکا دی یا سەرەدانێ دا، قوتابی ژ نێزیک شارەزای پرۆژە و خزمەتگوزاریێن مرۆڤایەتی و زانستی یێن پەیمانگەها (IPP) بوون، ژ ئەوان ژی:

١- هێلا گەرم یا ڕێگرتنێ ل خۆکوشتنێ: شروڤەکرنەک هاتە دان کا ئەڤ هێلە چاوا ب شێوەیەکێ پیشەیی و نهێنی کار دکەت بۆ پاراستنا ژیانا ئەو کەسێن د کێشە و فشارێن گران یێن دەروونی دا دەرباز دبن و هزرێن نەرێنی دکەن.

٢- کلینیکا چارەسەرییا ئالۆدەبوونێ: باس ل رۆلێ ئەڤێ کلینیکێ هاتەکرن د هاریکاریکرنا ئەو کەسان دا یێن تووشی ئالۆدەبوونا ماددەیێن جودا بووین، و چەوا ب ڕێکێن زانستی دهێنە چارەسەرکرن داکو ڤەگەرنە ناڤ ژیانا ئاسایی.

٣- کلینیکا (IPP) یا ئەلمانی: وەک ناڤەندەکا پێشکەفتی بۆ چارەسەرییا دەروونی هاتە ناساندن، کو ب هەماهنگی دگەل لایەنێن ئەلمانی کار دکەت و نووترین میتۆدێن زانستی بۆ چارەسەرکرنا نەخۆشیێن دەروونی و ترۆمایان بکاردئینیت.

ئەڤ جۆرە سەرەدانە دبنە ئەگەرێ دروستکرنا پرەکا پەیوەندیێ دناڤبەرا زانکۆیێ و سازیێن پەروەردەیی دا، و ڕۆلەکێ مەزن دگێڕن د کێمکرنا (ستێگما – شەرمکرن ژ تۆشبوونا تێکچوونێن دەروونی).

د دووماهیکا سەرەدانێ دا، قوتابیێن پەیمانگەها داسنیا سوپاسیا زانکۆیا دهۆک و پەیمانگەها (IPP) کر بۆ ئەوێ دەرفەتا زانستی و مرۆڤایەتی یا بۆ ئەوان هاتیە ڕەخساندن.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانكۆیێ، شواتا ٢٠٢٦ـێ

راپۆرت: عیسمەت مەحود محەمەد