تێگەهشتن ژ ماف و ئەرکێن هەڤژینیێ: زانکۆیا دهۆك بەرهەڤیەکا یاسایی و کۆمەڵایەتی پێشکێشی گەنجان کر
٣١ـی تەباخا ٢٠٢٦ـێ، نڤیسینگەها راگەهاندنا زانکۆیێ | د چوارچۆڤێ چالاکیێن ئەکادیمی و کۆمەڵایەتی دا، سەنتەرێ ڤەکۆلینێن رامیاری و یاسایی ل کۆلێژا یاسا ل زانکۆیا دهۆك ب هەڤکاری دگەل ڕێکخراوا ئاسا یا نەحکومی بۆ پەرەپێدانا یاسایی و کۆمەڵایەتی، خۆلەكا سێ رۆژی ب ناڤونیشانێ "بهێزکرنا ڕەوشەنبیریا خێزانی – پێگەهاندنا خێزانی" ل هۆلا قۆبەهان ب دوماهی ئینا کو ژ رێکەڤتی ٢٤ تا ٢٦ـی تەباخا ٢٠٢٦ـێ یا بەردەوام بوو. د ڕێورەسمێن ڤەكرنێ دا کو ژمارەکا بەرچاڤ ژ گەنجان تێدا پشکدار بوون، پەیڤێن دەستپێکێ ژ لایێ رێڤەبەرێ سەنتەرێ ناڤهاتی، د. نشوان خالد سالح، و هەروەسا راگرا كۆلیژێ، د. ئەڤین خالد
عەبدولرەحمان ڤە هاتنە پێشکێشکرن، کو تێدا باس ل ئارمانجێن خۆلێ و گرنگیا ڕۆلێ زانستی د ئاڤاکرنا خێزانێ دا هاتە کرن. پاشان، بەرنامەیێ خۆلێ ب سمینارا ئێکێ ژ لایێ د. ئیسماعیل ئابابکر عەلی، مامۆستایێ كۆلیژێ و رێڤەبەرێ جێبەجێكارێ رێكخراوێ
ڤە دەستپێکر ب ناڤونیشانێ "ئەرکێن هەڤپشك د ناڤبەرا زەلام و ئافرەتێ دا د قۆناغا خواستنێ و هەڤژینیێ دا"، کو تێدا ب شێوازەکێ هوور ڕەهەندێن یاسایی و کۆمەڵایەتی هاتنە شڕۆڤەکرن.
د تەوەرێن ڕۆژا دووێ دا، لایەنێ ئاینی ب ئاوایەکێ زەلال هاتە ڕۆنکرن ژ لایێ مامۆستا هێرش جمیل، پسپۆڕێ کاروبارێن شەریعەتی، د سمینارا "دیتنا شەریعەتی بۆ هەڤژینیێ و گرنگیا خێزانی" دا، کو تێدا تەکەزی ل سەر بنەمایێن پیرۆز یێن ئیسلامێ د
ئاڤاکرنا هەڤژینیێ دا کر. ژ لایەکێ دی یێ کۆمەڵایەتی ڤە، مامۆستا بارین موسى، مامۆستا ل زانکۆیا دهۆك، سمینارەک ب ناڤونیشانێ "لایەنێ جڤاکی یێ هەڤژینیێ" پێشکێشکر و تیشک ئێخستە سەر ڕۆلێ خێزانێ د ڕاگرتنا هەڤسەنگیا کۆمەڵایەتی دا و
چەوانیا سەرەدەریا ژیرانە دگەل ئاستەنگێن ڕۆژانە.
د ڕۆژا سێیێ و دوماهیێ دا، د. نشوان خالد سالح سمینارەك ب ناڤونیشانێ "مافێن هەڤژینیێ ل سەر زەلامی د یاسا بارێ کەسی دا" پێشکێشکر. ناڤبری ب تێروتەسەلی تیشك ئێخستە سەر لایەنێ یاسایی یێ بەرپرسیارەتیا زەلامی بەرامبەر هەڤژینا خۆ، وەك
دابینکرنا نەفەقێ، جهێ ئاکنجیبوونێ یێ گونجای، و دابینکرنا مافێن دارایی و یاسایی یێن ژنێ ل گۆرەی یاسا بارێ کەسی، دا کو پشکدار ب هووربینی ئاگەهداری پابەندبوونیێن یاسایی و دارایی ببن. ل دوماهیا خۆلێ ژی، باوەرنامەیێن پشکداریێ ل
سەر هەمی گەنجێن پشكدار هاتنە دابەشکرن، کو ئارمانجا بلند یا ڤێ چالاکیێ بلندکرنا ئاستێ ڕەوشەنبیریا یاسایی، کۆمەڵایەتی و ئاینی بوو بۆ ئاڤاکرنا ژیانەکا خێزانی یا ساخلەم.
ڤێرە كلیك بكە بۆ دیتنا وێنەیان
نڤیسینگەها راگەهاندنا زانكۆیێ، ٣١ـی تەباخا ٢٠٢٦
رۆندك فازل عادل
وێنە: محەمەد ع. تاهر