زانکۆیا دهۆک، ٢٩ـی کانوونا دووێ ٢٠٢٦ | نڤیسینگەها راگەهاندنا زانکۆیێ (UNPO) —

وەکو پشكەك ژ پێگیریا خۆ یا بەردەوام ب چاڤدێریکرنا ستافی، و هشیاریا ساخلەمیا دەروونی، و گەشەپێدانا دەزگەهی یا بەردەوام، زانکۆیا دهۆک وۆرکشوپەکا تایبەتمەند ل ژێر ناڤونیشانێ "سترێسا کاری و گرنگیدان ب خۆ" رێکئێخست، کو تێدا فەرمانبەرێن زانکۆیێ و ب تایبەت سەرپەرشتیێن پشکێن ناڤخۆیی پشكداركرن.

وۆرکشوپ ل سەنتەرێ کۆنفرانسان یێ زانکۆیێ (UNCC) هاتە ئەنجامدان و ژلایێ سەنتەرێ شیرەتکاریا دەروونی و جڤاکی و خزمەتێن قوتابیان ڤە هاتبوو رێکخستن، ئەڤ چەندە ژی دوپاتیێ ل سەر ستراتیژیەتا زانکۆیا دهۆک دکەت بۆ بەرهەڤکرنا ژینگەهەکا کاری یا ئەکادیمی یا ساخلەم و پڕی پشتەڤانی.

چالاکی ب پەیڤەکا بخێرهاتنێ ژ لایێ د. دلڤین مقداد ئەحمەد، رێڤەبەرا سەنتەری دەستپێکر، وێ تەکەزی ل سەر پابەندبوونا زانکۆیێ کر ب تێکەلکرنا خۆشگوزەرانیا دەروونی د ناڤ کەلتوورێ دەزگەهی دا. ل دوویڤ دا، سمینارەکا کورت ژلایێ خانم لەیلان محەمەد سالح ڤە، بەرپرسا یەکەیا زانیاریان ل سەنتەری هاتە پێشکێشکرن، کو تێدا باس ل پێکهاتە و خزمەت و پرۆگرامێن سەنتەری کر یێن کو پێشکێشی قوتابی و ماموستا و فەرمانبەران دکەن.

د بەشێ زانستی یێ وۆرکشوپێ دا، د. یوسف عەلی یاسین پشكدار بوو، پڕۆفیسۆرێ هاریکار ل پزیشكیا دەروونی و چارەسەرکارێ دەروونی، کو وانەیەکا کویر ل دۆر سترێسا دەروونی پێشکێشکر. ناڤبری باس ل پێناسە، پێکهاتە و جۆرێن سترێسێ کر، و کارتێکرنێن وێ یێن کورت و درێژخایەن ل سەر لەش و هزرێ مرۆڤی رۆهنکرن، ژ وان پرۆسێسێن مەعریفی، هەست و سۆز، رەفتار و وژدانێ. هەروەسا تەکەزی ل وێ چەندێ کر کو سترێسا کاری یا بەردەوام دبیتە ئەگەرێ پەیدابوونا ئاریشێن ساخلەمیێ یێن مەترسیدار ژبەر دەردانا زێدە یا هۆرمونێ کورتیزۆلێ، کو کارتێکرنێ ل ساخلەمیا جەستەیی، سەقامگیریا دەروونی و ئەدایێ کاری دکەت.

د بڕگەکا تەملکاری دا، ماموستا سوزان حەسەن، چارەسەرکارا دەروونی ل سەنتەری، چەند ستراتیژیەتێن پراکتیکی بۆ سەرەدەریێ دگەل سترێسا رۆژانە پێشکێشکرن. بابەتی وێ گرنگی د دا رێکێن گشتگیر یێن گرنگیدان ب خودێ، کو لایەنێن دەروونی، رووحانی، جەستەیی، سۆزداری و کەسایەتی بخۆڤەدگرت، و دوپاتی ل سەر گرنگیا هەڤسەنگی و خۆڕاگریێ کر بۆ پاراستنا کارکرنا پیشەیی.

هەروەسا وۆرکشوپێ باس ل ڕەهەندێن جڤاکی یێن سترێسا کاری کر، کو ژلایێ د. سومەیە سەعید خالد، ئەکادیمی ل کۆلیژا زانستێن مرۆڤایەتی هاتە پێشکێشکرن. ناڤبری خێزان، جهێ کاری و ژینگەها جڤاکی یا بەرفرەەـ وەکو ژێدەرێن سەرەکی یێن سترێسێ دەستنیشانکرن، و تەکەزی ل سەر خۆپاراستنێ کر ب ڕێکا دانانا ئارمانجان، خۆناسینێ، گونجاندنا جڤاکی یا ساخلەم و گرنگیدانا بەردەوام ب خود، کو هەمی پێکڤە دبنە هاریکار بۆ کۆنترۆلکرنا بەردەوام یا سترێسێ.

چارچۆڤێ خۆشگوزارنیێ بەرێ خۆ ددەتە چاڤدێريا خۆیى وەک پرۆسەکا هەڤسەنگ کو ل سەر سێ رەهەندێن پێكڤە گرێدای دابەش دبیت: هزر، لەش، و گیان. ئەڤ بابەتە ژ لایێ خانم بارين موسى سلێمان، بەرپرسا يەکا جڤاكى ل سەنتەری ڤە هاتە پێشکێشکرن، و تیشک ئێخستە سەر چاڤدێريا خۆیى یا جەستەیی، سۆزداری، دەروونی و روحی وەک ستوینێن سەرەکی بۆ ب دەستڤەئینانا خۆشگوزارنیا گشتگیر و پاراستنا کاریگەریێ درێژخایەن.

چالاکی ب روینشتنەكا پرسیار و بەرسڤان ب دوماهیک هات، کو دەرگەهـ بۆ ئامادەبوویان ڤەکر کو ب شێوەیەکێ راستەوخۆ پشکداریێ بکەن و ئەزموونێن خۆ پارڤەبکەن.
وەکو رێزلێنانەک بۆ پشکداریکرنا وان، د. نەبەز ئیبراهیم محەمەد، هاریکارێ سەرۆکێ زانکۆیێ بۆ کاروبارێن قوتابیان، باوەرنامێن رێزلێنانێ پێشکێشی د. سومەیە سەعید خالد و د. یوسف عەلی یاسین کرن.

ئەڤ وۆرکشوپە دگەل پلانا ستراتیژی یا زانکۆیا دهۆک د گونجیت، یا کو پێشینێ ددەتە گەشەپێدانا سامانا مرۆڤی، پشتەڤانیا ساخلەمیا دەروونی، و ئاڤاکرنا ژینگەهەکا ئەکادیمی و ئیداری یا ساخلەم کو ئەدایێ دەزگەهی و رازیبوونا فەرمانبەران زێدە دکەت.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانكۆیێ، ٢٩ـی كانوونا دووێ، ٢٠٢٦

پەیڤێن سەرەکی:
خۆشگوزەرانیا ستافێ زانکۆیا دهۆک
وۆرکشوپا سترێسا کاری ل زانکۆیا دهۆک
سەنتەرێ شیرەتکاریا دەروونی ل زانکۆیا دهۆک
ساخلەمیا دەروونی ل زانکۆیێن ئیراقێ
پرۆگرامێن پشتەڤانیا فەرمانبەران ل زانکۆیا دهۆک