روسیا، تەباخا ٢٠٢٥، نڤیسینگەها راگەهاندنا زانکۆیێ (UNPO) | ب ئارمانجا بهێزکرنا هەڤکاریا ناڤدەولەتی و پێشڤەبرنا جیاوازیا ئەکادیمی، زانکۆیا دهۆک (UOD) پشکداری پرۆگرامەکێ راهێنانێ یێ ئاست بلند بوو کو ژ لایێ زانکۆیا تەکنیکی یا تامبۆڤ یا حکومی (TSTU) ل روسیا، ب هەڤکاریا رێکخراوا ئەکەد بو لێکگۆهورینا رەوشەنبیری د ناڤبەرا عیراق و روسیا دا هاتبوو رێکخستن.

ب نوینه‌راتیا زانکۆیا دهۆک، فەرمانبەرا رێکخەر ل پشکا پێڤاژۆیا بۆلۆنیا و پەرەپێدانا پرۆگرامان، خانم ئاواز محەمەد عومەر، پشکداری د خۆلا راهێنانێ دا کر یا ب ناڤێ "شیانێن کارگێریا گشتی: کارامەیی، زەلالی، و داهێنان"، کو ژ ٣ تا٥ـی تەباخا ٢٠٢٥ـێ هاتبوو ئەنجامدان.

ڤی پرۆگرامى ٣٢ پشکدار ژ سەرانسەرێ عیراقێ کۆمکرن، کو ئەندامێن ستافێ ئەکادیمی یێن زانکۆیان، کارگێر، پسپۆرێن بوارێ ساخلەمیێ و ئەندازیار بخۆڤەگرتن. گەنگەشە ل سەر بوارێن سەرەکی برێڤەچوون کو ب گشتی دگەل دیدگەها ستراتیژی یا زانکۆیا دهۆک و گەشەپێدانا ئەکادیمی یا عیراقێ رێکدکەڤن، ژ وان:

• رێبازێن نوی د رێڤەبرنا گشتی دا
• ستراتیژیەتێن رێڤەبرنا قەیرانان
• پلاندانانا ستراتیژی و سەرکردایەتی
• دەلیڤەیێن وەبەرهێنانێ د خواندنا بلند دا
• بنەمایێن گەشەپێدانا بەردەوام

زێدەباری گەشەپێدانا شیانان، پرۆگرامی رۆیێن نوی یێن هەڤکاریێ د ناڤبەرا زانکۆیا دهۆک و زانکۆیا تەکنیکی یا تامبۆڤ یا حکومی ڤەکرن. هەردوو سازیان ئامادەییا خۆ دەربری بۆ هەڤکاریەکا درێژخایەن د بوارێن وەک:

• دامەزراندنا پەیوەندیێن ئەکادیمی یێن ناڤدەولەتی
• پرۆگرامێن راهێنانێ یێن هەڤپشک بو ستافێ ئەکادیمی و کارگێری

ئەڤ پراکتیکە رەنگڤەدانا پابەندبوونا زانکۆیا دهۆکە ب ناڤدەولەتیکرن، پەرەپێدانا پرۆگرامێن خواندنێ، و گەشەپێدانا شیانان ب ئاوایەکێ رێککەڤتی دگەل پلان و ستراتیژیا وێ یا کو پێشینەییێ ددەتە بەرفرەهکرنا هەڤکاریێ دگەل زانکۆیێن پێشەنگ یێن جیهانێ.

هەڤکاری نە ب تنێ شیان و زانیاریێن ستافێ زانکۆیا دهۆک بلند دکەت، بەلکو پشکداری د گەشەپێدانا ئەکادیمی و دامەزراوەیی یا عیراقێ دا دکەت، رۆلێ زانکۆیێ وەک پرەک د ناڤبەرا هەرێما کوردستانێ، عیراقێ، و جڤاکێ ئەکادیمی یێ ناڤدەولەتی دا بهێز دکەت.

ڤێرە کلیک بکە بۆ دیتنا دیمەنان
نڤیسینگەها راگەهاندنا زانکۆیێ، ٢٧ـی تەباخا ٢٠٢٥ـێ
راپۆرت ژ لایێ: فاطمە محمود علی