زانکۆیا دهۆک | چریا ئێکێ، ٢٠٢٥ | نڤیسینگەها راگەهاندنا زانکۆیێ (UNPO) —

زانکۆیا دهۆک (UOD)، وەکو رێكخەرا سەرەکی یا پرۆژێ TRANSITION یێ بەرنامێ Erasmus+، ب سەرکەڤتیانە ل کۆمبوونا ناڤەراستا ئێکێ یا پرۆژەی ل باژێرێ ڕۆما ل ئیتالیا ل ڕێکەڤتی ٢٠ و ٢١ـی چریا ئێکێ یا ٢٠٢٥ پشكداریكر. ئەڤ کۆمبوونە ژ لایێ ئێکەتیا زانکۆیێن دەریایا ناڤین (UNIMED) ڤە هاتبوو مێهڤانداریکرن.

ئەڤ چالاکیا دوو-ڕۆژی نوینەرێن زانکۆیێن هەڤپشک ژ عیراق، یەمەن، و ئەوروپا کۆمکرن ب مەرەما هەلسەنگاندنا پێشکەڤتنا پرۆژەی و دانانا نەخشەڕێیەکێ بۆ پێنگاڤێن داهاتی یێن بجهئینانا پاکێجێن کاری.

پێشوازی و پەیڤێن سەرەکی

کۆمبوون ب پەیڤا بخێرهاتنێ ژ لایێ پرۆفیسۆر ماریا گراتسیا ڕوسۆ، سەرۆکا زانکویا ناڤدەولەتی یا ڕۆما (UNINT) ڤە دەستپێکر، کو ب گەرمی بخێرهاتنا ئامادەبوویان کر ل دامەزراوا خۆ. ل دویڤ دا، د. دلشاد عەبدولجەبار حەلیم، هاریکارێ سەرۆکێ زانکۆیا دهۆک و رێكخەرێ زانستی یێ پرۆژەی، و د. خیریە ڕساس، سەرۆکا UNIMED، پەیڤێن خۆ پێشکێشکرن.
کۆمبوون ب ئامادەبوونا بەرێز ئەسمەهان عەبدولحەمید ئەلتوقی، بالیۆزا کۆمارا یەمەنێ، برێڤەچوو، کو وێ پابەندیا وەلاتێ خۆ ب بهێزکرنا هەڤپشکیێن پەروەردەیی و چاندی بۆ پشتەڤانیکرنا پرۆسەیا ئاڤاکرنێ ل قۆناغا پشتی شەران دوپاتکر.

پرۆژێ TRANSITION: پاراستنا کەلەپۆرێ کێمینەیان

پرۆژێ "پاراستنا کەلەپۆرێ کەلتووریێ جەستەیی و نەجەستەیی یێ جڤاکێن کێمینەیان ل هەرێما کوردستانا عیراقێ و یەمەنێ" (TRANSITION)، کو ژ لایێ بەرنامێ Erasmus+ یێ ئێکەتیا ئەوروپا ڤە دهێتە پشتەڤانیکرن، ل سەر دوو بنەمایێن سەرەکی کار دکەت: ڕۆلێ پەروەردێ د پێشخستنا ئاشتی و مافێن مرۆڤی دا، و بەرپرسیاریا جڤاکی یا زانکۆیان د پاراستنا کەلەپۆرێ نەتەوەیی دا، ب تایبەت یێ وان جڤاکێن کو تووشی کاریگەریێن جەنگان بووینە.

گەنگەشەکرنا پاکێجێن کاری

د کۆمبوونێ دا، هەڤپشکان پێداچوونەکا تێر و تەسەل ل دۆر پێشکەڤتنا پاکێجێن کاری یێن ب كاركری و یێن بەردەوام کرن و پلان بۆ بجهئینانا ئەرکێن داهاتی هاتنە دانان.
د. ڕەند عەلی حمودی، رێكخەرا پرۆژەی، و خانم زین سەباح بەزاز ژ ڕێڤەبەریا پەیوەندیێن ناڤدەولەتی ل زانکۆیا دهۆک، ب تێر و تەسەلی پاکێجا کاری یا ئێکێ (WP1) کو تایبەتە ب ڕێڤەبرنێ و ژ لایێ زانکویا دهۆک ڤە دهێتە سەرپەرشتیکرن، شڕۆڤەکر.

هەروەسا، پاکێجێن دی یێن کاری هاتنە گەنگەشەکرن، ژ وان ژی: هەلسەنگاندن و نویکرنا پرۆگرامێن خواندنێ (WP2, WP3)، ڕاهێنانا مامۆستا و ستافی (WP4)، تۆڕسازی و هشیاریا گشتی (WP5)، و هەلسەنگاندن و مسوگەرکرنا کواڵیتیێ (WP6). ب تایبەتی تیشک ئێخستە سەر چالاککرنا نێزیک یا پاکێجا کاری یا چارێ و پێنجێ کو دێ گرنگیێ دەنە بلندکرنا شیانان و پشكداریكرنا جڤاکی د پاراستنا کەلەپۆرێ کەلتوری دا.

پێشەنگیا زانکۆیا دهۆک د هەڤکاریا ناڤدەولەتی دا

وەکو رێكخەرا سەرەکی، زانکۆیا دهۆک سەرپەرشتیا گشتی یا ستراتیژی و ئیداری یا پرۆژەیی دکەت. د. دلشاد تەكەز کر کو ئەڤ هەڤکاریە وەکو قۆناغەکا گرنگ دهێتە دیتن د بهێزکرنا پەیوەندیێن ئەکادیمی د ناڤبەرا هەرێما کوردستان، یەمەن، و زانکۆیێن ئەوروپی دا.
سەرکەڤتنا ڤێ کۆمبوونێ ل ڕۆما، ڕۆلێ پێشەنگ و زێدەبوویی یێ زانکویا دهۆک د ڕێڤەبرنا پرۆژێن ناڤدەولەتی دا و پابەندیا وێ ب بکارئینانا پەروەردێ وەکو ئامرازەک بۆ ئاڤاکرنا ئاشتیێ و دۆمداریا كەلتووری نیشان ددەت. ئەڤ دەستپێشخەریە دگەل پلانا ستراتیژی یا زانکۆیا دهۆک (٢٠٢٣–٢٠٣٠) دگونجیت، کو تێدا گرنگی ب هەڤکاریا ناڤدەولەتی، بلندکرنا شیانێن ڤەکۆلینان، و پشکداریا جڤاکی د پاراستنا کەلەپۆری دا دهێتە دان.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانکۆیێ | چریا ئێکێ، ٢٠٢٥
راپۆرت: فاطمه محمود علی