زانکۆیا دهۆک، ٢٢ـی تەباخا ٢٠٢٥ـێ – راگریا ڤەکۆلین و داهێنانێ (DRIN) ل زانکۆیا دهۆک ئێکەمین روینشتنا خۆ یا راوێژکاری ل سەنتەرێ رەوشەنبیری و جڤاکی ئەنجامدا بۆ گەنگەشەکرنا رێکێن باشترکرنا ڤەکۆلینا زانستی ب رێیا بجهئینانا هێلێن ڤەکۆلینێ یێن چارچۆڤەکری.

روینشتن، کو ل رۆژا ٢٠ـی تەباخێ هاتە گێران، ب ئامادەبوونا سەرۆکێ زانکۆیا دهۆک، د. داود سلێمان ئەتروشی، دگەل هاریکارێن سەرۆکی، ئەندامێن جڤاتا زانکۆیێ، و نوینەرێن کۆلیژ، رێڤەبەری، و سەنتەرێن زانستی و ڤەکۆلەران برێڤەچوو. دانوستاندن ل سەر چاوانیا دامەزراندنا چارچووڤەکێ بەردەوام بۆ نایابیا ڤەکۆلینا زانستی بوون، کو زانکۆیا دهۆک دگەل ستانداردێن ئەکادیمی یێن جیهانی هەڤرێز بکەت.

د پەیڤا خۆ یا دەستپێکێ دا، د. داود ئەتروشی دوپاتی کر کو دامەزراندنا راگریا ڤەکۆلین و داهێنانێ پێنگاڤەکا گرنگە د گەشتا ئەکادیمی یا زانکۆیا دهۆک دا. وی گۆت:
"ڤەکۆلین پشکەکا گرنگە ژ پەیاما مە وەک زانکۆ، مل ب ملێ پێگەهاندنا قوتابیێن مە. ب دامەزراندنا ڤێ راگریێ، ئارمانجا مە ئەوە کو کەلتوورەکێ بهێزتر یێ ڤەکۆلینێ پەیدا بکەین، هەروەک زانکۆیێن پێشکەڤتی ل جیهانێ."

د. ئەتروشی پتر دیاركر کو راگری ژ سێ پشکان پێکدهێت، کو هەر ئێک ژ وان چەندین کۆلیژان بخۆڤەدگریت بۆ ئاسانکرنا هەڤکاریێ، رێکخستنا چالاکیێن ڤەکۆلینێ، و بهێزکرنا پەیوەندیێن دناڤبەرا پشکان دا.

ژ لایێ خۆڤە، د. شێرزاد سەبری عەلی، راگرێ راگریا ڤەکۆلین و داهێنانێ، ئارمانجا سەرەکی یا روینشتنێ دیار کر: پێشنیارکرنا هێلێن ڤەکۆلینێ بۆ سالا خواندنێ یا ٢٠٢٥-٢٠٢٦. ئەڤ هێلێن ڤەکۆلینێ دێ وەک تەوەرێن رێنیشاندەر بن بۆ کۆلیژ، پشک، و سەنتەران، کو دێ شیانێ دەتە وان ڤەکۆلینان ب شێوەیەکێ رێکخستیتر، هەڤکارانەتر، و کاریگەرتر ئەنجام بدەن.
د. شێرزاد گۆت: "تەكەزا مە ل سەر وێ چەندێ یە کو مسۆگەر بکەین ڤەکۆلین ل زانکۆیا دهۆک راستەوخۆ بەرسڤا ئاریشێن جڤاکی بدەت و د هەمان دەم دا پشکداریێ د پێشڤەبرنا زانینێ دا بکەت. ب رێیا هێلێن ڤەکۆلینێ، ئەم دشێین خۆ ژ دووبارەبوونێ بپارێزین، هاندانا بابەتێن نوی بکەین، و رێنماییا ڤەکۆلەران بکەین بەرەڤ چارەسەرکرنا ئاریشێن ژیانا واقعی."

ئارمانجێن هێلێن ڤەکۆلینێ ل زانکۆیا دهۆک

زانکۆیا دهۆک ئارمانجێن روون بۆ بکارئینانا هێلێن ڤەکۆلینێ دیار کرینە:

• چارچۆڤەکرنا ڤەکۆلینان د ناڤ تەوەرێن روون دا: رێکخستنا هەولێن ڤەکۆلینێ د ناڤ تەوەرێن زانستی یێن دەستنیشانکری دا.
• کیرکرنا زانینێ: هاندانا خواندنێن تیر و تەسەل ر د بیاڤێن هەلبژارتی دا.
• هەڤرێزی ل گەل دید و پەیاما زانکۆیێ: مسۆگەرکرنا وێ چەندێ کو هەمی ڤەکۆلین پابەندیێن ئەکادیمی و جڤاکی یێن زانکۆیێ نیشان بدەن.
• هاندانا هەڤکاریێ: کومکرنا ڤەکۆلەران د تیمێن ناڤبواری دا بۆ گەهشتنا ئەنجامێن کاریگەر.
• باشترکرنا کوالێتیا ڤەکۆلینێ: بلندکرنا رەسەنی، باوەرپێکرن، و دیاربوونا جیهانی یا ڤەکۆلینێن زانکۆیێ.
• بجهئینانا پێدڤیێن جڤاکی: چارەسەرکرنا ئاریشێن جڤاکی و پشکداریکرن د گەشەپێدانا بەردەوام دا ل هەرێما کوردستانێ و عیراقێ.
• دیتنا بابەتێن نوی یێن ڤەکۆلینێ: خۆدویرکرن ژ دووبارەبوونێ و هاندانا داهێنانێ ب رێیا ڤەکۆلینێن ل سەر بنەمایێ دیتنێ.

پێناسەیا هێلێن ڤەکۆلینێ

هێلێن ڤەکۆلینێ تەوەرێن زانستی یێن دەستنیشانکرینە کو ل ئاستێ زانکۆ، کۆلیژ، یان سەنتەرێن ڤەکۆلینان دهێنە دیارکرن. ئەو وەک نەخشەرێ کار دکەن، رێنماییا ستافێ ئەکادیمی و قوتابیان دکەن بۆ بەرهەمئینانا ڤەکۆلینێن رێکخستی، ب کوالێتیا بلند، و کاریگەر کو پشکداریێ د پێشکەفتنا ئەکادیمی و مفایێ جڤاکی دا بکەن.

پێنگاڤێن دەستنیشانکرنا هێلێن ڤەکۆلینێ

• دیارکرنا پێشینەیێن ڤەکۆلینێ یێن هەر کۆلیژەکێ یان سەنتەرەکی.
• هەڤرێزی ل گەل دید و پەیاما زانکۆیێ و یەکەیێن وێ.
• تەكەزكرن ل سەر پێدڤیێن جڤاکی و ئەولەویاتێن گەشەپێدانێ.
• مان د ناڤ بیاڤێ پسپۆریێ یێ هەر پشکەکێ دا.
• هەلسەنگاندنا شیانێن مرۆڤی و ماددی یێن دامەزراوەیی.
• دەستنیشانکرنا خالێن بهێز و لاواز یێن شیانێن ڤەکۆلینێ.
• نەخشەکرنا پسپۆریێن ئەندامێن دەستەیا وانەبێژیێ و ڤەکۆلەران.
• ل بەرچاڤ وەرگرتنا تاقیگەهـ، ژێدەر، و ژێرخانا بەردەست.

دیتنا پاشەرۆژێ: ڤەکۆلین ب هەڤرێزی ل گەل پلانا ستراتیژی یا زانکۆیێ

زانکۆیا دهۆک پشتراست کر کو ئەڤە ئێکەمین روینشتن بوو ل سەر گەشەپێدانا ستراتیژیا خۆ یا ڤەکۆلینێ. دویڤچوونێن بەردەوام و دەستپێشخەریێن نوی دێ هێنە بجهئینان دا کو رۆلێ زانکۆیا دهۆک وەک زانکۆیەکا پێشەنگ د بیاڤێ ڤەکۆلینێ دا ل هەرێما کوردستانێ و عیراقێ بلند بکەن، و د هەمان دەم دا هەڤکاریێن ناڤدەولەتی بهێز بکەن.

ئەڤ دەستپێشخەریە راستەوخۆ پشتەڤانیێ ل پلانا ستراتیژی یا زانکۆیا دهۆک دکەت: مسۆگەرکرنا وێ چەندێ کو ڤەکۆلین ل زانکۆیێ:

• زەلال و بەرپرسیار بیت بەرامبەر جڤاکێ ئەکادیمی و کومەلگەهـ.
• ل گەل پێدڤیێن ناڤخۆیی و هەرێمی پشکدار بیت.
• نایاب بیت د کوالێتی، باوەرپێکرن، و ناساندنا جیهانی دا.

ب چارچۆڤەکرنا ڤەکۆلینێ د ناڤ هێلێن روون دا، زانکۆیا دهۆک پابەندیا خۆ ب پێشەنگیا ئەکادیمی، گەشەپێدانا بەردەوام، و کاریگەریا جڤاکی بهێز دکەت، کو ب تەمامی ل گەل دیدا وێ یا درێژخایەنە.

بۆ دیتنا دیمەنێن ڤی چالاکیێ، کلیک ل سەر ڤێرە بکە

نڤیسینگەها راگەهاندنا زانکۆیێ، ٢٢ـی تەباخا ٢٠٢٥
راپۆرتکرن: بارین محەمەد ئەحمەد، فاطمە محمود علی
وێنەگرتن: محەمەد عەبدولكەریم تاهر

پەیڤێن سەرەکی:

• ڤەکۆلینێن زانکۆیا دهۆک
• ڤەکۆلینا زانستی ل کوردستانێ
• چارچۆڤێ هێلێن ڤەکۆلینێ ل زانکۆیا دهۆک
• داهێنان و ڤەکۆلین ل عیراقێ
• ستراتیژیا ڤەکۆلینێ د خواندنا بلند دا