زانكويا دهۆك نوینەراتیا عیراقێ دكەت د خۆلا ١٣ـێ یا بەریكانا دادگەها تاوانان یا گریمانەیی یا سەندیكا پارێزەرێن ناڤدەولەتی ل هۆلەندا
زانكويا دهۆك | ١٨ـی خزیرانا ٢٠٢٦ | نڤیسینگەها راگەهاندنا زانكۆیێ (UNPO) —
د دەستكەڤتەكێ گرنگ دا كو ڕەنگڤەدانا ئامادەبوونا ئەكادیمی یا ناڤدەولەتی یا زانكويا دهۆك دكەت، تیمەك ژ كۆلیژا یاسا پشکداری د خۆلا ١٣ـێ یا بەریکانا دادگەها تاوانان یا ناڤدەولەتی یا گریمانەیی یا سەر ب سەندیكا پارێزەرێن ناڤدەولەتی (IBA) كر، ئەوا ل باژێرێ لاهای ل هۆلەندا د ناڤبەرا ١٢ تا ١٩ـی خزیرانا ٢٠٢٦ـێ هاتیە ئەنجامدان. ئەڤ بەریکانە ژ لایێ سەنتەرێ غروتیوس بۆ خواندنێن یاسایی یێن ناڤدەولەتی ل زانكۆيا لایدن و ب هەڤپشكی دگەل سەندیكا پارێزەرێن ناڤدەولەتی (IBA) و ب پشتەڤانیا دادگەها تاوانان یا ناڤدەولەتی (ICC) دهێتە ڕێكخستن.
نوینەراتیا زانكۆيا دهۆك ل سەر سەكۆیەكا یاسایی یا ناڤدەولەتی
شاندێ زانكويا دهۆكێ پێكهاتبوو ژ قوتابیێن کۆلیژا یاسا و ڕاهێنەرێن ئەكادیمی كو نوینەراتیا زانكۆیێ كر د ئێك ژ بناڤودەنگترین بەریکانەیێن یاسایا ناڤدەواەتی دا ل جیهانێ. ئەڤ چالاكیە قوتابیێن زیرەك و سەركەڤتی یێن یاسایێ ژ زانكۆیێن جودا جودا یێن جیهانێ كۆم دكەت دا كو چاڤلێكرنا ڕێكارێن دادبینیێ ل بەردەم دادگەها تاوانان یا ناڤدەولەتی بكەن، و شیانێن خۆ یێن پاراستنێ (داكۆكیكرنێ) یێن پێشكەڤتی، ڤەكۆلینێن یاسایی، و شیانێن هۆلا دادگەهێ پێشبێخن.
شاندێ زانكويا دهۆكێ پێكهاتبوو ژ د. ئەڤین خالید عەبدولڕەحمان، راگرا كۆلیژا یاسا، د. هوشیار جەنگیر عەگید، د. ئاری عارف عەبدولعەزیز، و عەممار جاسم ئەحمەد، ئەوێن كو دگەل قوتابیێن پشكدار مەردان عەبدولڕەزاق عەلی و شاناز شەعبان محەمەد بوون و ڕاهێنان پێ كرین د دەمێ هەڤڕكیێ دا ل لاهای. تیمێ نوینەراتیا كۆلیژا یاسا و زانكويا دهۆك كر د هەلكەڤتەكا ناڤدەولەتی یا ناڤدار دا یا تایبەت ب یاسایا تاوانان یا ناڤدەولەتی و داكۆكیكرنا یاسایی.
بلندكرنا ئاستێ خواندنا یاسایی و شارەزاییا نێودەولەتی
ئەڤ هەڤڕكیە دەلیڤەیەكێ ددەتە پشكداربوویان دا كو تێگەهشتنا خۆ بۆ یاسایا تاوانان یا ناڤدەولەتی و میكانیزمێن دادپەروەریا ناڤدەولەتی كویرتر لێ بكەن، د هەمان دەم دا تێكەلیێ دگەل شارەزایێن یاسایی، ئەكادیمیان و قوتابیێن وەلاتێن جودا جودا بكەن. دیسان پشكداران شارەزاییەكا ئێكسەرا و ڕاستەوخۆ ب دەست ڤە دئینن دگەل دامەزراوەیێن جیهانی یێن پێشەنگ یێن كو ل لاهای نە، ژ وان ژی دادگەها تاوانان و ڕێكخراوێن دی یێن یاسایی یێن جیهانی.
پشتەڤانیكرنا دیدا ستراتیژی یا زانكويا دهۆك
ئەڤ پشكداریە هەڤتەریبە دگەل پلانا ستراتیژی یا زانكويا دهۆك (٢٠٢٣-٢٠٣٨)، ب تایبەتی پێشینەیێن وێ یێن گرێدای ب جیهانیبوونا زانكۆیێ، سەركەڤتنا قوتابیان، پشكداریا جیهانی، و فێربوونا ئەزموونی. ب ڕێكا پشكداربوونێ د هەڤڕكیێن ئەكادیمی یێن ناڤدەولەتی دا، زانكويا دهۆك بەردەوامە د دابینكرنا دەلیڤەیان دا بۆ قوتابیان دا كو شیانێن خۆ یێن پیشەیی پێشبێخن، تێگەهشتنا د ناڤبەرا جوداهیێن چاند و كەلتۆران دا بهێز بكەن، و بەرنگاری ئاستەنگێن یاسایی یێن جیهانی یێن سەردەم ببن.
پێشخستنا نایابیێ د خواندنێن یاسایی دا
پشكداریا كۆلیژا یاسایێ تیشكێ دئێخیتە سەر پێگێربوونا زانكويا دهۆك بۆ پپێگەیاندنا پیشەگەرێن پاشەڕۆژێ د بیاڤێ یاسایێ دا، دا كو بشێن پشكداربن د سیستەمێن یاسایی یێن نیشتمانی و ناڤدەولەتی دا. ئەڤ جۆرە ئەزمۆنە هزرا رەخنەیی یا قوتابیان، شیانێن داكۆكیكرنێ، و تێگەهشتنا یاسایا ناڤدەولەتی زێدەتر لێ دكەن، د هەمان دەم دا ناڤودەنگیا زانكۆیێ وەك دامەزراوەیەكا پێشەنگ بۆ خواندنا بلند ل هەرێما كوردستانێ و عیراقێ ب هێزتر لێ دكەن.
نڤیسینگەها راگەهاندنا زانكۆیێ – ١٨ـی خزیرانا ٢٠٢٦
ڕاپۆرت: فاطمە محمود عەلی