هەولێر | 16ـى شواتا 2026 | نڤيسينگەها راگەهاندنا زانكۆيێ (UNPO) —

ئەكاديميێن زانكۆيا دهۆك پشكدارى د ووركشۆپەكا هەرێمى دا كر ل هەولێرێ، تايبەت ب بهێزكرنا پاراستنا شوينواران ب رێكا بەڵگەكرنا ديجيتالى و سيستەمێن داتايێن ئێكگرتى. ئەڤ چالاكيە هاتە رێكخستن ب سەرپەرشتيا رێڤەبەريا گشتى يا شوينوار و کەلەپۆری ل هەرێما كوردستانێ، ب هەماهەنگى دگەل دەستپێشخەريا پرۆژەيێ (EAMENA) يێ ناڤدەولەتى، كو ئارمانج ژێ ديجيتالكرنا شوينوارێن کەلەپووری يە ل دەڤەرێ.

نوينەراتيا زانكۆيا دهۆك ژلايێ د. ژيار سديق رەمەزان، سەرۆكا پشكا شوينواران، و د. شيرين يونس، سەرۆكا پشكا پلاندانانا شاران، ڤە هاتە كرن. د ووركشۆپێ دا بەرێز كێفى مستەفا، رێڤەبەرێ گشتى يێ شوينوار و کەلەپۆری، دگەل بەرپرسێن کەلەپۆری ژ دامەزراوەيێن حكومەتا هەرێما كوردستانێ و سەرۆكێن پشكێن شوينواران ژ زانكۆيێن دهۆك، هەولێر و سلێمانيێ ئامادەبوون.

وۆركشۆپ يا كو ل 10ـى شواتێ هاتبوو ئەنجامدان ل ژێر ناڤونيشانێ "بكارئينانا داتابەيس و ئەپليکەيشنا مۆبايلێ بۆ تۆماركرنا شوينوارێن مەترسى ل سەر"، تەكەزى ل سەر بهێزكرنا شيانێن دامەزراوەيى كر بۆ بەڵگەكرن و پاراستنا شوينوارێن کەلەپۆری. پشكداران راهێنانێن پراكتیكى وەرگرتن ل سەر دروستكرن و برێڤەبرنا داتابەيسەكا نيشتيمانى يا ئێكگرتى بۆ شوينواران، ب مەرەما بهێزكرنا پاراستنا کەلەپۆری ب رێكا تۆڕێن ديجيتالى يێن رێكخستی.

پشكداريا زانكۆيا دهۆك رەنگڤەدانا رۆلێ وێ يێ كاريگەرە د پێشئێخستنا پاراستنا کەلەپۆرێ رەوشەنبيرى، پشتەڤانيكرنا وەرچەرخانا ديجيتالى د ڤەكۆلينێن شوينوارى دا، و پێشكێشكرنا شارەزايێن ئەكاديمى بۆ دەستپێشخەريێن هەرێمى يێن كو ناسنامەيا ديرۆكى يا كوردستانێ دپارێزن.

16ـى شواتا 2026 | نڤيسينگەها راگەهاندنا زانكۆيێ (UNPO)

راپۆرت: فاطمە محمود عەلی