زانکۆیا دهۆک | تیرمەها ٢٠٢٦ | نڤیسینگەها ڕۆژنامەڤانی یا زانکۆیێ (UNPO) – سەنتەرێ خواندنێن ئاشتی و چارەسەرکرنا ململانێ ل زانکۆیا دهۆک (UOD)، ب هەماهەنگی دگەل فیدراسیۆنا جیهانی یا لۆتەری (LWF) ل عیراقێ، وۆرکشۆپەکێ دوو ڕۆژی ل ژێر ناڤونیشانێ

"پێشئێخستنا شیانێن چالاکڤانێن سۆشیال میدیایێ بۆ نڤێسینێ ل سەر کێشەیێن مافێن مروڤی و پاراستنا هەمەجوریێ ل پارێزگەها دهوکێ" ڕێکخست. ئەڤ وۆرکشۆپە ل ڕۆژێن ٨ تا ٩ـی تیرمەها ٢٠٢٦ـێ بڕێڤەچوو، و تێدا کۆمەکا ڕۆژنامەڤان و چالاکڤانێن سۆشیال میدیایێ پشکدار بوون.

ئەڤ وۆرکشۆپە کو ژ لایێ ڕاهێنەر (خدر کالۆ عەلی) ڤە هاتە بڕێڤەبرن، ئارمانج ژێ بهێزکرنا تێگەهشتنا پشکداران بوو بۆ بنەمایێن مافێن مرۆڤی، باشترکرنا شیانێن وان یێن پیشەیی د نڤیسینێ دا ل سەر پرسێن مافێن مرۆڤی، و پێشڤەبرنا پراکتیکێن راگەهاندنا بەرپرسیار کو پشتەڤانیێ ل هەمەجۆریێ، ئێکگرتن و پێکڤەژیانا ئاشتیانە د ناڤ جڤاکی دا بکەت.

د دەمێ ڕوینشتنان دا، پشکداران گەنگەشە ل سەر بنەمایێن سەرەکی یێن مافێن مرۆڤی کر، کو ئەڤە ماف و ئازادیێن گەردوونینە و بۆ هەر تاکەکی هاتینە مسۆگەرکرن بێی ڕەچاوکرنا ڕەگەز، نەتەوە، زمان، ئایین، یان هەر پلە و پێگەهەکێ دی.

د دانوستاندنان دا تیشک هاتە ئێخستن سەر پۆلێن سەرەکی یێن مافێن مرۆڤی، ژ وان ژی مافێن مەدەنی و سیاسی، مافێن ئابووری و جڤاکی، و مافێن كەلتۆری. د هەمان دەم دا، جەخت ل سەر چەمکێن سەرەکی هاتە کرن وەکو مافێ ژیانێ، ئازادیا ڕادەربڕینێ، یەکسانی ل هەمبەر یاسایێ، ئازادیا باوەریێ، مافێ پەروەردە و خواندنێ، چاڤدێریا تەندروستی، کارکرن، پشکداریا كەلتۆری، و مافێ ژیانێ د ژینگەهەکا پاقژ و دۆمدار دا.

هەروەسا وۆرکشۆپێ جەخت ل سەر وێ چەندێ کر کو ڕێزگرتن ل کەرامەتا مرۆڤی بنەمایێ هەمی مافێن مرۆڤی یە. پشکداران باس ل ڕۆلێ گرنگ یێ ڕۆژنامەڤانان و چالاکڤانێن سۆشیال میدیایێ کر د پێشڤەبرنا هشیاریا گشتی، زێدەکرنا لێبۆردەییێ، بەرەنگاربوونا جوداکاریێ، و هاندانا پێکڤەژیانا ئاشتیانە ب ڕێیا ناڤەڕۆکەکا ڕاگەیاندنێ یا ئەخلاقی و بەرپرسیارانە.

ئەڤ دەستپێشخەریە ڕەنگڤەدانا پێگیرییا بەردەوام یا زانکۆیا دهۆک یە بۆ پێشئێخستنا پەروەردەیا مافێن مرۆڤی، پێشڤەبرنا ئاڤاکرنا ئاشتیێ و پشکداریا جڤاکی، و هەروەسا پشتەڤانیکرنا ئارمانجێن پلانا خۆ یا ستراتیژی (٢٠٢٣–٢٠٣٨) ب ڕێیا وان هەڤپەیمانی و هەماهەنگیان یێن کو پشکداریێ د ئێکگرتنا جڤاکی و گەشەپێدانا دۆمدار دا دکەن.

بۆ دیتنا وێنەیان ڤێرە کلیک بکە

نڤیسینگەها راگەهاندنا زانکۆیێ (UNPO)، تیرمەها ٢٠٢٦
ڕاپۆرت ژ لایێ: بارین محەمەد ئەحمەد
وێنە: محەمەد ع. تاهر