د پێنگاڤەکا مرۆڤایەتی یا بوهادار دا، ئەڤرۆ رێکەڤتی ٣ـی شوباتێ ٢٠٢٦، ل سەرۆکاتیا زانکۆیا دهۆک، خانم مۆنا کزلخان، رێڤەبەرا کارگێری و بسپۆرا رێڤەبرنا ساخلەمیێ ل کلینیکا ناڤدارا ئەلمانی MEDICLIN، پشتەڤانیەکا دارایی ب گوژمێ ١٠،٠٠٠ یۆرۆیانپێشکێسی کلینیکا سنوونێ یا سەر ب پەیمانگەها چارەسەریا دەروونی و تراومایێ (IPP) ڤە ل زانکۆیا دهۆک کر. چەکێ پشتەڤانیێ ب فەرمی ل نڤیسینگەها سەرۆکاتیا زانکۆیێ، ب ئامادەبوونا پ. د. داود سلێمان ئەتروشی، سەرۆکێ زانکۆیا دهۆک، پ. د. یان ئیلهان کزلهان، راگرێ پەیمانگەهێ، و د. بوهار عیسا، هاریکارا راگری، هاتە رادەستکرن.

دهێتە زانین کو ئەڤ گوژمێ پارەی د چارچۆڤێ کۆنسێرتەکا خێرخوازی یا "کۆما ئامەد" دا ل رێکەڤتی ٢٩ـی چریا دووێ ٢٠٢٥ ل کۆچکا شاهانە یا باژێرێ شتوتگارت ل ئەلمانیا هاتیە کۆمکرن، ب مەرەما پشتەڤانیکرنا وان قوربانیێن دەستێ تیرۆرێ یێن کو سەرەدانا کلینیکا سنوونێ دکەن بۆ وەرگرتنا چارەسەریا دەروونی. د پەیڤەکێ دا، خانم مۆنا کزلهان پەیاما مرۆڤایەتی یا ل پشت ڤێ دەستپێشخەریێ دیار کر، ئەوژی " ئەم هەوە ژبیر ناکەین".

ل دویماهیێ، پ. د. داود سلێمان ئەتروشی، ب ناڤێ زانکۆیا دهۆک، سوپاسیەکا گەرم ئاراستەی خانم مۆنا کر و ئاماژە ب وێ یەکێ دا کو ئەڤ کریارە جهێ رێزگرتن و پێزانینەکا مەزنە. و دیارکر کو ئەڤ دەستپێشخەریە نە بتنێ پشتەڤانیەکا ماددی یە، بەلکو پەیامەکا بهێزا مرۆڤی و هەڤسۆزیێ یا گەلەک ب رێز و بوهایە.

.

راگەهاندنا زانکۆیا دهۆک؛ ٣ـی شوباتێ ٢٠٢٦
وێنە: محەمەد عەبدولکەریم، عەلی حەبیب