زانکۆیا دهۆک، ٣٠ـی کانوونا دووێ ٢٠٢٦ | نڤیسینگەها ڕاگەهاندنا زانکۆیێ (UNPO) —

زانکۆیا دهۆک، ب ڕێکا کۆلیژا پزیشکی، سێیەمین کۆربەنێ پزیشکی یێ هەڤپشک ب هەڤکاری دگەل کۆمەڵەیا پزیشکێن گولچیسک و میزەڕۆیێ یا کوردستانێ (تایێ دهۆک) و کۆمەڵەیا پزیشکێن ژنان و زارۆکبوونێ یا کوردستانێ (تایێ دهۆک)، و ب پشکداریا کۆمپانیا ئەسینۆ فارما (Acino Pharma) ساز کر. ئەڤ کۆربەندە ل ڕۆژا ٢٩ـی کانوونا دووێ، ل سەنتەرێ کۆنفرانسان ل زانکۆیا دهۆک هاتە ئەنجامدان و تێدا کۆمەکا پزیشکێن پسپۆر و ئەکادیمی بەرهەڤبوون بۆ گەنگەشەکرنا ئاڵنگاری و پێشهاتێن نوی د وارێ نەخۆشیێن گولچیسک و میزەڕۆیێ و نەخۆشیێن ژنان دا.

د ڤی كۆربەندی دا، کۆمەکا دیار یا پسپۆران ژ بوارێن میزەڕۆیێ وژنان و زارۆكبوونێ، پزیشکیا تاقیگەهێ و ڤەكۆلینێن کلینیکی پشكداربوون. بابەتێن هاتینە پێشکێشکرن گرێدای حالەتێن پزیشکی یێن ڕاستەقینە و پراکتیکێن نوی بوون، ژ وان ژی ڕێگرتن ل فیستوڵا میزڵدان و زێیێ (Vesicovaginal fistula)، چارەسەرکرنا نەزایۆکیێ و هەوکرنێن دووبارە دبن یێن کۆئەندامێ میزێ، ڕاپۆرتێن ئالۆز یێن كەیسێن میزەڕۆیێ و ژنان، پێشڤەچوونێن دەستنیشانکرنا تاقیگەهی و ڕێکێن چارەسەریێ یێن هەڤگرتی. هەمەڕەنگیا پەیڤدار و بابەتان گرنگیا هەڤکارییا د ناڤبەرا تایبەتمەندیێن جودا دا بۆ چارەسەرکرنا ئاریشەیێن تەندروستی یێن ئالۆز دیار دکەت.

د پەیڤا دەستپێكێ دا، د. دلدار حاجی موسا، ڕاگرێ کۆلیژا پزیشکی، تەکەزی ل سەر وێ یەکێ کر کو کۆمبوونێن زانستی یێن هەڤپشك باندۆرەکا ئەرێنی یا بهێز ل سەر پراکتیکا کلینیکی هەیە، و ئاماژە ب وێ چەندێ دا کو هەڤکاری د ناڤبەرا پسپۆریێن ژنان و میزەڕۆیێ دا ڕێکێ ددەتە گەنگەشەکا بەرفرەهتر بۆ حالەتێن هەڤپشك و دبیتە ئەگەرێ باشترکرنا چاڤدێریا نەخۆشان. پشتی پەیڤا ڕاگری، نوینەرێن کۆمەڵەیا میزەڕۆیێ یا کوردستانێ و کۆمەڵەیا ژنان و زارۆكبوونێ یا کوردستانێ پەیڤێن کۆمەڵەیێن خۆ پێشکێش کرن، و تەکەزی ل سەر پابەندبوونا خۆ بۆ هەڤپشكیا ئەکادیمی دگەڵ زانکۆیا دهۆک و پێشئێخستنا زانستێ پزیشکی ب ڕێیا چالاکیێن زانستی یێن هەڤپشك کر.

بەرنامەیێ زانستی ژ دوو روینشتنان پێکهاتبوو کو تێدا چەندین بابەتێن کلینیکی هاتنە باسکرن، ژ وان ژی: چارەسەریا نەزۆکیێ، هەودانێن دووبارە یێن جۆگا میزێ (Recurrent UTI)، خۆپاراستن ژ فیستوڵا د ناڤبەرا میزڵدانک و مالزارۆکێ دا (Vesicovaginal fistula)، ڕاپۆرتێن كەیسێن ئاڵۆز، پشکنینێن تاقیگەهێ، و ڕێکێن نوی یێن چارەسەریێ. ئەڤ چالاکیە بوو دەلیڤەیەک بۆ ئاڵوگۆڕکرنا پێزانینێن پیشەیی و فێربوون ل سەر بنەمایێ کەیسان و گەنگەشەیا هەڤپشک، کو دبيتە ئەگەرێ پێشڤەبرنا فێربوونا پزیشکی و پراکتیزەکرنا کلینیکی.

ئەڤ کۆربەندە ب ٣ خاڵێن فێربوونا دۆمدار (CME/CAD) هاتبوو باوەرپێکرن، کو گرنگیا وێ د پشتەڤانیکرنا فێربوونا دۆمدار و ستانداردێن پیشەیی د کەرتێ ساخلەمیێ دا دیار دکەت.

بۆ دیتنا وێنەیان ڤێرە کلیک بکە

نڤیسینگەها ڕاگەهاندنا زانکۆیێ (UNPO)، ٣٠ـی کانوونا دووێ ٢٠٢٦
راپۆرت: فاطمە محمود علی
فۆتۆ: محەمەد عەبدولکەریم تاهر