زانکۆیا دهۆك، 8ـی خزیرانا 2026 | نڤیسینگەها راگەهاندنا زانکۆیێ (UNPO)

د دەمەکێ دا کو قوتابی و ئەندامێن دەستەیا مامۆستایان پێکڤە كەیفخۆشن ب دەستکەڤتێن گەرا سالا 2025-2026، کۆلیژا زمانان ل زانکۆیا دهۆك ب سەربلندی ڤە قۆناغەکا نوی د ئامادەکرنا دەرچوویان دا تۆمار دکەت، ئەڤێن کو دێ پشکداریێ د پەروەردە، پەیوەندیکرن، وەرگێڕان، و ئالوگۆڕا رەوشەنبیری دا ل کوردستانێ و ژ دەرڤەی وێ کەن.

دەربارەی کۆلیژێ

کۆلیژا زمانان ل زانکۆیا دهۆك ب فەرمی ل سالا 2016 هاتە دامەزراندن دەمێ کو پشکێن زمانێ ئینگلیزی، وەرگێڕان، و زمانێ کوردی ژ کۆلیژا زانستێن مرۆڤایەتی هاتنە جوداکرن بۆ پێکئینانا بەرێ بنیاتی یێ کۆلیژا نوی. لێ، رەهێن ڤان پشکان بۆ گەلەكی بەریا وی دەمی ڤەدگەڕن. پشکا زمانێ کوردی بۆ ئێکەم جار د کۆلیژا ئادابێ دا ل سالا 1994 هاتە ڤەکرن، پاشان پشکا زمان و ئەدەبێ ئینگلیزی ل سالا 1995، و پشکا وەرگێڕانێ ل سالا 2010 هاتە دامەزراندن.

د ماوێ دوو سالێن بۆری دا، پشکا زمانێ عەرەبی و پشکا زمانێ فارسی ژی هاتنە زێدەکرن، کو پتر بوارێ ئەکادیمی و رەوشەنبیری یێ کۆلیژێ بەرفرەهتر کر.

ئارمانجا کۆلیژێ زمانێن ئینگلیزی، کوردی، فارسی، و عەرەبی بێخیتە د پرۆسەیا خواندنێ دا و قوتابیێن خودان شیان د بوارێن وەرگێڕان، وەرگێڕانا زارەکی، و پەروەردێ دا دەربێخیت، ل گەل بەردەوامبوونێ ل سەر بەرفرەهکرنا ژمارەیا زمانان بۆ پڕکرنا پێدڤیێن جیهانەکا کو رۆژ ب رۆژ پتر پێکڤە دهێتە گرێدان.

پڕۆگرامێن ئەکادیمی

کۆلیژا زمانان بزاڤێ دکەت ژینگەهەکا ئەکادیمی یا پێشکەڤتی ب رێیا پەروەردەیەکا نایاب و پڕۆگرامێن خواندنێ یێن جودا دروست بکەت.

ل سالا 2017، کۆلیژێ پڕۆگرامێ ماستەرێ د (TESOL) دا راگەهاند، پاشان پڕۆگرامێ دکتۆرایێ د زمانەڤانیا پراكتیكی و وەرگێڕانێ دا ل سالا 2020 راگەهاند بۆ پڕکرنا پێدڤیێن زێدەبووی بۆ مامۆستایێن خودان شیان یێن زمانێ ئینگلیزی ل زانکۆیێ.

ل نۆكە دا کۆلیژ باوەرنامەیا بەکالۆریۆسێ د ڤان بواران دا پێشکێشدکەت:

* زمان و ئەدەبێ ئینگلیزی

* زمان و ئەدەبێ کوردی

* وەرگێڕان

ل گەل پڕۆگرامێن خواندنا بلند د:

* TESOL

* زمانەڤانی

* وەرگێڕان

* زمانێ کوردی

زێدەکرنا پشکێن عەرەبی و فارسی د ڤی دەمێ نێزیک دا، دیتنا کۆلیژێ بۆ بەرفرەهکرنا خواندنا زمانان و پەیوەندیێن د ناڤبەرا کەلتۆرێن جودا دا نیشا ددەت.

دەرچوویێن گەرا سالا خواندنێ 2025–2026

ل نۆكە دا، کۆلیژا زمانان پتر ژ 900 قوتابیان ب خۆ ڤە دگریت. ئەڤ سالە، 172 قوتابی ژ پشکێن زمانێ ئینگلیزی، زمانێ کوردی، و وەرگێڕانێ دێ دەرچن و قۆناغەکا نوی د ژیانا خۆ یا ئەکادیمی و پیشەیی دا دەستپێکەن.

وێنەگرتنا دەرچوونێ ب هەستەکێ سەربلندی ڤە هاتە گێڕان ل دەمێ کو قوتابیان كەیفخۆشیا خۆ دەربڕی ب دوماهی هاتنا سالێن بزاڤ و خواندن و گەشەکرنا کەسایەتی.

دەلیڤەیێن کاری یێن پاشەڕۆژێ

ب رێیا وانەیێن زمانی، زمانەڤانی، ئەدەب، وەرگێڕان، و رێبازێن وانەگوتنێ، قوتابی شیانێن خۆ یێن خواندن، نڤیسین، گوهداریکرن، و پەیڤینێ ب هێز دکەن و د هەمان دەم دا پشکداریێ د چالاکی یێن دەرڤەی پڕۆگرامی دکەن کو پشتەڤانیا گەشەکرنا پیشەیی دکەن.

دەرچوویێن کۆلیژێ کۆمەکا بەرفرەهـ ژ دەلیڤەیێن کاری هەنە، ژ وان ژی:

* مامۆستا و وانەبێژ ل قوتابخانە و زانکۆیان

* وەرگێڕێن پیشەیی و زارەکی د کەرتێن گشتی و تایبەت دا

* پسپۆرێن راگەهاندن و پەیوەندی یێن گشتی

* رۆژنامەڤان و ئاڤاکەرین ناڤەڕۆکێ

* کارمەند د رێکخراوێن ناڤدەولەتی و نەحکومی دا

* پسپۆرێن گەشتوگوزار و ئالوگۆڕا رەوشەنبیری

* کارسازێن کو پەیمانگەهێن زمانان، ئاژانسێن وەرگێڕانێ، پڕۆژەیێن چاپکرنێ، یان کارێن پەیوەندیێن دیجیتاڵی دادمەزرینن

دەرچووی باس ل گەشتا خۆ دکەن

یوسف شمال حبیب

پشکا زمانێ کوردی

دەربارەی چوار سالێن خۆ ل زانکۆیا دهۆك، یوسفی ئەزمۆنا خۆ وەکو گەشتەکا فێربوون و گەشەکرنێ وەسف کر.

"پشتی چوار سالێن خواندن و فێربوونێ، ل دوماهیێ ئەم گەهشتینە ئەو ئارمانجا مە بەری نۆكە خەون پێڤە ددیت. ئەڤ سالە پڕ بوون ژ زانین، پێشخستنا خۆیی، و گەشەکرنا کەسایەتی. گەلەك ئاستەنگ د ڤێ رێیێ دا هەبوون، لێ چ جاران نەبوونە رێگر ل پێشیا هیڤی یێن مە."

بۆ پاشەڕۆژێ، یوسف هێڤیدارە کو بەردەوام بیت د خزمەتکرن و پێشخستنا زمانێ کوردی دا ب رێکا پەروەردە و چالاکی یێن رەوشەنبیری.

شیرەتا وی بۆ قوتابیێن داهاتی ئەڤەیە:

"د پێگیر بن ب ئارمانجێن خۆ ڤە، مفای ژ هەمی دەلیڤەیێن فێربوونێ وەربگرن، و رێزێ ل پشتەڤانیا مامۆستا و خێزانا خۆ بگرن د درێژیا گەشتا خۆ یا ئەکادیمی دا."

بوتان عبدالله حسن

پشکا وەرگێڕانێ

بوتانی تیشك ئێخستە سەر گەشەکرنا ئەکادیمی و کەسایەتی د ماوێ سالێن خواندنا خۆ دا ل کۆلیژێ.

"دەمێ ئەز هزرا خۆ د سالێن زانکۆیێ دا دکەم، ئەز یێ سەربلندم ب وێ گەشەکرنێ ل گەل شارەزابوون د پیشەیا خۆ دا و دروستکرنا پەیوەندیێن بەردەوام. ئەڤ گەشتە قۆناغەکا پڕ ئاستەنگ و د هەمان دەم دا مفا بەخش بوو، کو ب راستD ئەز بۆ جیهانا پیشەیی ئامادە كریم."

پشتی دەرچوونێ، بوتان هێڤیدارە د بوارێ وەرگێڕان و پەیوەندیێن ناڤدەولەتی دا کار بکەت، ل وێرێ دێ شێت وان شیانان ب کار بینیت یێن کو ل زانکۆیێ پێشخستین.

پەیاما وی بۆ قوتابیێن داهاتی ئەڤەیە:

"مفا ژ هەمی دەلیڤەیان وەربگرن بۆ فێربوون، راهێنان، و دروستکرنا پەیوەندیان. ئەو ئەزمۆنێن هوین ل زانکۆیێ ب دەست ڤە دئینن دێ پاشەڕۆژا هەوە دروست کەن ب شێوەیەکی کو رەنگە هوین پێشبینی نەکەن."

وەلید علی یوسف

پشکا زمانێ ئینگلیزی

وەلیدی ئەزمۆنا خۆ یا زانکۆیێ وەکو ئەزمۆنەکا پڕ ژ وانەیێن ب بها و بیرهاتنێن نەهێنە ژبیرکرن وەسف کر.

"د ڤان چوار سالان دا، ئەز د گەلەك ئەزمۆنێن جوان و ب زەحمەت دا دەرباز بوویم کو ئەز ب هێزتر كرم. هەر پێنگاڤەك پڕ بوو ژ هیڤی، فێربوون، و گەشەکرنا کەسایەتی."

بۆ پاشەڕۆژێ، وەلید یێ ب جۆشە کو دەست ب قۆناغا داهاتی یا گەشتا خۆ یا پیشەیی بکەت و هێڤیدارە بەردەوام بیت ل سەر پێشخستنا شیانێن خۆ یێن زمان و پەیوەندیکرنێ.

"ئەڤرۆ نە ب تنێ دوماهیا خواندنا منە، بەلکو دەستپێکا قۆناغەکا نویە د ژیانا من دا. ئەز یێ سەربلندم کو پشكەك بووم ژ ڤێ زانکۆیێ، و ئەڤ بیرهاتنە دێ هەردەم ل گەل من مینن."

بۆ قوتابیێن نوی، وی ئەڤ شیرەتە دا:

"باوەری ب خۆ هەبن، ب بەردەوامی کار بکەن، و کەیفێ ب ڤێ گەشتێ ببن. ئەو ئاستەنگێن ئەڤرۆ دهێنە پێشیا هەوە دێ بنە ئەو دەستکەڤتێن کو سوبەهی هوین دێ كەیفخۆشیێ پێبەن."

دەستخۆشی ل دەستکەڤتان و ب هیڤیا بۆ پاشەڕۆژێ

دەرچوونا گەرا سالا 2026 نە ب تنێ سەرکەڤتنەکا ئەکادیمی یە، بەلکو دەستپێکا دەلیڤەیێن نوی یە بۆ نڤشەکێ دەرچوویان کو ب شیانێن زمانی، رەوشەنبیری، و پیشەیی هاتینە ئامادەکرن کو د ڤێ جیهانا بێکڤە گرێدایی یا ئەڤرۆ دا گەلەك ب بها نە.

زانکۆیا دهۆك پیرۆزباهیێ ل هەمی دەرچوویێن کۆلیژا زمانان دکەت و هیڤیا سەرکەڤتنێن بەردەوام د ژیانا وان یا پیشەیی و ئەکادیمی دا بۆ دخوازیت.

ئەم داخوازێ ژ دەرچوویان، قوتابیێن نوی، خێزان و هەڤالان دکەین کو تەماشەی گەلەرییا وێنەیێن دەرچوونێ بکەن و كەیفخۆشبن ب دەستکەڤتێن کۆلیژا زمانان گەرا سالا 2026.

ڤێرە کلیک بکە بۆ دیتنا وێنەیێن دەرچوونێ

نڤیسینگەها راگەهاندنا زانکۆیێ، 8ـی خزیرانێ 2026

راپۆرت ژ لایێ: فاطمە محمود عەلی، هوگر نەجم عەبدوللا

وێنەگرتن: عەلی حەبیب حەبیب، محەمەد ع. تاهر، هەرمان جانگیر ئەحمەد، مێهڤان محەمەد سالح