سەنتەرێ خواندنێن ئاشتیێ و چارەسەركرنا ململانێ ل زانكۆیا دھۆك، پیشانگەھەكا دەلیڤێن كاری ل قەزا سێمێلێ رێكئێخست، كو پتر ژ ٣٠ كۆمپانی و رێكخراوێن ناڤدەولەتی و ناڤخۆیی و خودان كار تێدا پشكداربوون. پیشانگەھا دەلیڤێن كاری كو ل ھۆلا رێڤەبەریا لاوان ل قەزا سێمێلێ ھاتیە ئەنجامدان، وەك سەكویەكی بۆ قوتابی و تاكێن جڤاكی بۆ پەیوەندیكرنێ ل گەل خودان كاران و پەرەپێدانا ھەڤپشكیێن د ناڤبەرا زانكۆیا دھۆك و كەرتێ تایبەت بوو.

پێشانگەھ ب ئامادەبوونا سەرۆكێ زانكۆیا دھۆك، د. داود سلێمان ئەتروشی ھاتە ئەنجامدان، كو تەكەز ل سەر پێگیریا زانكۆیا دھۆك ب تژیكرنا ڤلاھیا د ناڤبەرا ناڤەندێن ئەكادیمی و پیشەسازیێ دا كر، ھەروەسا گوت "سەنتەرێ خواندنێن ئاشتیێ و چارەسەركرنا ململانێ ھەولێن مەزن ئەنجامددەت بۆ گرێدانا قوتابیێن مە ب خۆدان كاران ڤە، دیسان پێدانا وان ب دەلیڤە و سەربوورێن كەتواری. زانکۆیا دهۆک یا بەردەوامە ل سەر بهێزترکرنا پەیوەندیان ل گەل کەرتێ تایبەت بۆ دابینکرنا دەلیڤەیێن کاری بۆ دەرچوویان".

پیشانگەھ ب سەرپەرشتیا ھاریكارێ سەرۆكێ زانكۆیا دھۆك بۆ كاروبارێن كارگێری و دارایی، د. دلشاد عەبدولجەبار حەلیم، ھاتە ئەنجامدان، كو بھایێ پیشانگەھێ وەك پرۆژەكێ زانكۆیێ كو تەكەزێ ل سەر جڤاكی دكەت بەرجەستەكر، دیسان د پەیڤا خۆ یا دەستپێكێ دا تەكەز ل سەر ئەوێ چەندێ كر كو ئەڤ دەستپێشخەریە نە ب تنێ پالپشتیا قوتابیا دكەن د پەیداكرنا دەلیڤێن كاری، بەلكو پەرەپێدنا پشكداریكرنا زانكۆیێ د جڤاكی دا دكەن.

پێشانگەھا دەلیڤێن كاری پشكەكە ژ پرۆژێ "ئێكگرتنا جڤاكی ل قەزا سێمێلێ" یێ سەنتەرێ خواندنێن ئاشتیێ و چارەسەركرنا ململانێ ب پالپشتیا ئێكەتیا لوثەری یا جیھانی LWF و ب ھەڤكاری ل گەل سەنتەرێ پێشئێخستنا پیشەیی CDC ل زانكۆیا دھۆك دھێتە ئەنجامدان.

ھژمارەكا زۆر ژ مێھڤانان سەرەدانا پێشانگەھا دەلیڤێن كاری كر، ب پشكداریا نوینەرێ دەڤەردارێ قەزا سێمێلێ، زەرەدەشت شێخ شەمو، و رێڤەبەرێ رێڤەبەریا لوان ھەكار نێروەی، كو بۆ ماوێ رۆژەكێ ل ١١ـی چریا دووێ ٢٠٢٤ بەردەوام بوو، ئەڤ چەندە گرنگیا ھەڤكاریێ د ناڤبەرا سازیێن فێركرنێ و كەرتێ تایبەت و دەستھەلاتێن ناوچەیی بەرچاڤدكەت.

راگەھاندنا زانكۆیا ھۆك؛ ١٨ـی چریا دووێ ٢٠٢٤

عسمەت خابوور و ماھر طاھر كێستەیی

فۆتۆ: محەمەد عەبدولكەریم