دەربارەی کۆلیژا ئەندازیاریێ

زانکۆیا دهۆک – ١٠ـی تەباخا ٢٠٢٥، نڤیسینگەها راگەهاندنا زانکۆیێ (UNPO) | وەک ئێک ژ کەڤنترین و ناڤدارترین یەکەیێن ئەکادیمی ل زانکۆیا دهۆک، کۆلیژا ئەندازیاری بەردەوامە ل سەر شێوەکرنا پاشەرۆژا تەکنۆلۆژی یا کوردستانێ و عیراقێ. کۆلیژ دکەڤیتە کەمپوسا زانکۆیێ ل مالتا و پرۆگرامێن ئەکادیمی یێن جۆراوجۆر و بهێز ل پێنج پشکان پێشکێش دکەت: ئەندازیاریا شارستانی، ئەندازیاریا تەلارسازی، ئەندازیاریا کارەبا و کۆمپیوتەری، ئەندازیاریا میکانیکی، و ئەندازیاریا بایۆمێدیکال، زێدەباری ئەندازیاریا ژێدەرێن ئاڤێ و ئەندازیاریا ڕوپیڤانێ کو ل ڤان دوماهییان بووینە پشکەک ژ پشکا ئەندازیاریا شارستانی.

کۆلیژ نەها پێشوازیێ ل پتر ژ ١٣٥٠ قوتابیێن بەکالۆریۆس و خواندنێن بلند دکەت، کو ژ لایێ ١٤٠ ئەندامێن ستافێ ئەکادیمی یێن بەرکەڤتی ڤە د ٢٢ تاقیگەهێن پێشکەڤتی دا دهێنە ڕێڤەبرن و وانەدان. هەروەسا کۆلیژێ دەست ب چەندین هەڤکاریێن گەلەک کاریگەر کریە، وەک پرۆگرامێ باوەرناما دوانی د ئەندازیاریا بایۆمێدیکال دا دگەل زانکویا THM ل ئەلمانیا، و ب چالاکی کار دکەت ل سەر وەرگرتنا باوەریپێدانا ABET بۆ بدەستڤەئینانا دانپێدانەکا ناڤدەولەتی بۆ پرۆگرامێن خۆ

رێزگرتن ل قوتابیێن گەرا ٢٠٢٥

د رۆژەکا گەش و پر هەست دا، زانکۆیا دهۆک وێنەگرتنا دەرچوونێ بۆ قوتابیێن سالا خواندنێ ٢٠٢٤-٢٠٢٥ یێن کۆلیژا ئەندازیاریێ برێڤەبر. ئەندامێن ستافێ ئەکادیمی و دەرچووی کۆمبوون بۆ پیرۆزکرنا ئەنجامێ چەندین سالان ژ خۆ تەرخانکرنێ، ئاستەنگان و دەستکەڤتان.

دەرچوویێن ئەڤ سالە تەلارساز، ئەندازیار و داهێنەرێن پاشەرۆژێ نە کو ئامادەنە بچنە د ناڤ پیشەسازیێن جۆراوجۆر دا ژ ئاڤاکرن و سیستەمێن وزێ هەتا تەکنۆلۆژیا بایۆمێدیکال و زیرەکیا دەستکرد. خواندنا وان ل زانکۆیا دهۆک شیانێن زانینێن تیۆری و ئەزموونێن کرداری داینە وان، و ئامادەکرینە کو چارەسەرییان چ ل ئاستێ ناڤخۆیی یان جیهانی پێش بێخن.

قوتابیێن ئامادە بۆ شێوەکرنا پاشەرۆژێ

دەرچوویێن کۆلیژا ئەندازیاریێ ب شێوەیەکێ تایبەت بۆ بازاڕێ کاری و بیاڤێن ڤەکۆلینان هاتینە ئامادەکرن. گەلەک ژ وان ژی مفای ژ دەرفەتێن ڕاهێنانێ، ڤەکۆلینێن د تاقیگەهان دا، و پرۆژێن هەڤپشک وەرگرتیە.

دەنگێن ئیلهامێ – دەرچوویێن مە چ دبێژن

بۆ زێدەتر گەشکرنا چیرۆکا ڤێ گەرێ مە دگەل چەند دەرچوویان ئاخفت:

سارا وەعدوللا نووری گۆت کو ژیانا کۆلیژێ یا خۆشە و دەرفەتەکە بۆ فێربوونا کەلتۆرێن جودا و پەیوەندیێن دناڤبەرا کەسان دا. ئەو دبینیت کو بابەتێن خواندنێ د کرداری نە و گرێدایی ژیانا رۆژانە نە، و هیڤیخوازە شیانێن نوی د بیاڤێ پسپۆرییا خۆ دا گەشە پێ بدەت.

یوسف محەمەد تەکەز کر کو کۆلیژ هزرێن مرۆڤی بۆ ئاسۆیێن بەرفرەهتر ڤەدکەت. ئەو شیرەتان ل قوتابیێن نوی دکەت کو زوی خۆ دگەل سیستەمێ ئەکادیمی یێ کۆلیژێ ئاشنا بکەن دا کو باشترین ئەنجامان بدەستڤەبینن.

ئاراز قاهر بەحس ل گوهۆرینا بەرپرسیارەتیێ کر دەمێ ژ قوتابخانێ بۆ کۆلیژێ دهێنە ڤەگۆهاستن. ئەو بهایێ هەڤالینیێن ل سەرانسەری باژێرێن جودا چێبووین بلند ددانیت و قوتابیان هانددەت کو بەردەوام بن و کار بکەن بۆ ڤەگوهارتنا خەونێن خۆ بۆ ڕاستیێ.

هەر قوتابیەکێ ئاماژە ب دیدگەهەکا هەڤپشک کر: هیڤی، ئارمانج، و سوپاسی بۆ وی جڤاکی یێ هاریکاریا وان کری د گەشەکرنێ دا.

رێزگرتن ل دەستکەڤتان

وێنەگرتنا دەرچوونێ نە ب تنێ ڕێورەسمەک بوو—بەلکو ڕێزگرتن بوو ل خۆڕاگری و دەستکەڤتان.

دیتن بۆ پاشەرۆژێ

کۆلیژ بەردەوامە کو هەڤپشکیێن خۆ یێن ناڤدەولەتی بەرفرەهـ بکەت، ژێرخانا خۆ یا ڤەکۆلینان بهێزتر بکەت، و ببیتە پالپشتەکێ داهێنانێ بۆ کوردستانێ و هەرێمێ.

ل ڤێرە گالەریا وێنەیان ببینە دگەل مە

ئەم داخوازێ ژ قوتابی، دەرچووی، خێزان، و هەڤالێن خۆ دکەین کو وێنەگرتنا گەرا ٢٠٢٥ دگەل مە ببینن ل گالەریا وێنەیێن فەرمی.

گالەریا وێنەیێن دەرچوونێ ببینە – کۆلیژا ئەندازیاری، گەرا ٢٠٢٤-٢٠٢٥

پرۆگرامێن ئەندازیاری ل زانکویا دهۆک ببینە

پێکڤە، وەرن دا بەردەوام بین ل سەر ئاڤاکرنا پاشەرۆژێ.

نڤیسینگەها راگەهاندنا زانکۆیێ، ١٠ـی تەباخا ٢٠٢٥

راپۆرت ژ لایێ: فاطمه محمود علی

وێنەگرتن ژ لایێ: علی حەبیب حەبیب