ئەڤرۆ رێکەڤتی ٢٨/٣/٢٠٢٢ و ب ئامادەبوونا د. داوود سلێمان ئەترووشی سەرۆکێ زانکۆیا دهۆک و د. نەفیسا ئیسماعیل، راگرا کولیژا زمانان و سەرۆک و قوتابیێن دەرچوویێن کار بدەستڤەئیناین یێن پشکێن کوردی، ئنگلیزی و وەرگێران و هەروەسا رێڤەبەر و کاربدەستێن دەزگەهێن کەرتێ تایبەت یێن پەیوەندیدار، کولیژا زمانان ل زانکۆیا دهۆک وۆرکشۆپەک ل سەنتەرێ رەوشەنبیری و جڤاکی، لدۆر (باشتر گونجاندنا پرۆگرامێن خواندنێ دگەل پێدڤیێن بازاری) ئەنجامدا.
ل دەستپێکێ د. نەفیسا ئیسماعیل، راگرا کولیژا زمانان باس ل کەتوارێ پرۆگرامێن خواندنێ و گرنگیا پێشڤەبرن و گونجاندنا وان دگەل پێدڤیێن کاری کر، هەروەسا دیارکر کو پێدڤیە پرۆگرامێن خواندنێ بەردەوام و لدویڤ ستانداردێن جیهانی و پێدڤیێن کاری و کەتوارێ جڤاکی بهێنە نویکرن و پێشڤەبرن.
پاشی د. داوود سلێمان ئەترووشی سەرۆکێ زانکۆیا دهۆک گرنگیەکا مەزن دا پتر نویکر و پێشڤەبرنا پرۆگرامێن خواندنێ و شێوازێن وانەگۆتن و هەلسەنگاندنێ و راگەهاند "کارێ مامۆستایێ زانکۆیێ نە بتنێ وانەگۆتنە، بەلکو بکارئینانا هەمی رێکایە بۆ ئاڤاکرنا قوتابییەکێ دەستهەل و زانا و خودان شیان و کارامەیی، کو پشتی دەردچیت، مفای ژ ڤێ ئاڤاکرنێ ببینیت و جڤاک ژی مفای ژێ وەربگریت". دیسان سەرۆکێ زانکۆیا دهۆک گرنگی دا گوهارتنا شێوازێ هزرکرنا قوتابیان و ئاڤاکرنا شیانێن پەیوەندیکرنێ لدەف وان و ئەڤ یەکە ب بابەتەکێ گەلەک گرنگ هژمارت.
د وۆرکشۆپێ دا سەرۆکێن پشکێن ئنگلیزی و وەرگێران یێن کولیژا زمانان دوو سمینار لدۆر چەوانیا گونجاندنا پرۆگرامێن خواندنێ ل کولیژا زمانان پێشکێشکرن و تێدا ئاماژە ب وێ یەکێ دا کو پێدڤیە هەر بابەتەکێ بۆ قوتابیا بهێتە پێشکێشکرن، رۆلێ خۆ د کەسایەتیا وی دا بگێریت و زانین و شارەزایی و شیانا لدەف پەیدابکەت و ببیتە ئەگەر کو دەرچووی بکەتە کەسەکێ جودا و دەستهەل و زانا و شارەزا و خودان شیان، کو بشێت پێداویستیێن بازاری پڕبکەت و خزمەتا جڤاکی بکەت.
پاشی هەرسێ پشکێن کولیژا زمانان و مێڤانێن ئامادەبووی جودا روینشتن و دانوستاندن لدۆر ئاریشەیێن هەیی د ڤان پرۆگرامێن خواندنێ دا و چەوانیا پێشڤەبرنێ و پتر گونجاندنێ دگەل پێداویستیێن بازاری ئەنجامدان.
ل دویماهیێ، د. مەسعوود جەمیل، مامۆستا ل پشکا کوردی و ئێک ژ رێکخەرێن ڤێ وۆرکشۆپێ دیارکر "لبەرە دەرئەنجامێن سەرەکیێن ڤێ وۆرکشۆپێ ببنە ناڤەرۆکا راپۆرتەکێ و بۆ سەرۆکاتیا زانکۆیا دهۆک بهێنە ئاراستەکرن ب مەرەما نویکرن و پێشڤەبرنا پرۆگرامێن خواندنێ و ناڤەرۆکا وان".
هەژی ئاماژێ یە سیاسەتا نوی یا زانکۆیا دهۆک پتر جەختێ لسەر وێ یەکێ دکەت کو پێدڤیە هەمی پرۆگرامێن خواندنێ ل هەمی پشکێن زانستی یێن زانکۆیا دهۆک ببنە ئالاڤەکێ مۆدێرن د دەستێ دەرچوویێ زانکۆیا دهۆک دا بۆ وێ یەکێ بشێت رۆلێ خۆ د جڤاکی دا بگێریت و خزمەتا پێشڤەبرنا ڤی وەلاتی بکەت.