جڤاتا رەوشەنبیریا بریتانی دوو وۆركشۆپ، لدۆر چەوانیا نێڤدەولەتیكرنا ڤەکۆلینان و هەروەسا پێشڤەبرنا پرۆگرامێن ئاڤاکرنا ئاشتیێ ل خواندنا بلندا عیراقێ، دگەل چەند زانكۆیێن عیراقی ئەنجامدان ، وۆرکشۆپا ئێكێ ل رێکەڤتی 2/2/2022 بۆ ماوێ دوو رۆژان هاتە گێران، یا دووێ ژی ل 16/2/2022 بۆ ماوێ چوار رۆژان بوو.
لدۆر ڤان وۆركشۆپان د. لقمان هادی حسن هاریكارێ سەرۆكێ زانكۆیێ بۆ كاروبارێن زانستی و خواندنا بلند، دیاركر: "ئەڤ پرۆگرامە ل هەیڤا 11 یا سالا بۆری ب پشكداریا چەند زانكۆیێن عیراقی دەستپێكر، کو دوو راپرسی هاتبوونە ئەنجامدان، ئێك بۆ قوتابیان و ئێك ژی بۆ مامۆستایان، ل وۆركشۆپێ ئەنجامێن هەردوو راپرسیان و شیان و ئاستەنگێن بجهئینانێ ل زانكۆیێن عیراقی، ب تایبەت ل ژێریا عیراقێ هاتنە گەنگەشەكرن، بۆ نموونە، زمانێ ئنگلیزی ئاستەنگەکە بەرامبەر نێڤدەولەتیكرنێ، هەروەسا نەجێگیریا بارێ سیاسی، و رۆلێ جڤاكی كو نەبوویە پالدەر و یێ لاوازە د ڤی بیاڤی دا، و هەروەسا بارێ دارایی كو هەمی عیراقێ بخۆڤە دگریت".
هاریكارێ سەرۆكێ زانكۆیا دهۆك ئاماژەدا ناڤەرۆک و بابەتێن وۆرکشۆپا دووێ و گۆت: "وۆركشۆپا دووێ ل 16/2/2022 هاتە گێران بۆ ماوێ چوار رۆژان لدۆر نویکرن و پێشڤەبرنا پرۆگرامێ خواندنێ یێ ب ناڤێ (شیانێن پەیوەندیکرنێ)، کو پرۆگرامەکێ بەری چەندین سالانە و ژلایێ جڤاتا رەوشەنبیریا بریتانی ڤە هاتیە برێڤەبرن و نوکە ژی ل پشكێن ئاشتی و مافێ مرۆڤی و كۆمەلناسی ل زانکۆیا دهۆک دهێتە خواندن، کو دێ پتر هێتە نویکرن و پێشڤەبرن.
د. لقمان هادی حسن دیارکر کو زانكۆیا دهۆك پالپشتا مامۆستایێن پشكدارە دڤان وۆركشۆپان دا كو ئێك ژ مامۆستایێن مە راوێژكاربوو د ڤی پرۆگرامی دا و دەربارەی زانکۆیێن پشکدار دیارکر: "هەشت زانكۆ ل عیراقێ پشكداربوون و زانكۆیا دهۆك بتنێ ل كوردستانێ و بتنێ ل زانكۆیا دهۆك ئەڤ بابەتە دهێتە خواندن. جهێ دلخۆشیێ یە كو بابەتەكێ گرنگ ل ڤان هەردوو پشكێن ناڤبری بهێتە نویكرن و پێشڤەبرن ب رێكا بەرنامەكی نێڤدەولەتیێ ب ڤی رەنگی".
راوێژكارێ جڤاتا رەوشەنبیریا بریتانی یێ ڤی بەرنامەی و هەروەسا سەرۆكێ پشكا ئامارێ ل كولیژا كارگێری و ئابووری ل زانکۆیا دهۆک د. نسرەت بەرواری لدۆر کارێ وان یێ راوێژکاریێ و هەروەسا هەماهەنگیا وان دگەل وەزارەتا خواندنا بلندا هەرێمێ گۆت: "بەرنامێ جڤاتا رەوشەنبیریا بریتانی ب هەڤكاری بوو دگەل وەزارەتا خواندنا بلند، ڤی بەرنامەی ژی پێدڤی ب دوو راوێژكارێن ناڤخۆیی و دووێن نێڤدەولەتی هەبوو، کارێ مە وەکو راوێژكار ناڤخۆیی پێکهاتی بوو ژ پەیوەندیێ دگەل تیما بجهئینانا پرۆگرامی و هەماهەنگی دگەل هەڤپشکێن ناڤخۆیی یێن ڤی پرۆگرامی و پێداچوون و هەلسەنگاندنا ناڤەرۆکا وی بوو".