کولیژێن ئەندازیاری و پلاندانا جهەکی ل زانکۆیا و ب ئامادەبوونا د. داوود سلێمان ئەترووشی سەرۆکێ زانکۆیا دهۆک و مامۆستا و قوتابیێن پشکێن زانستیێن پەیوەندیدار و هژمارەکا رێڤەبەر و بسپۆرێن کەرتێ حکوومی و کەرتێ تایبەت، وۆرکشۆپەک ب ناڤونیشانێ (ئاڤاهیێن بلند ل باژێرێ دهۆکێ: کاریگەری لسەر جڤاکی، دۆمداری و شۆپاندنا جوانکاری) گێرا.
د پەیڤا کولیژێن رێکخەرێن وۆرکشۆپێ دا، ئاماژە ب وێ یەکێ هاتە دان کو د سالێن بۆری دا، ڤەگۆهاستنەک د دیمەنێن باژێریبوونێ دا ل دهۆکێ پێشچاڤ بوو و ب تایبەتی د بوارێ زێدەبوونا ئاڤاهیێن بلندێن بازرگانی و ئاکنجیبوونێ دا کاریگەریێن جودایێن ڤێ دیاردێ.
پاشی د. داوود سلێمان ئەترووشی د پەیڤەکێ دا ئاماژە ب پەیدابوونا دیاردا ئاڤاکرنا تاوەران ل دهۆکێ دا و گۆت: "ئاڤاکرنا تاوەران ل باژێرێ دهۆکێ دیاردەیەکا نوی یە، لەورا پێدڤیە بسپۆرێن مە ل زانکۆیا دهۆک پتر ڤەکۆلینان لدۆر ئەنجامبدەن ب مەرەما رێکخستن و پێشڤەبرنەکا زێدەتر، داکو ئەڤ دیاردەیە پتر خزمەتا جڤاکی بکەت".
هەر د پەیڤا خۆ دا، سەرۆکێ زانکۆیا دهۆک پەیامەکا تایبەت بۆ کەرتێ حکوومی ئاراستەکر و گۆت: "گەلەک گرنگە رۆلێ زانکۆیا دهۆک یێ سەرەکی بیت د ڤەکۆلینا پلان و پرۆژەیێن ل پارێزگەها دهۆکێ دهێنە ئەنجامدان و ئەم ب نیازین کو مە بۆچوون د ڤان پرۆژەیان دا هەبن".
بەری دەستپێکرنا هەر چوار پەنەلێن ڤێ وۆرکشۆپێ، سمینارەک ب ناڤونیشانێ (رەنگڤەدانا باژێریبوونا نیۆ - لیبرالی لسەر جیهانا عەرەبی) ژ لایێ بسپۆرێ ڤی بواری ل زانکۆیا تەکنیکی یا بەرلینی د. حەسەن ئەلمووەیلحی ڤە هاتەپێشکێشکرن و تێدا باس ل پێشڤەچوونا ئاڤاهیان ل جیهانێ و پلاندانانا باژێران و فاکتەرێن کاریگەر کر ، هەروەسا کاریگەریا ڤێ یەکێ لسەر وەلاتێن عەرەبی.
د پەنەلێ ئێکێ دا دانوستاندن لدۆر دیزاینا باژێرا و لایەن و رۆیێن جوانکاریێ هاتنە کرن، پاشی کۆد و تەکنیکێن هەلسەنگاندنا دیزاینان د پەنەلێ دووێ دا هاتنە گەنگەشەکرن. پەنەلێ سێیێ ژی یێ تایبەت بوو ب ئاوایێ رێکخستن و دیزاینا ترافیک و پارکان و د تەوەرێ چوارێ دا دانوستاندن لدۆر خزمەتگوزاریێن پێدڤی یێن وەکو ئاڤ و سۆلین و کارەبێ بۆ ڤان ئاڤاهیان هاتنە کرن.
ل دویماهیا ڤێ وۆرکشۆپێ، کو ئەڤرۆ ل هۆلا خەلەفێ زێباری ل زانکۆیا دهۆک هاتە گێران، قوتابی و مامۆستا و رێڤەبەر و بسپۆرێن کەرتێن حکوومی و تایبەت پشکداربوون و بۆچوون و تێبینیێن وان لدۆر هەر چوار پەنەلان هاتنە گەنگەشەکرن.