ب سەرپەرشتیا مامۆستایەکێ زانکۆیا دهۆک.. كۆنفرانسەكێ‌ نێڤدەولەتی ل ئیستانبۆلێ هاتە گێران
June 1, 2022, 9:25 a.m.

 

زانكۆیا دهۆك ب هەڤكاری دگەل زانكۆیا ئیستینیا یا توركی كۆنفرانسێ‌ چوارێ‌ یێ‌ نێڤدەولەتیێ سالانە یێ‌ دەریا سپی ل ناڤەراستا ڤێ هەڤێ ل باژێرێ‌ ئیستانبۆلێ ل دۆر پاراستنا زارۆكان هاتە گێران.

 

ئەڤ كۆنفرانسە ب پشكداریا پتر ژ ٣٠٠ پرۆفیسۆر و نۆژدار و بسپوران ژ ٢٥ وەلاتان هاتە گێران، كو پتر ژ ١٠٠ دكتۆران ژ هەرێما كوردستانێ‌، کو ٧ ژ وان مامۆستایێن زانكۆیا دهۆك بوون، پشكداری د كۆنفرانسی دا كرن.

 

د. خەلەف گەرگەری مامۆستایێ‌ كولیژا پزیشكی یا زانكۆیا دهۆك و سەرپەرشتێ كۆنفرانسی، دیاركر كو كارتێكرنا شەر و كۆچبەریێ‌ ل سەر زارۆكان تەوەرەكێ‌ كۆنفرانسی بوو، تێدا باس ل وان زارۆكان هاتە كرن ئەوێن ژبەر شەران كۆچبەر دبن و پتر ژ لایێ‌ دەروونی ڤە ئاستەنگێن مەزن دبینن، و دەمێ‌ دچنە د ناڤ جڤاكەكێ‌ دی ژی دا ئاستەنگا دبینن بۆ تێكهەلیێ‌ دگەل جڤاكێ‌ نوی، گۆت ژی "د كۆنفرانسی دا دانوستاندن ل دۆر چەوانیا پاراستنا زارۆكان هاتنە کرن، ب تایبەت ئەوێن كۆچبەر بووین، هەروەسا ب گشتی باس پاراستنا زارۆكان هاتە كرن".

 

ل دویڤ ئامارێن سازیێن سڤیل یێن نێڤدوەلەتی، ل دەهـ سالێن بۆری ل دەڤەرێن شەر لێ‌ هەین، پتر ژ دوو ملیۆن زارۆكان گیانێ‌ خۆ ژدەستداینە و پتری چوار ملیۆنان ژی پەككەڤتی بووینە، هەروەسا ل دەهـ سالێن بۆری ل سەرانسەری جیهانێ‌ ١٢ ملیۆن زارۆك ژی كۆچبەر بووینە.