زانکۆیا دهۆک رێککەفتنەک دگەل رێکخراوا (DAAD) یا ئەلمانی واژووکر
May 16, 2022, 12:41 p.m.

 

ئەڤرۆ ل سەنتەرێ رەوشەنبیری و جڤاکیێ زانکۆیا دهۆک رێککەڤتنەک د ناڤبەرا زانکۆیا دهۆک و ئەکادیمیا ئەلمانی بۆ لێکگوهارتنێن ئەکادیمی (DAAD) یا ئەلمانی ڤە هاتە واژووکرن.

 

ب ئامادەبوونا هاریکارێ سەڕۆکێ زانکۆیا دهۆک بو کاروبارێن زانستی و خواندنا بلند د. لوقمان هادی حەسەن و محەمەد خاسکیە سەرۆکێ پشکا پرۆگرامێ (DAAD) یێ سکۆلەرشیپان ل رۆژهەلاتا ناڤین و باکۆرێ ئەفریقیا و هژمارەکا بسپۆر و مامۆستایێن زانکۆیێ، دگەل ئانکێ ماریا مایەر و لوئەی حاجی ژ (DAAD) یا ئەلمانی، کۆمبوونەک هاتە ئەنجامدان، پشتی گەنگەشەکا تێروتەسەل، گرێبەستەک هاتە واژوکرن کو بۆ سالا خواندنێ ٢٠٢٢-٢٠٢٣، ١٠ سکۆلەرشیپ دێ هێنە دابینکرن بۆ دەرچووێن قوناغا شەشێ ئامادەیی کو دێ هێنە وەرگرتن ل  پشکا شیرەتکاریا چاندنێ ل کولیژا زانستێن ئەندازیاریا چاندنێ، پشکا لابۆرێن پزیشکی ل کولیژا زانستێن تەندروستی، پشکا کارگێری کار ل کولیژا کارگێری و ئابووری و پشکا زانستێن کومپیۆتەری ل کولیژا زانست.

 

سەبارەت ڤێ رێککەڤتنێ هەردوو لایەنان دیارکر کو ئەڤ قوتابیە لدویڤ پیڤەرێن دەستنیشانکری ژلایێ رێکخراوا (DAAD) دێ هێنە هەلبژارتن و بۆ هەر چوار سالێن خواندنێ دێ ژ لایێن جودا ڤە هێنە پشتەڤانیکرن تاکو خواندنا خۆ ل ڤان پشکان ب دویماهی دئینن. ژ لایێ خۆ ڤە ئانکێ ماریا دیار کر "ئەگەر ئەڤ پرۆژە یێ سەرکەڤتی بیت، دبیت یێ بەردەوام بیت".

 

لدویڤدا شاندێ مێڤان سەرەدانا کولیژا ئەندازیاری و کولیژا چاندنێ کر و  دگەل راگر و مامۆستایێن کولیژێن ناڤبری دانوستاندن کرن و کارێ (DAAD) یا ئەلمانی و دەلیڤەیێن مفا ژێ وەرگرتنێ بۆ شڕۆڤەکر.