ب سەرۆکاتیا وەزیرێ خواندنا بلند و ڤەکۆلینێن زانستی، لیژنا چاڤپێکەڤتنێ دگەل بەربژارێن ١٩ پۆستێن راگریێ و ٣ پۆستێن هاریکارێن سەرۆکێ زانکۆیێ، سوباهی رێکەڤتی ١٣/٢/٢٠٢٢ و ل سەنتەرێ کونفرانسان ل زانکۆیا دهۆک دێ دەست ب چاڤپێکەڤتنا بەربژاران کەت و ئەڤ چاڤپێکەڤتنە بۆ ماوێ ٣ رۆژێن لدویڤ ئێک دێ بەردەوام بن.
د. داوود سلێمان ئەترووشی، سەرۆکێ زانکۆیا دهۆک و ئەندامێ لیژنا چاڤپێکەڤتنێ دیارکر؛ بۆ جارا ئێکێیە ئەڤ گۆرانکاریێن مەزن ب ڤێ میکانیزما مۆدێرن و رێکخستی بهێنە ئەنجامدان و ئاماژە دا وێ یەکێ کو د ناڤ بەربژاران دا هندەک بەربژار هەنە بەری نوکە د وی پۆستان دا بوون و جارەکا دی پێشکێشکرینە هەمان پۆست، هندەکان ژی پێشکێشی هندەک پۆستێن نوی کرینە و گۆت: "هەر بەربژارەک لدۆر ژڤانێ چاڤپێکەڤتنێ دگەل وی هاتیە ئاگەهدارکرن و ئەڤ پرۆسێسە دێ ب شێوەیەکێ مۆدێرن و سەردەمیانە برێڤەچیت".
هەژی گۆتنێ یە بۆ پتر نویکرن و پێشڤەبرن و ئەنجامدانا گۆرانکاریێن بەردەوام، سەرۆکاتیا زانکۆیا دهۆک دەلیڤا پێشکێشکرنێ بۆ ٢٢ پۆستێن کارگێری راگەهاندبوو و پۆرتالەکێ تایبەت بۆ پێشکێشکرنێ ب مەرجێن دەستنیشانکری دانابوو، داکو مامۆستا و فەرمانبەرێن حەز و شیانێن رێڤەبرنێ ل ڤان پۆستان هەین بشێن ب شێوەیەکێ ئێکسەر پێشکێشبکەن. هەروەسان لیژنەیەک ژ وەزارەتێ هاتە پێکئینان بۆ رێڤەبرنا ڤێ پرۆسێسێ.