ل رۆژا ئێكشەمبی رێكەڤتی ٨ـی ئیلونێ ٢٠٢٤، زانكۆیا دھۆك وۆركشۆپەكێ ناڤدەولەتی ب ناڤۆنیشانێ "ڤەدیتنا رھوریشالێن زمانێ سریانی د زمانێن سامی دا" ئەنجامدا، ئارمانجا وۆركشۆپی ئێخستنا روناھیێ بوو ل سەر دەستپێكرنا فێركرنا زمانێ سریانی وەك زمانەكێ بژاردەیی ل كۆلیژا پەروەردا بنیات بۆ سالا خواندنێ ٢٠٢٤ - ٢٠٢٥، ب ھەڤكاری ل گەل زانكۆیا سالامانكا یا ئیسپانی.

وۆركشۆپ ل سەنتەرێ رەوشەنبیری و جڤاكی یێ زانكۆیا دھۆك ب ئامادەبوونا سەرۆكێ زانكۆیا دھۆك، د. داود سلێمان ئەتروشی و سەرۆكێ كورسیا نەینەوا یا ئەكادیمی ل زانكۆیا سالامانكا یا ئیسپانی، د. ئەفرام ئەلدز، زێدەباری ئامادەبوونا ھندەك كەسایەتیێن ئایینێ مەسیحی و راگر و مامۆستایێن زانكۆیا دھۆك.

ژبەر پێدڤیێ ب ھژمارەكا زۆرتر ژ مامۆستایێن زمانێ سریانی ل دھۆكێ، كو رێژا قوتابیێن حەزا فێربوونا ڤی زمانی بلندترە ژ دەڤەرێن دی یێن ھەرێما كوردستانێ، رێككەڤتن ھتە كرن كو زمانێ سریانی وەك زمانەكێ بژاردەیی ل پشكا زمانێ عەرەبی ل كۆلیژا پەروەردا بنیات ھەر ژ دەستپێكا سالا خواندنێ ٢٠٢٤ – ٢٠٢٥ بھێتە زێدەكرن.

سەرۆكێ زانكۆیا دھۆك، د. داود ئەتروشی د پەیڤا خۆدا تەكەز ل سەر ئەوێ چەندێ كر، كو زانكۆیا دھۆك د ھەولێن بەردەوام دایە بۆ پالپشتیكرنا جۆراوجۆریا كەلتوری و پێشكێشكرنا خزمەتێن فێركرنێ یێن تمام بۆ ھەمی پێكھێنێن جڤاكێ دەڤەرێ، دیسان دیاركر كو بریارا زێدەكرنا بابەتێ زمانێ سریانی د ناڤ بابەتێن پشكا زمانێ عەرەبی دا، دەرئەنجامێ گەنگەشێن چر و بەرھەمدارن بۆ گەھشتن ب ڤێ ئارمانجێ.

ژ لایێ خۆڤە د. جێمس حسدو حیدو، راگرێ كۆلیژا ئەندازیاری ل زانكۆیا دھۆك، كو ئێكە ژ پالپشتێن بیروكا فێركرنا زمانێ سریانی، دیاركر كو زانكۆیا دھۆك دێ ل گەل دەستپێكرنا ڤێ سالا خواندنێ دەستپێكەت، ھەروەسا ئاماژە دا ئەوێ چەندێ كو د پلندایە زانكۆیا دھۆك پشكەكا سەربەخۆ زمانێ سریانی ل كۆلیژا پەروەردا بنیات ڤەكەت، كو دێ باوەرنامێن ھەڤپشك ژ زانكۆیا دھۆك و زانكۆیا سالامانكا یا ئیسپانی ب دەرچوویێن ڤێ پشكێ ھێنەدان.

دیسان د وۆركشۆپی دا د. ئەفرام یەلدز باس ل رھوریشالێن مێژوویی یێن زمانێ سریانی و نەژادێ وێ د زمانێن سامی دا كر، ھەروەسا تیشك ئێخستە ل سەر گرنگیا ھەڤكاریا د ناڤبەرا زانكۆیا دھۆك و زانكۆیێن ئەوروپی، ژ وان ژی زانكۆیا سالامانكا یا ئیسپانی، بۆ پەرەپێدانا ئاستێ فێركرنێ و خزمەتكرنا تەخێن جودا یێن جڤاكێ دەڤەرێ.

ھەروەسا مامۆستا رونی بطرس، ئێك ژ مامۆستایێن زمانێ سریانی و قوتابیێ دكتۆرایێ ل پشكا زمانێ سریانی ل زانكۆیا بەرلین، دەربرین ژ سۆپاسیێن خۆ بۆ زانكۆیا دھۆك كر بۆ پالپشتیكرنا وێ بۆ پێشكێشكرنا دەلیڤێن فێركرنێ یێن زۆرتر بۆ قوتابیێن سریانی، ھەروەسا ئاماژە ب گرنگی ئەڤێ پێنگاڤێ كر وەك دەستكەڤتەكێ گرنگ كو بۆ ئێكەم جارە ل سەر ئاستێ ھەرێما كوردستانێ دھێتە ھاڤێتن.

زانكۆیا دھۆك یا بەردەوامە د پیشەنگیێ دا د نویكرن و پێشئێخستنا بابەتێن خواندنێ، ل گەل تەكەزكرن ل سەر پەرەپێدانا لێكتێگەھشتنا كەلتووری و دابینكرنا پێدڤیێن جڤاكی یێن جۆراوجۆ، بۆ گەرەنتیكرنا دابینكرنا دەلیڤێن فێركرنێ یێن دادپەروەر و گشتگیر بۆ جڤاكی.

بۆ دیتنا وێنەیێن ب كوالیتیا بەرز، سەرەدانا لینكێ ل خوارێ بكە:

لینكێ وێنەیا

راگەھاندنا زانكۆیا دھۆك؛ ٩ـی ئیلونێ ٢٠٢٤

نڤێسین: فاطمة محمود

وەرگێران: ماھر طاھر كێستەیی

فۆتۆ: عەلی بانكی