ب دروشمێ ژنا میدیاکار و رۆژنامەڤان، ئەڤرۆ، ٢ـی مەها ئیلۆنێ ٢٠٢٤، سەنتەرێ خواندنێن یەکسانی یا جێندەری ل زانکۆیا دهۆک و ب پشتەڤانیا گاڤ تی ڤی، خولا پێگەهاندنا ژنا میدیاکار و رۆژنامەڤان دەستپێکر.

ئەڤ خولە کو ل سەنتەرێ راهێنانا پێداگوجی وپەرەپێدانا ئەكادیمی ل زانكۆیا دهوك دهێتە ئەنجامدان، بریارە تاكو ٥ـی ئیلۆنێ ٢٠٢٤ یا بەردەوام بیت. مەرەم ژ ڤێ خولێ پێگەهاندن و ئامادەكرنا كەسایەتیەكا رۆژنامەڤانی یا خودان شیان و جۆری و هەروەسا هەلسەنگاندنا كارێ میدیاكارێن ژن و باشتركرنا بەرهەمێ میدیایی یە.

د ڤێ خولێ دا، كو ٢٠ ژنێن میدیاکار و یێن حەزا میدیایێ هەی تێدا پشکدارن، هەر ژنەکا حەزا كارێ میدیایی هەبیت، دشێت تێدا پشكدار بیت، ب مەرجەكی، هەلگرا باوەرناما بەكالۆریۆس یان دیپلۆمایێ بیت. ژ لایەكێ دی ڤە، پرۆگرامێ خولێ یێ پڕە ژ بابەت و تەوەرێن گرێدای میدیا و رۆژنامەڤانیێ؛ وەكو یاسا و ماف و رۆژنامەڤانێن ژن، چەوانیا ئاڤاكرنا كەسایەتیا رۆژنامەڤانا ژن، دروستكرنا راپۆرتان ل دۆر بابەتێن رۆژنامەڤانی ب شێوەیێ پراكتیكی، و پێداچوونا بابەتێن ژنان و سەرەدەریكرن ل گەل ئاستەنگان و چارەسەریا وان.

ل دەستپێكا خولێ، د. دلین سەردار زوهدی، رێڤەبەرا سەنتەرێ خواندنێن یەكسانی یا جێندەری ل زانكۆیا دهۆك دیارکر "ژبەركو كارێ راگەهاندنێ گرنگیەكا مەزن هەیە، مە ب فەر زانی ئەم خولەكا تایبەت بۆ میدیاكار و رۆژنامەڤانێن ژن یێن دەڤەرا دهۆكی رێکبێخین دا كو بەرهەمێ میدیایی بەرەڤ ئاستەكێ بلندتر و گەشتر ڤە ببەین"، پاشی رێڤەبەرا سەنتەرێ ناڤبری تیشك ئێخستە سەر بەربەست و ئاستەنگێن روی ب روی راگەهاندكارێن ژن دبن. ژ لایێ خۆ ڤە، هۆزان عەبدوللا، رۆژنامەڤان ل گاڤ تی ڤی وەکو چاڤدێرا ڤێ خولێ، دا دیاركرن كو ئەڤە ئێكەم جارە خولەكا تایبەت ب تەخا رۆژنامەڤانێن ژن ڤە كو ب هەڤكاری دگەل سازیەكا ئەكادیمی وەكو زانكۆیا دهۆك دهێتە رێكخستن.

ب پشكداریكرنا 4 راهێنەرێن خودان شیان ژ مامۆستایێن زانكۆیا دهۆك و راهێنەرێن ناڤدەولەتی، ئەڤ خولە ب شێوەیەكی ئەكادیمی و پراكتیكیێ رێكوپێك دهێتە رێکخستن و گەنگەشە ل ناڤبەرا راهینەران و پشكداران چالاکانە دهێنە ئەنجامدان.

راگەهاندنا زانكۆیا دهۆك، ٣ـی ئێلونێ، ٢٠٢٤

فاطمة محمود

فۆتۆ: حسێن تتمی