كۆلیژا ئەندازیاری ل زانكۆیا دھۆك ب ھەڤكاری ل گەل جڤاتا عیراقی یا پشتبەستنا پرۆگرامێن ئەندازیاری وۆرگشۆپەك ل دۆر دەستڤەئینانا پشتبەستنێ بۆ پرۆگرامێن ئەندازیاری ل رۆژا پێنج شەمبی رێكەڤتی ٨ـی تەباخێ ٢٠٢٤ ل ل سەنتەرێ رەۆشنبیری و جڤاکی زانکۆیا دهۆک ب پشكداربوونا راگرێ کۆلیژا ئەندازیاری، پ. د. جێمس حەسەدو هەیدو پ. د. زیاد محەمەد سەرۆكێ جڤاتا عیراقی بۆ پشتبەستنا پرۆگرامێن ئەندازیاری و ھەردوو ئەندامێن جڤاتا ناڤبری پ. د. عەلی ناجی و پ.د. جەلال محەمەد جەلیل و ھژمارەكا مامۆستایێن كۆلیژێ ئەنجامدا.

تەوەرێ سەرەكی یێ وۆركشۆپی، چەوانیا دەستڤەئینانا پشتبەستنێ بۆ پرۆگرامێن ئەندازیاری ل كۆلیژا ئەندازیاری یا زانكۆیا دھۆك بوو، دیسان پیڤەرێن جڤاتا عیراقی یا پشتبەستنا پرۆگرامێن ئەندازیاری بۆ دەستڤەئینانا پشتبەستنێ بۆ جڤاتا كۆلیژا ئەندازیاری ھاتنە دیاركرن و گەنگەشە ل دۆر ھاتەكرن، دیسان پێنگاڤ و رێكارێن دەستڤەئینانا پشتبەستنێ ژ لایێ پشكدارێن وۆركشۆپی ڤە ھاتنە باسكرن. بۆ ئەڤێ مەبەستێ ژی كۆلیژا ئەندازیاری پێنگاڤێن رژد د بوارێ ھەلسەنگاندنا پرۆگرامێن خواندنێ دا ھاڤێتینە، كو ب ئێك ژ مەرجێن سەرەكی یێن دەستڤەئینانا پشتبەستنێ دھێتە ھژمارتن.

ھەژی ئاماژەدانێ یە، زانكۆیا دھۆك پێنگاڤێن رژد د بوارێ پەرەپێدانا پرۆگرامێن خواندنێ ل ھەمی كۆلیژا ھاڤێتینە، كو ل رێكەڤتی ١٢ـی ئیلۆنێ ٢٠٢٣، كۆلیژا پزیشكی وەك ئێكەم كۆلیژ ل كوردستانێ پشتبەستن ژ لایێ جڤاتا نیشتیمانی یا دانا پشتبەستنێ ب كولیژێن پزیشكی ل عیراقێ دەستڤە ئینا، زانكۆیا دھۆك بەردەوام كاردكەت د دەستڤەئینانا پشتبەستنێ پێشەنگ بیت ل سەر ئاستێ زانكۆیێن ھەرێما كوردستانێ.

https://youtu.be/OMEAOUHTzl8?si=KYqXyG0J39bXDhze

راگەھاندنا زانكۆیا دھۆك؛ ١٢ـی تەباخێ ٢٠٢٤

نیبارێ حەجی و ماھر طاھر

وێنە: عەلی بانکی