ل دویڤ رێزبهندیا تایمز زانکۆیا دهۆک ئێکەما هەرێما کوردستانێ یە
زانكۆیا دهۆك بۆ جارا ئێكێ هاته پۆلینكرن وهكو باشترین زانكۆ ل سهر ئاستێ ههرێما كوردستانێ ل دویڤ رێزبهندیا گۆڤارا تایمز یا خواندنا بلند بۆ زانكۆیێن جیهانی (THE) بۆ سالا 2024، زانكۆیا دهۆك ل دویڤ پیڤهرێن سهرهكی یێن ههلسهنگاندنێ یا سهركهڤتی بوو، وهكو كوالێتیا ڤهكۆلینان، نێرینا ناڤدهولهتی، ژینگهها ڤهكۆلینان، وانهگۆتن و كاریگهریا جڤاكی. لەورا ب هەلکەڤتا بجهئینانا ڤێ دەستکەڤتێ، پیرۆزباهیێن گەرم ئاراستەی سەرۆکاتیا زانکۆیا دهۆک و تەڤایا مامۆستا و قوتابی و فەرمانبەرێ وێ دکەین. ئەڤ دەستکەڤتە نیشانا کارکرنا ب گیانێ تیمی و پابەندبوونێ یە ب نایابیا ئەکادیمی.
ئهڤ دهستكهڤته یێ ههڤدهمه ل گهل پۆلینكرنا زانكۆیێن عیراقی ل رێزبهندیا گوڤارا تایمز بۆ زانكۆیێن عهرهبی، كو زانكۆیا دهۆك ل رێزا شهشێ هات ژ سەرجەمێ 79 سازیێن خواندنا بلند ل عیراقێ، كو د رێزبهندیا سالا 2024ێ دا ههلسهنگاندن بۆ 238 زانكۆیان ل سەرانسهری 16 وهلاتێن عهرهبی هاتیه كرن.
ئهڤە دهستكهڤتهكێ گرنگه بۆ زانكۆیا دهۆك، كو پێشتر ل رێزا پێنجێ ل سهر ئاستێ كوردستانێ و ل رێزا 25 ل سهر ئاستێ عیراقێ دهات ل پۆلینكرنا زانكۆیێن وهلاتێن عهرهبی بۆ سالا 2023، ئهڤ بلندبوونا ئاستێ زانكۆیا دهۆك دوپاتیه ل سەر پێگیریا زانكۆیێ ب بیاڤێ نایابیا ئهكادیمی و پێشكهڤتنا زانستی.
ب رێكا بزاڤێن بهردهوام بۆ بلندكرنا سیستهمێ خواندنا بلند، و پێشخستنا ڤهگوهاستنا دیجیتالی، و بهێزكرنا پهیوهندیێن ناڤدهولهتی، و باشتركرنا كاریگهریا دامهزراوهیی، زانكۆیا دهۆك یا بهردهوامه ل سەر چهسپاندنا ناڤداریا خۆ وهكو سازیهكا ئهكادیمی یا پێشهنگ ل دهڤهرێ.
سازیا تایمز بۆ خواندنا بلند (THE) دهستههلاتهكا باوهرپێكریا جیهانیه ل بیاڤێ خواندنا بلند، كو داتا و نێرین و شارهزایا خۆ پتر ژ 50 سالایه پێشكێشدكهت، ل گهل بناغهكێ داتایان كو پتر ژ 7000 سازیان ل 171 وهلاتان بخۆڤه دگریت، سازیا تایمز بۆ خواندنا بلند پشتهڤانیا زانكۆیان و سهركردێن وان و قوتابیان دكهت ل دهرێخستنا بریارێن ئاگههدارانه كو ئایندێ وان ل سهر دهێته ئاڤاكرن.
راگەهاندنا زانکۆیا دهۆک؛ ٥ـی کانوونا ئێکێ ٢٠٢٤
فاطمة محمود
وەرگێران: رەمەزان شەعبان