ب چاڤدێریا رێزدار مەسرور بارزانی، سەرۆکێ حکومەتا هەرێما کوردستانێ، ل رێکەڤتی ٢٢ـی گولانێ ٢٠٢٤، کۆربەندێ "فیدرالی زامنێ سەقامگیری و پێکڤەژیانێ یە"، ل سەنتەرێ رەوشەنبیری و جڤاکیێ زانکۆیا سەلاحەدین دەستپێکر، ئەڤ کۆربەندە ب هەڤپشکی ل ناڤبەرا زانکۆیا دهۆک، زانکۆیا سەلاحەدین، زانکۆیا زاخۆ و زانکۆیا سۆران هاتیە رێکخستن و چوار پانێلێن زانستی ل بابەتێ کۆربەندی، ب پشکداریا بسپۆر و تایبەتمەندێن سیاسی و یاسایی، بخۆڤەدگریت.

ل دەستپێکا کۆربەدی، د. شاڵاو عبدالخالق محەمەد، ب ناڤێ لیژنا بلندا زانستی یا کۆربەندی، پەیڤا بخێرهاتنێ پێشکێشکر. پاشی پەیڤا هەر چوار زانکۆیێن رێکخەر، ژ لایێ د. کامەران یونس محمد امین، سەرۆکێ زانکۆیا سەلاحەدین ڤە هاتە پێشکێشکرن. ل دویڤ دا پەیڤا حکومەتا هەرێما کوردستانێ ژ لایێ د. پشتیوان صادق، وەکو نوینەرێ رێزدار مەسرور بارزانی، سەرۆکێ حکومەتا هەرێما کوردستانێ هاتە پێشکێشکرن.

د کۆربەندی دا، و ب ئامادەبوونا د. داود سلێمان ئەتروشی، سەرۆکێ زانکۆیا دهۆک، پانێلێ ئێکێ ل دۆر "سیستەمێ فیدرالیێ عیراقێ: دەرفەت و مەترسی"، ب رێڤەبرنا د. هەوار خەلیل نێروەیی، راگرێ کۆلیژا زانستێن سیاسی ل زانکۆیا دهۆک هاتە ئەنجامدان. د ڤی پانێلی دا، هەر ئێک ژ د. شێرزاد نجار، د. ئەڤین خالد عبدالرحمن، د. سەردار قادر محي الدین و د. عثمان علي ويسي پشکداربوون و شرۆڤەکرنێن تێروتەسەل و گەنگەشەیێن هویر ل دۆر مژارا پانێلی ئەنجامدان و ئامادەبووی ژی چالاکانە پشکدار بوون.

د پانێلێ دووێ دا، ئەوێ ل دۆر "رۆلێ دادگەها بلندا فیدرالی د پاراستنا دەستووری و سەقامگیریێ دا ل عیراقێ"، ئەوێ ژ لایێ د. شاهۆ غفور احمد ڤە هاتیە برێڤەبرن، هەر ئێک ژ د. محمد عمر مولود، د. سەرهەنگ حمید بەرزنجی، د. سۆران علی حسن و د. رێبەر فتاح عمر، ل دۆر لایەنێن جودایێن ڤێ مژارێ؛ بابەت و بۆچوونێن خۆ پێشکێشکرن و ئامادەبووی ژی چالاکانە پشکداربوون و گەنگەشێن بەرهەمدار ئەنجامدان و مژارا پانێلی دەولەمەندتر لێکر.

ل دووەم رۆژا کۆربەندی، ل رێکەڤتی ٢٣ـی گولانێ ٢٠٢٤، کەسایەتیێ سیاسیێ کورد مامۆستا عارف رشدی، وەکو ئاخڤتنکەرەکێ تایبەتێ کۆربەندی، پەیڤەک ل دۆر "فیدرالیەت و رەهەندێ عەقلی" پێشکێشکر. پاشی پانێلێ سێیێ ل دۆر "گرنگیا بجهئینانا دەستوورێ فیدرالی بۆ سەقامگیریا عیراقێ و هەرێما کوردستانێ" هاتە بەستن. د پانێلی دا، و ب رێڤەبرنا د. کاروان محمد عزت، هەر ئێک ژ د. محمد احسان، د. وجیه عفدو علي، د. عبدالرحمن کریم درویش و د. بهدین شهاب پشکداربوون و رەهەندێن جودایێن مژارا پانێلی گەنگەشەکرن و ئامادەبوویان ژی پرس و تێبینیێن خۆ ئاراستەکرن و سەقایەکێ دایالۆگیێ بەرهەمئینەر دروستبوو.

پاشی و د پانێلێ چوارێ و دویماهیێ دا، ئەوێ ل دۆر "گرنگیا هەبوونا دەستووری بۆ هەرێما کوردستانێ بۆ سەقامگیری و پێکڤەژیانەکا باشتر" و ژ لایێ د. شاری خالد نانەکەلی ڤە هاتیە برێڤەبرن، هەر ئێک ژ دادوەر رزگار محمد امین، د. موفق عادل عمر، د. رێنجبەر جمیل شێخۆ و م. حسن مصطفی حسین تێدا پشکداربوون و ژ لایەنێن جودا ڤە شرۆڤەکرن و بۆچوونێن خۆ ل دۆر بابەتێ پانێلی پێشکێشکرن و سەقایەکێ بەرهەمئینەرێ گفتوگۆیێ و پشکداریا ئامادەبوویان دروستکرن. ل دویماهیێ ژی، راسپاردێن هەر چوار پانێلان هاتنە ئاراستەکرن.

ئەڤ کۆربەندێ گرنگ شیا سەرکەڤتیانە هژمارەکا زۆر و هەمەجۆرا بسپۆر و شارەزا و پەیوەندیدارا کۆمبکەت ب مەرەما گفتوگۆکرنا کێشێن رژدێن گرێدای فیدرالیێ و بجهئینانا دەستووری و سەقامگیریا دەڤەرێ. پانێلێن کۆربەندی دەلیڤەیێن چالاکێن گەنگەشێ دروستکرن و جەخت ل سەر بابەتێن گرنگ و ریشەیی کرن و بوونە ئەگەرێ پێشکێشکرنا بۆچوونێن بوهادار، کو پشتەڤان بوون بۆ بجههاتنا ئارمانجێن کۆربەندی، ب تایبەتی ژی، ئەوێن گرێدای پشتەڤانیا سەقامگێریێ و پێکڤەژیانێ ب رێکا فیدرالیێ.

بۆ داونلۆدکرنا وێنێن ب کوالتیا بلند، لینکێ ل خوارێ کلیک بکە:

https://drive.google.com/drive/folders/1rc1HfX0M9laFbGtyQFKG1tMHPYvwCLRc?usp=sharing

راگەهاندنا زانکۆیا دهۆک، ٢٥ـی گولانێ ٢٠٢٤

عسمەت خابوور

وێنە: حسێن تتمی