وەزارەتا خواندنا بلند پۆستێ "راگرێ كۆلیژا ئەندازیاری" ل زانكۆیا دھۆك رادگەھینیت
وەزارەتا خواندنا بلند و ڤەكۆلینێن زانستی د چوارچوڤێ رێنمایان دا پۆستێ "راگرێ كۆلیژا ئەندازیاری" ل زانكۆیا دھۆك رادگەھینیت، ھەر كەسێ حەز ھەبیت و مەرج ل دەڤ ھەبن د شێت د ماوەیێ دیاركری دا "ژیانناما كەسایەتی – C.V" و داخازیێ پێشكێشبكەت، داكو ناڤێ وی د لیستا بەربژێرێن پۆستی دا بھێتە تۆماركرن.
مەرجێن پێشكێشكرنێ
- ھەلگرێ باورەناما دكتۆرایێ بیت.
- ناسناڤێ زانستی ژ پرۆفیسۆرێ ھاریكار كێمتر نەبیت.
- خزمەتا زانكۆیێ یا پێشكیشكاری ژ دەھ سالا كێمتر نەبیت.
تێبینی:
- ئەو بەرێزێ داخوازیێ پێشكێشدكەت باشترە دید و بۆچوون و بەرنامێ كارێ خۆ پێشكێشبكەت بۆ پێشڤەبرنا زانكۆیێ د ماوێ چوار سالێن پۆستی وەردگریت.
- زانینا زمانێ ئنگلیزی و شارەزایی د بكارئینانا تەكنۆلۆژیایێ د بوارێ خواندن و فێركرنێ و كاراییا بەلاڤكرنا ڤەكۆلینێن زانستی دەلیڤێن زێدەتر بۆ پێشكێشكاری بەردەستدكەت.
- دویماھی ژڤان بۆ پێشكێشكرنێ ل دویماھیا دەمێ دەواما فەرمی ل رۆژا پێنج شەمبی، رێكەڤتی ٣٠ـی كانوونا دووێ ٢٠٢٥ـێ یە.
پێدڤیێن پێشكێشكرنێ:
- (C.V)
- كورتیا خزمەتێ: پێدڤیە كورتیا خزمەتێ ژ لایێ سەرۆكاتیا زانكۆیێ ھاتبیتە پەسەندكرن
- ئێكەم فەرمانا بدەستڤەئینانا ناسناڤێ زانستی
- لیستا ناڤونیشانێن ڤەكۆلینێن زانستی یێن بەلاڤكری
- كارتا نیشتیمانی یان ناسناما بارێ شارستانی
- ھەر بەرێزەكێ حەز ھەبیت و مەرجێن ل سەری دیاركری ل دەڤ ھەبن د شێت (C.V) كورتیا خزمەتێ راستەوخۆ د لینكێ ل خوارێ دا داگریت و بۆ وەزارەتێ رەوانە بكەت.