26ـی شواتا 2026، نڤیسینگەها راگەهاندنا زانکۆیێ (UNPO) | زانکۆیا دهۆک پشکداری د کۆمبوونا دەستپێکی یا پرۆژێ هەرێمی یێ MOVE دا کر، کو ل رۆژێن 14-15ـی شواتا 2026 ل سلێمانیێ هاتە ئەنجامدان. ئەڤ دەستپێشخەریە زانکۆیێن هەرێما کوردستانێ و وەلاتێ یەمەنێ کۆم دکەت ب مەرەما بهێزکرنا دەلیڤەیێن کاری بۆ دەرچوویان ب رێکا گەشەپێدانا کارامەییان، چاکسازیێن ئەکادیمی، و هەڤکاریا نێزیکتر دگەل کەرتێ پیشەسازی و لایەنێن پەیوەندیدار یێن دامەزراوەیی.

ئەڤ پرۆژە هەڤپەیمانێن هەرێمی بخۆڤەدگریت ژ وان ژی زانکۆیا سەلاحەدین-هەولێر، زانکۆیا سلێمانیێ، و زانکۆیا گەرمیان، دگەل هەڤپەیمانێن یەمەنی وەکی زانکۆیا حەزرەمەوت و زانکۆیا عەدەن. د کۆمبوونێ دا، پشکداربوویان هەماهەنگی د ناڤبەرا پاکێجێن کاری، خشتەیێن دەمی، و پێکهاتەیێن کارگێڕی دا کر بۆ ئاراستەکرنا بجهئینانا ڤێ دەستپێشخەریا سێ سالی.

پرۆژێ MOVE چارەسەریا ئاستەنگێن پێکهاتەیی دکەت یێن کو رووبەڕووی دەرچوویان دبن، ب تایبەتی ئەو کەلێنا د ناڤبەرا ئامادەکرنا زانکۆیێ و پێدڤیێن بازاڕێ کاری دا هەی. ب رێکا داهێنان د پرۆگرامێن خواندنێ دا، راهێنانێن پراکتیکی، بەرەڤپێشبرنا کارسازیێ (پێشەنگیا کاری)، و هەڤپەیمانیێن دناڤبەرا زانکۆ و پیشەسازیێ دا، ئەڤ دەستپێشخەریە بزاڤێ دکەت کو قوتابیان ب شیانێن پراکتیکی، کارامەییێن کارێ ب کۆم، کارامەییێن پەیوەندیکرنێ، و هشیاریا دۆمدار ئامادە بکەت، دگەل پشتەڤانیکرنا دەلیڤەیان د کەرتێن نوی یێن وەکی ئابوورێ کەسک.

بۆ زانکۆیا دهۆک، ئەڤ پشکداریکرنە کۆلەکێن سەرەکی یێن پلانا وێ یا ستراتیژی بهێزدکەت، ژ وان ژی پشکداریا ناڤدەولەتی، پەروەردەیا ئاراستەکری بەرەڤ دامەزراندنێ، و گەشەپێدانا دۆمدار. ب رێکا پشکداریکرنێ د ڤێ دەستپێشخەریا هەرێمی دا، زانکۆ رۆلێ خۆ وەکی هەڤپەیمانەکێ چالاک د چاکسازیێن خواندنا بلند و ئامادەکرنا دەرچوویان بۆ بازاڕێن کاری یێن هەڤڕک ل سەر ئاستێ هەرێمی و جیهانی بهێزتردکەت.

گرنگترین دەستکەفتێن زانکۆیا دهۆک
ب دەستپێکرنا دەستپێشخەریا پرۆژێ MOVE، زانکۆیا دهۆک:

• هەڤکاریا ئەکادیمی ل سەرانسەری هەرێما کوردستانێ و یەمەنێ بەرفرەهـ دکەت.
• پشتەڤانیا نویکرنا پرۆگرامێن خواندنێ و راهێنانێن کارامەییان یێن ل سەر داهێنانێ دکەت.
• شیانێن ئابوورێ کەسک و هشیاریا گەشەپێدانا دۆمدار پێشدئێخیت.
• گرنگیدانا ستراتیژی یا زانکۆیا دهۆک ب پشکداریا ناڤدەولەتی و گونجاندن دگەل بازاڕێ کاری بهێزتر دکەت.

نڤیسینگەها راگەهاندنا زانکۆیێ (UNPO)، 26ـی شواتا 2026
ئامادەكرن: فاطمە محمود علی