سەنتەرێ خواندنێن ئاشتیێ و چارەسەرکرنا ململانێ (CPCRS) ل زانکۆیا دهۆکێ، ب پشته‌ڤانیا رێكخراوا ئێكه‌تیا لۆثه‌ری یا جیهانی (LWF) و ب هەڤپشکی دگەل رێکخراوا ئه‌لند، خۆلەکا راهێنانێ یا دوو رۆژی دبن ناڤونیشانێ "رۆژنامەڤانیا دجیتاڵ بۆ بهێزکرنا مافێن مرۆڤی و پاراستنا هەمەجۆریێ" بڕێڤەبر.

ئەڤ راهێنانە د چوارچۆڤێ پڕۆژێ "ب هێزکرنا گەنجان ژ جڤاکێن جودا بۆ پێشئێخستنا دیالۆگ، هەڤکاری و تەباییا جڤاکی ب رێکا بسپۆریەکا لسەر بنەمایێ مافان" هاتە ئەنجامدان. ئارمانجا سەرەکی یا راهێنانێ ئەوە کو رۆژنامەڤان، چێکەرێن ناڤەڕۆکێ و چالاکڤان بشێن ئامراز و سەکۆێن دجیتاڵ یێن سەردەم وەک کۆڵەکەکا سەرەکی بۆ بەرەڤانیکردنێ ژ دۆزێن مرۆڤایەتی و پشتەڤانیکرنا هەمەجۆریا کولتووری و جڤاکی بکاربینن.

گەشەپێدانا شارەزاييێن ڤەگێڕانا چێرۆکێن دیجیتاڵی: مەشقپێكرنا پشكداربووان ل سەر بەرهەڤكرنا ناڤەرۆكا ڕاگەیاندنێ يا کارتێکەر (وەکی ڤەکۆلینێن ستانداردێن دیجیتاڵی، پۆدكاست، و ڤیدیۆیێن موبایلێ) ئەوا تیشکێ دئێخیتە سەر پێشێلكاریان و کێشەیێن توێژێن پەراوێزکری.

چەسپاندنا بەهایێن جۆراوجۆری و ڤەگرتنێ (شمولیەت): بەلاڤکرنا کەلتورێ قەبولکرنا ئێکودوو، بەرنگاربوونا ئاخفتنا کەرب و کینێ، جوداکاریێ، و نووچەیێن چەواشەکار ئەوێن کو ئاریشەیان دروست دکەن یان پێکهاتە و کەمینەیان دکەنە ئارمانج.

سلامەتیا دیجیتاڵی و پاراستنا ژێدەران: پێدەشتکرنا ڕۆژنامەڤان و پارێزەڤانێن مافێن مرۆڤی ب زانیاریێن پێویست ژبۆ پاراستنا خۆ، داتایێن خۆ، و ژێدەرێن خۆ ژ چاڤدێریێ یان هێرشێن سایبەری دەمێ روومالکرنا بابەتێن هەستیار.

هۆشیارکرن ل سەر چەمک و پەیماننامەیێن نێودەوڵەتی: گڕێدانا کارێ ڕۆژنامەڤانی ب پێوەرێن نێودەوڵەتیێن مافێن مرۆڤی و بنەمایێن ئازادیا دەربڕینێ، و چاوانیا بکارئینانا ڤان پەیماننامەیان وەکی چارچۆڤەکێ یاسایی و ئەخلاقی ژبۆ بابەتێن ڕۆژنامەڤانی.

دەستڤەئینانا پشتگەرمییێ و دادپەروەریێ (مناصرة): شیانبەخشین ب پشکداربووان ژبۆ دیزاینکرن و بەڕێوەبرنا هەڵمەتێن پشتگەرمیا دیجیتاڵی یا سەرکەفتی، ئەوا هاریکار بیت بۆ کارتێکرنێ ل سەر رای گشتی و بڕیاردەران ژبۆ پاراستنا ماف و ئازادیان.