سەنتەرێ ڤەکۆلینێن ئاشتیێ و چارەسەرکرنا نه‌کۆکیان (CPCRS) خالەکا سەرەکییە ل زانکۆیا دهۆک بۆ ڤەکۆلین و پشکداریا کرداری د بوارێ ئاڤاکرنا ئاشتیێ دا. سەنتەر ل سالا 2002 هاتیە دامەزراندن وەک ئێکەم سەنتەرێ ئەکادیمی یێ ب ڤی رەنگی ل هەرێما کوردستانێ و عیراقێ، کو رۆلەکێ کاریگەر هەبوویە د گرێدانا زانکۆیێ ب جڤاکی ڤە ب رێیا پەروەردە، راهێنان و پرۆژەیێن پراکتیکی.

سەنتەری رۆلەکێ بنیاتنەر هەبوویە د پەرەپێدانا پرۆگرامێن ئەکادیمی یێن گرنگ دا، ژ وان ژی پشکا "ڤەکۆلینێن ئاشتیێ و مافێن مرۆڤی" بۆ قۆناغا بەکالۆریۆسێ، کو تەنێ پرۆگرامە ل رۆژهەلاتا ناڤین ژ دەمێ دەستپێکرنا وێ ل سالا 2016ێ، زێدەباری سەرپەرشتیکرنا وی یا بەرێ بۆ تەنێ پرۆگرامێ ماستەرێ ل عیراقێ یێ تایبەت ب ڤەکۆلینێن ئاشتیێ و چارەسەرکرنا نه‌کۆکیان. سەنتەر ب بەردەوامی ڤەکۆلینێن زانستی ئەنجام ددەت، و سمینار و وۆرک شۆپان ب هەماهەنگی دگەل لایەنێن سیاسی و رێکخراوێن جڤاکێ مەدەنی رێک دێخیت، هەروەسا دگەل هەڤپشکێن نێڤدەولەتی کار دکەت بۆ بەرهەمئینانا زانینەکێ کو پشکداریێ د خورتکرنا ئاشتیا بەردەوام دا بکەت ل هەرێما کوردستانێ و دەرڤە ژی.

ئەرک و بوارێن کارکرنێ

سەنتەرێ CPCRS وەک سەنتەرەکێ ڤەکۆلین و سیاسەتان کار دکەت کو ئەکادیمی، پراکتیزەکار و خودان بەرژەوەندیێن جڤاکی کۆم دکەت بۆ بەرهنگاربوونا تەحەدیێن ئاڤاکرنا ئاشتیێ ل سەر ئاستێن ناڤخۆیی، هەرێمی و نێڤدەولەتی. کارێ سەنتەری تیشکێ دئێخیتە سەر تێگەهشتنا دینامیکیێن سیاسی، جڤاکی و ئابووری ژ دیتنەکا نشتیمانی و جیهانی.

بوارێن ڤەکۆلینێن سەنتەری ئەڤێن ل خوارێ ب خۆڤە دگرن:

• ئاشتی و نه‌کۆکی (النزاعات).
• پەیوەندیێن ئەتنیکی و ئایینی.
• دیموکراسی و مافێن مرۆڤی.
• حوکمڕانیا باش و دادپەروەریا جڤاکی.
• کۆچبەر و ئاوارەبوون.
• ئاشتی ب رێیا گەشەپێدانا ئابووری.

ب رێیا ڤان بزاڤان، سەنتەر بەردەوامە د پشکداریکردنێ دا بۆ دارێشتنا سیاسەتێن دروست، پێشخستنا ڤەکۆلینێن ئەکادیمی، و ب هێزکرنا رەفتارێن ئاڤاکرنا ئاشتیێ ل هەرێما کوردستانێ، عیراق و رۆژهەلاتا ناڤین ب گشتی.