مامۆستایێ کولیژا زمانان ل زانکۆیا دهۆک، د. یاسرێ حەسەنی، هاتیە ژێگرتن وەکو ئێک ژ دەستەیا ئەدیتۆرێن ئازاد یێن کۆڤارا ناڤدارا بریتانی (واسافیری - Wasafiri) یا تایبەت ب ئەدەبیاتێن هەڤچەرخێن ناڤدەولەتی ڤە.

ئەڤ کۆڤارە، کو ژیێ وێ چل سالن، ل زانکۆیا کوین ماری یا لەندەن ب پشتەڤانیا جڤاتا هونەری یا ئینگلترا و وەشانخانەیا رەوتلج یا جیهانی ب رەنگەکێ وەرزی دەردکەڤیت. واسافیری کۆڤارەکا پیر-ریڤیۆیە ب زمانێ ئینگلیزی بەلاڤ دبیت، گرنگیێ ددەتە کارێن داهێنانکی یێن ئەدەبی و یێن ئەکادیمی ل سەرانسەری دنیایێ، و ئێکە ژ کۆڤارێن پایەبلندێن بریتانی کو ل ئیندێکسا کلاریڤەیت یا جیهانی هاتیە تۆمارکرن.

د. یاسری دیارکر، کو ئەو ل گەل چوار کەسێن دی ژ رۆژهەلاتا ناڤین هاتینە ژێگرتن بۆ کارکرنێ ل گەل ڤێ کۆڤارێ بۆ دەمێ دو سالان، ئەو ژی پشتی ناڤێن وان هاتینە شورت-لیستکرن و چاڤپێکەفتن ل گەل هاتینەکرن و نڤیسینێن وان هاتینە هەلسەنگاندن.

د. یاسری دکتۆرایا خۆ ژ زانکۆیا ئێکستەر یا بریتانی د وارێ ڤەکۆلینێن کوردی دا وەرگرتیە و ل سالا ٢٠٢١ پەرتووکەکا هەڤپشک ل گەل دو مامۆستایێن هەمان زانکۆیێ ل ژێر ناڤونیشانێن "دەنگێ ژنان ژ کوردستانێ: کۆمەکا هلبژارتی ژ هەلبەستێن کوردی" ل لەندەن چاپکریە.

راگەهاندنا زانکۆیا دهۆک، ١٧ـی تیرمەهێ ٢٠٢٤