ئەڤرۆ رۆژا شەمبی، رێكەڤتی ١٤ـی كانوینا ئێكێ ٢٠٢٤، كۆمبوونەك ب سەرۆكاتیا د. داود سلێمان ئەتروشی، سەرۆكێ زانكۆیا دھۆك ل گەل رێڤەبەر و هژمارەکا ستافێ رێڤەبەریا ئەندازە و پرۆژەیان، گەنگەشا پێشڤەچوون و دەستنیشانكرنا پلانێن داھاتی یێن ڤەگوھاستنا كەمپا زانكۆیێ بۆ رووبەرەكێ كەسك و پیادەدۆست ھاتەكرن، ئەڤ دەستپێشخەریە، ئارمانجەکا ستراتیژیا زانکۆیا دهۆکە لدۆر دۆمداری و گەشەپێدانا ژینگەھێ.

د کۆمبوونێ دا، ھەر ئێك ژ د. دلشاد عەبدولجەبار حەلیم، ھاریكارێ سەرۆكێ زانكۆیێ بۆ كاروبارێن كارگێری و دارایی و د. نەبەز ئیبراھیم محەمەد ھاریكارێ سەرۆكێ زانكۆیێ بۆ كاروبارێن قوتابیا و د. دیلان مەجید روستەم، راوێژكارێ سەرۆكێ زانكۆیێ بۆ ڤەگوھاستنا دیجیتالی و ئەندازیار حاجی ئیسماعیل، رێڤەبەرێ رێڤەبەریا ئەندازە و پرۆژان ئامادەبوون و پشکداری د گەنگەشەیان دا کر.

د. دلشاد عەبدولجەبار حەلیم، دویماھی کار و پێشھاتێن ھاتینە ئەنجامدان بۆ باشتركرنا پیادەسازیێ ل كەمپا زانكۆیێ و پلانێن ھەڤپشك بۆ دروستکرن و پێشڤەبرنا جھێن پیادەدۆست پێشكێشكر. دیسان د. نەبەز ئیبراھیم محەمەد تەكەز ل سەر گرنگیا بەرفرەھكرنا رووبەرێن كەسك بۆ پەیداكرنا ژینگەھەكا دۆمدارتر كر. ژ لایێ خۆڤە د. دیلان مەجید رۆستەم گرنگیا كارگێریا ژێدەرێن ئاڤێ بۆ پالپشتیكرنا دیدا زانكۆیێ بۆ پێشڤەبرنا کەمپەکا کەسک و پیادەدۆست. ژ لایێ خۆ ڤە، ئەندازیار حاجی ئیسماعیل رۆلێ سەرەكی یێ رێڤەبەریا ئەندازە و پرۆژان د جێبەجێكرنا ڤان پلانان دا دیاركر.

ئارمانجا زانكۆیا دھۆك ڤەگوھاستنا كەمپا زانكۆیێ یە بۆ كەمپەكا کەسک و پیادەدۆست كو پەرەپێدانا پەیوەندیكرنێ و ژینگەھێ بكەت. ئەڤ ھەولە رەنگڤەدانا رژدیا زانكۆیا دھۆك د دابینكرتا كەش و ھەوایەكێ ئەكادیمی و ساخلەم دكەت كو ل گەل ئارمانجێن دۆمداریا نوی بگونجن.

ب رێكا پەرەپێدانا ژێرخانا كەسك و دەستپێشخەریێن ژینگەھێ، زانكۆیا دھۆك ھەولددەت پیشەنگ بیت ل دەڤەرێ د پێشئێخستنا كەمقا زانكۆیێ یا دۆمدار، كو ببیتە نموونەك بۆ بەرپرسیارەتیا ژینگەھێ و نویكرنێ د خواندنا بلند دا.

راگەھاندنا زانكۆیا دھۆك؛ ١٤ـی كانوینا ئێكێ ٢٠٢٤

عسمەت م محەمەد و ماهر طاهر كێستەیی

فۆتۆ: محەمەد عەبدولكەریم