كوژیێ ئەمریکی ل زانکۆیا دهۆک مێڤانداریا سیمینارەکا بەرچاڤ کر ل دۆر: "بدەستڤەئینانا ڤیزا F1 ویلایەتێین ئێكگرتی یێن ئەمریكا بۆ مەرەمێن ئەكادیمی" ل پەرتوکخانا ناڤەندی، ل 17ـی چریا دووێ 2024. سیمینار کو شایەتحالێ بەژداریکرنا قۆتابیان و دەرچووان و ستافێ ئەکادیمیێ زانکۆیا دهۆک بوو، تێدا مفایێن بدەستڤەئینانا ڤیزا F1 و شێوازێن چافپێکەفتنا ڤیزا سەرکەفتی نیشان دا. چالاکی ژ لایێ ئەندرۆ فرانکس، ئەفسەرێ قونسولگەری ل قونسولخانەیا گشتی یا ئەمریکا ل هەولێرێ هاتە سەرپەرشتی کرن.

د سیمینارێدا زانیاریێن ب بها پێشکێشی قوتابی و ستافێ زانکۆیا دهۆک کرن سەبارەت ب پرۆسەیا پێشكێشكرنا داخوازیا ڤیزا F1، کو پێدڤییە بۆ خواندنا ئەکادیمی ل ئەمریکا. ئامادەبوویان تێگەهشتنەکا گشتگیر د پیڤەرێن شایستەیی و مەرجێن بەلگەنامە و پێنگاڤێن پێدڤی ب دەستەبەرکرنا ڤیزا قوتابی یا ئەمریکی بدەستڤەئینا. ئەندرۆ فرانکس ئامۆژگارێ پراکتیکی سەبارەت ب چەوانیا ئامادەکاری بو چاڤپێکەڤتنا ڤیزەیێ باس کر و بەرسڤا هندەک ژ پرسیارێن بەژداربوویان دا کو حەز هەیە دەرفەتا خو یا ئەکادیمی و ڤەکولینێ ل ئەمریکا بەرفرەهتر بکەن.

ل دەمێ سیمینارێ دا، بەڕێز ئەندرۆی ڕوونکر کو خواندن ل ئەمریکا یا مفادارە ژبەر زیدەییا هاریکاریان و سکۆلەرشیپان، دەرفەتا ڤەکۆلینێ و وان کەمپێن جوراوجور کو ئەمریکا ب خو ڤە دگریت. جورێن ڤیزا قۆتابی بریتینە ژ: ڤیزا F (بۆ قۆتابیێن پرۆگرامێ ئەکادیمی یان زمانی)، ڤیزا M (بۆ قۆتابیێن پیشەیی یان قۆتابیێن دی یێن نە ئەکادیمی)، و ڤیزا J (بو سەردانکەرێن ئالۆگور و قۆتابیێن ئامادەیی و قۆتابیێن کۆلیژ/زانکۆیان، یان-قۆتابیێن بێ باوەرنامە).

هەروەسا، هندەک بەڵگەنامەیێن پێدڤی ل پروسەیا داخازا ڤیزێ دا ڕوونکر، ژ وانا فۆڕما I-20 کو تە وەک وەرگرەکێ فەرمی دێ ل زانکۆیێ دا تۆمار کەت؛ فۆرما DS-160، کو زانیاریێن دەستپێکی یێن داخازکەری و مێژوویا گەشتەکرنێ بخۆڤەدگریت؛ و SEVP، و SEVIS، کو کۆدن بۆ قۆتابیان دهێنە تەرخانكرن د ماوەیێ مانا وان ل ئەمریکا. ئەڤ کۆدە زانیاری و ئامادەبوونا قۆتابیان بخوڤە دگرن.

هەروەسا، سیمینارێ پروسەیا دانانا دەمێن چاڤپێکەڤتنێ ب خوڤەگرت پشتی پڕکرنا فۆڕما DS-160، ب سەرەدانا مالپەرێ قۆنسوڵخانەیا گشتی و بەرسڤدانا هندەک ژ پرسیاران. ئاماژە ب هندێ ژی هاتە کرن کو داخوازیێن ڤیزا قۆتابیان دشێن پشتی چاڤپێکەفتنێبلەزتر بهێتە وەرڤرتن ژ جورێن دی یێن ڤیزەیان. ژ لایەکێ دی ڤە، سیمینارێ جەخت ل سەر چەوانیا برێڤەبرنا پرۆسەیا چافپێکەفتنێ کر، ئامۆژگاریا قۆتابیان هاتە کرن کو ب ڕوونی ئارمانجێن خۆ بو وان پرۆگرامان دیاربکەن یێن وان هەلبژارتین.

ئەڤ چالاکییە پشكەك بوو ژ بزاڤێن بەردەوامێن زانکۆیێ بو پەرەپێدانا هاریکاریا ئەکادیمیا ناڤدەولەتی و پشتگریکرنا ئەندامێن ستافێ خۆ د بەرفرەهکرنا تۆڕێن ڤەکۆلینێن وان د ئاستێ جیهانی دا. هەروەسا، تیشک ئێخستە سەر پابەندبوونا زانکۆیا دهۆک بۆ بلندکرنا بزاڤا ئەکادیمی و دابینکرنا ژێدەرێن پێدڤی بۆ ستافێ خۆ بو دویفچوونا خواندنا بلند و دەرفەتا ڤەکۆلینێ ژ دەرڤەی وەڵاتی.

زانکۆیا دهۆک ب خۆشحالی ڤە چاڤەڕێی بەردەوامبوونا هەڤپشکیا خۆ دگەڵ قونسوڵخانەیا گشتی یا ئەمریکی و سازیێن ناڤدەولەتی یێن دی یە بۆ پێشکێشکرنا دەرفەتێن هەڤشێوە بۆ پەرەپێدانا ستافی و گەشەکرنا ئەکادیمی.

راگەهاندنا زانكۆیا دهۆك،

فاطمة محمود

وەرگێران: مێهڤان م. سالح

فۆتۆ: عەلی بانكی