زانكۆیا دهۆك، تیرمەها ٢٠٢٦ | نڤیسینگەها راگەهاندنا زانكۆیێ (UNPO) – هەر دەرچوونەك نیشانا ب دوماهی هاتنا سەركەڤتیانە یا چەندین سالێن بەردەوامی، حەزا زانینێ و دەستكەڤتێن ئەكادیمیە. ل زانكۆیا دهۆك، وێنەگرتنا دەرچوونێ پترە ژ دەرفەتەكێ بۆ پاراستنا بیرەوەریان — ئەو پیرۆزباھیێ ل گوهۆڕینا قوتابیان دكەت بۆ كەسێن پرۆفیشناڵ كو د بەرهەڤن بۆ خزمەتكرنا زانست، داهێنان و جڤاكی.

كۆلیژا زانست ب شانازی ڤە دەستخۆشی ل دەرچوویێن سالا ٢٠٢٦ كر، ب وینەگرتنەكێ كو تێدا دەرچووی، ئەندامێن ستافێ ئەكادیمی و هەڤال كۆمكرن د كەشەكێ پڕی شانازی، سوپاسگوزاری و گەشبینیێ دا. د دەمەكی دا كو دەرچووی كۆم بوون بۆ ساخكرنا ڤێ قۆناغا گرنگ، ڤێ هەلكەڤتێ نە ب تنێ دەستكەڤتێن وان یێن ئەكادیمی نیشان دان، بەلكو دەستپێكا كاروانەكێ پیشەیی یێ كو تەرخانكریە بۆ ڤەدیتنێن زانستی و پێشخستنا جڤاكی.

دەربارەی كۆلیژێ

كوۆیژا زانست ل سالا ١٩٩٧ هاتییە دامەزراندن، و بوویە ئێك ژ دەزگەهێن پێشەنگ یێن ئەكادیمی و ڤەكۆلینێ ل زانكۆیا دهۆك. ل دەستپێكێ ب تنێ پشكێن

فیزیك و ماتماتیك هەبوون، لێ كۆلیژ بەرفرەهـ بوویە و نوكە شەش پشكێن ئەكادیمی ب

خۆڤە دگریت:

- فیزیك

- ماتماتیك

- كیمیا

- زیندەوەرزانی

- زانستێ كۆمپیوتەری

- جیۆلۆجی

كۆلیژا زانست پرۆگرامێن بەكالۆریۆس و خواندنا بلند پێشكێش دكەت، كو خواندنا تیۆری

یا هویر دگەل ئەزمۆنا تاقیگەها پراكتیكی، خواندنێن مەیدانی، فێربوونا ل سەر بنەمایێ ڤەكۆلینێ، و تەكنۆلۆژیایێن سەردەم پێكڤە گرێ ددەت. د سێ دەهەیێن بوری دا،

كۆلیژێ ب هزاران دەرچووی پێگەهاندینە كو نوكە د بوارێن پەروەردە، ڤەكۆلینێن زانستی، چاڤدێریا تەندروستی، پاراستنا ژینگەهێ، تەكنۆلۆژیا، وزە، و خزمەتگوزاریێن گشتی دا ل سەر ئاستێ نیشتیمانی و ناڤدەولەتی خزمەتێ دكەن.

رێزگرتن ل دەرچوویێن سالا ٢٠٢٦

دەرچوویێن ئەڤ سالە قۆناغەكا دی یا گرنگ د ئەركێ بەردەوام یێ كۆلیژێ دا نیشان ددەن بۆ ئامادەكرنا زانایێن خودان شیانێن بلند كو دشێن خزمەتەكا بەرچاڤ بۆ جڤاكی بكەن. د درێژیا كاروانێ خۆ یێ ئەكادیمی دا، دەرچوویان ب سەركەڤتیانە كۆرسێن چڕ، ئەزمۆنێن تاقیگەهێ، پرۆژەیێن ڤەكۆلینا زانستی، سیمینار،

خواندنێن مەیدانی، و چالاكیێن تێكەلبوون ب جڤاكی ڤە ب دوماهی ئینان. دەرچوونا وان نیشانا سالان ژ پێگیری، خۆڕاگری، و فێربوونا بەردەوامە، د هەمان دەم دا وان ئامادە دكەت دا ببنە ڤەكۆلەر، مامۆستا، داهێنەر، و كەسێن پرۆفیشناڵ یێن بەرهەڤ بۆ رووبڕووبوونا ئالنگاریێن زانستی یێن سەردەم.

ئامادەكرنا زانایان بۆ پاشەڕۆژێ

دەرچوویێن كۆلیژا زانست زانكۆیێ ب جهدهێلن د دەمەكی دا كو یێن چەككری نە ب زانین و ئەزمۆنا پراكتیكی یا پێدڤی بۆ بدەستڤەئینانا دەرفەتێن كاركردنێ یێن جۆراوجۆر. ل دویڤ تایبەتمەندیا خۆ، ئەو یێن ئامادەكری نە بۆ كاركردنێ د دەزگەهێن پەروەردەیی و خواندنا بلند، سەنتەرێن ڤەكۆلینێن زانستی،

تاقیگەهێن نۆژداری و دەستنیشانكرنێ، پیشەسازیێن بایۆتەكنۆلۆجی و دەرمانسازی، ژیریا دەستكرد و پەرەپێدانا سۆفتوێر، زانستێ داتایان، وزەیا نووبووی، پاراستنا ژینگەهێ، لێگەڕیانێن جیۆلۆجی، دامەزراوەیێن حكومەتێ، رێكخراوێن ناڤدەولەتی، كۆمپانیایێن تایبەت، و پرۆژەیێن كارگێڕی (پێشەنگسازی).

گەلەك ژ دەرچوویان دێ كاروانێ خۆ یێ ئەكادیمی د پرۆگرامێن ماستەر و دكتۆرایێ دا ل زانكۆیێن پێشەنگ ل دەڤەرێ و ل سەرانسەری جیهانێ درێژی پێ دەن، كو پتر خزمەتا پێشكەڤتنا زانستی و داهێنانێ دكەن.

فێربوون ل دەرڤەی پۆلا خواندنێ

خواندن ل كۆلیژا زانست گەلەك بەرفرەهترە ژ وانە و ئەزمۆنان. د درێژیا سالێن خواندنێ دا، قوتابیان شیانێن خۆ یێن پراكتیكی ب هێزتر كرن ب رێیا ئەزمۆنێن نوی یێن تاقیگەهێ، خواندنێن مەیدانی، پرۆژەیێن ڤەكۆلینا زانستی، كۆنفرانس، سیمینار، هەڤڕكیێن داهێنانێ، دەستپێشخەریێن تێكەلبوون ب جڤاكی ڤە، و چالاكیێن فێربوونێ یێن پالدای ب تەكنۆلۆژیایێ. ئەڤ ئەزمۆنە نە ب تنێ شارەزایییا زانستی یا قوتابیان بەرەڤ پێش برن، بەلكو شیانێن كارێ ب كۆم، پەیوەندیكرن، سەركردایەتی، و چارەسەركرنا گرفتان ژی پێشخستن كو بۆ كاروانەكێ پیشەیی

یێ سەركەڤتی د گرنگن. قوتابیان هەروەسا مفا ژ پشكداریکرنێ د رێكخراوێن پیشەیی یێن ب ئاستێ ناڤدەولەتی ناسكری وەرگرتیە، ژ وان ژی لقێ قوتابیان یێ كۆمەڵا كیمیا یا ئەمریكی (ACS)، لقێ قوتابیان یێ كۆمەلیا قوتابیێن فیزیایێ (SPS)، و لقێ قوتابیان یێ كۆمەلا ئەندازیارێن پەترۆلێ (SPE). دگەل (H₂ Hub)، ئەڤ دەستپێشخەریە ژینگەهەكا زیندی بۆ داهێنان، پێشخستنا سەركردایەتیێ، پێشەنگسازی و هەڤكاریا

ناڤدەولەتی دروست كرن، كو تۆرێن پیشەیی یێن ب بها و شارەزایەكا جیهانی ب دەرچوویان

بەخشیە.

ڤەكۆلین بەرەڤ چارەسەركرنا ئاستەنگێن جیهانا راستەقینە

ڤەكۆلینا زانستی وەكی بنەمایەكێ سەرەكی یێ ئەركێ ئەكادیمی یێ كۆلیژێ دمینیت. د دەمێ خواندنا خۆ دا،

دەرچوویان پشكداری د ڤەكۆلینان دا كرینە كو چارەسەریا هندەك ژ ئاستەنگێن هەستیار یێن ئەڤرۆ دكەن، وەكو وزەیا نووبووی، دۆمداریا ژینگەهێ، خواندنێن سەقا و ئاڤوهەوای، ژێدەرێن ئاڤێ، ژیریا دەستكرد، بایۆتەكنۆلۆجی، زانستێ ماددەيان، دەستنیشانكرنێن نۆژداری، لێگەڕیانێن جیۆلۆجی، و مۆدێلكرنا كۆمپیوتەری. گەلەك قوتابیان پرۆژەیێن ڤەكۆلینا دەرچوونێ ب دوماهی ئینان كو تیۆرا زانستی دگەل

بجهئینانا پراكتیكی گرێ ددەن، كو داهێنان، ئافراندن، و پێگیری بۆ بەرهەمئینانا ڤەكۆلینەكێ كو مفا ب جڤاكی و ژینگەهێ هەردوكان بگەهینیت، نیشان ددەن.

هەڤپەیمانیێن ب هێز دگەل پیشەسازی و جڤاكی

كۆلیژ هەڤكاریێن چالاك دگەل دامەزراوەیێن حكومی، سەنتەرێن ڤەكۆلینێ، نەخۆشخانەیان، كۆمپانیایێن تەكنۆلۆژیایێ، كۆمپانیایێن

پەترۆل و گازێ، و رێكخراوێن ناڤدەولەتی دپارێزیت. ئەڤ هەڤپەیمانیە دەرفەتێن راهێنانێ، ڤەكۆلینێن كرداری، تۆرێن پەیوەندیێن پیشەیی، و ئەزمۆنێن پراكتیكی بۆ قوتابیان پەیدا دكەن كو وان بۆ داخوازيێن گوهۆڕبار یێن بازاڕێ كاری ئامادە دكەن.

دەنگێ دەرچوویان

- دەرچوویێ پشكا فیزیك: "خواندنا فیزیكێ ئەز فێر كرم كو ب شێوەیەكێ رەخنەیی هزر بكەم، ئاریشەیێن ئالۆز چارەسەر بكەم، و حەزا زانینێ بەردەوام بیت د ناخێ من دا. ئەز یێ بەرهەڤم بۆ ئەنجامدانا ڤەكۆلینان د بوارێ وزەیا نووبووی و پالدانا

داهێنانا زانستی دا."

- دەرچوویێ زانستێ كۆمپیوتەری: "هەڤسەنگیا د ناڤبەرا تیۆری و جێبەجێكرنا پراكتیكی دا - ب رێكا پرۆژەیان، كارێ ب كۆم، و تەكنۆلۆژیایێن سەردەم - باوەری ب من بەخشی دا كو كاروانێ خۆ یێ كاری د بوارێ ژیریا دەستكرد و پەرەپێدانا سۆفتوێر دا دەستپێبكەم."

- دەرچوویێ زیندەوەرزانی: "ئەزمۆنێن تاقیگەهێ و دەرفەتێن ڤەكۆلینێ ئەز ئامادە كرم بۆ زانستێن نۆژداری و زیندەوەرزانی. ئەز ب پەرۆشم بۆ خواندنا بلند و باشتركرنا چاڤدێریا تەندروستی."

- دەرچوویێ كیمیا: "هەر وانەیەكا تاقیگەهێ زانینا من یا زانستی ب هێز كر، دگەل پێگیرییا من ب كاركرنەكا بەرپرسیارانە و ب سەلامەتی. ئەز یێ كەیفخۆشم كو دەست ب كاركرنێ بكەم د تاقیگەهێن پیشەسازی دا."

- دەرچوویێ ماتماتیك: "ماتماتیكێ ئەز فێری هزرا لۆژیكی، بەردەوامی و هویربینیێ كرم

- ئەڤە ئەو شیانن كو دێ خزمەتا من كەن د بوارێن پەروەردە، دارایی، زانستێ داتایان، یان ڤەكۆلینێ دا."

- دەرچوویێ جیۆلۆجی: "گەشتێن مەیدانی و راهێنانێن پراكتیكی ئەزمۆنەكا بێهاوتا یا جیهانا راستەقینە ب مە بەخشی. ئەز هیڤیدارم بشێم خزمەتێ بكەم د برێڤەبرنا بەردەوام یا ژێدەران و پاراستنا ژینگەهێ دا."

شیرەت بۆ قوتابیێن پاشەڕۆژێ "باوەری ب خۆ هەبە، حەزا زانینێ د ناخێ تە دا بمینیت، پرسیاران بكە، و چ جاران ژ فێربوونێ نە راوەستە." "مفای ژ هەر وانەیەكا تاقیگەهێ، وۆركشۆپ، و دەرفەتەكا ڤەكۆلینێ وەرگرە." "سالێن تە یێن زانكۆیێ دەربارەی ڤەدیتنا شیانێن تە نە—نە ب تنێ بدەستڤەئینانا باوەرنامەیەكێ."

رۆژەك بۆ بیرئینانێ

وێنەگرتنا دەرچوونێ بیرەوەریێن نەهێنە ژبیكرن دروست كرن د دەمێ كو دەرچوویان پیرۆزباھیا ڤێ قۆناغا گرنگ دكر ل گەل هەڤالێن كۆلیژێ، مامۆستا، خێزان، و هەڤالێن خۆ. هەر وێنەیەك كەیفخۆشیا دەستكەڤتان، هەڤالینیێن د ماوەیێ سالێن خواندنێ دا هاتینە ئاڤاكرن، و ئەو شانازیا هەڤپشك ژ لایێ وان كەسێن كو پشتەڤانیا دەرچوویان كری د درێژیا كاروانێ وان یێ ئەكادیمی دا، د پاراستن. ژبلی

(گرنژین) و كیەفخۆشیێ، ئەڤ هەلكەڤتە نیشانا دەربازبوونێ بوو ژ ژیانا زانكۆیێ بۆ

كاروانێن پیشەیی ل دەمێ كو ئەڤ دەرچوویە دێ ب زانین، داهێنان، و شارەزاییا خۆ یا

زانستی پشكداریێ د چارەسەركرنا ئاستەنگێن ناڤخۆیی و جیهانی دا كەن.

نێڕین بەرەڤ پاشەڕۆژێ

كۆالیژا زانست دێ یا پێگیر مینیت ب پشتەڤانیكرنا دەرچوویێن خۆ د قۆناغێن پشتی دەرچوونێ دا ژی ب رێیا هەڤكارییا بەردەوام دگەل دەرچوویێن خۆ، چالاكیێن زانستی، دەرفەتێن پێشخستنا پیشەیی، و هەڤكاریێن ڤەكۆلینێ.

ڤێرە كلیك بكە بۆ دیتنا گالەریا وێنەیێن دەرچوونێ

نڤیسینگەها ڕاگەهاندنا زانكۆیێ، تیرمەها ٢٠٢٦

راپۆرت: فاطمە محمود عەلی، نژین

وێنەگرتن: عەلی حەبیب حەبیب، محەمەد ع. تاهر، هەرمان جانگیر ئەحمەد، مێهڤان م. سالح