زانکۆیا دهۆک (UOD)، ٣١ـی گولانا ٢٠٢٦، نڤیسینگەها راگەهاندنا زانکۆیێ (UNPO) | ل دەمێ ئەم باسی دەرچوونێ دکەین، ئەم نە ب تنێ ب دوماهی هاتنا قۆناغەکا خواندنێ پیرۆز دکەین؛ بەلکو ئەم گەشەکرنا نڤشەکێ نوی ژ سەرکردەیان پیرۆز دکەین یێن کو دێ هەرێما مە پێشئێخن. ب مەرەما دیارکرنا وێنەگرتنا دەرچوونا کۆلیژا کارگێری و ئابووری، ئەم هەوە داخوازدکەین دا كو چیرۆک و دەستکەڤتێن دەرچوویێن گەرا ٣١ـێ یێن ساڵا ٢٠٢٦ـێ ببینن.

دەربارەی کۆلیژێ

کۆلیژا کارگێری و ئابووری، کو ل رێکەڤتی ٣١ـی کانوونا دووێ ١٩٩٦ هاتیە دامەزراندن و دکەڤیتە دناڤ کەمپا زانکۆیێ دا، ئێکە ژ ستوونێن زانستی و کۆلیژێن بنەمایی یێن زانکۆیا دهۆک. ل ساڵا خواندنێ ١٩٩٦–١٩٩٧ دەست ب وەرگرتنا قوتابیان کریە، و ژ وی دەمی وەرە ب بەردەوامی قوتابیان ژبۆ بازارێ کاری و خزمەتا جڤاکی ئامادەدکەت. هەتا ئەڤرۆ، ٣٠ گەر ژ ئەڤێ کۆلیژێ دەرچووینە.

پرۆگرامێ خواندنا بەکالۆریۆسێ بۆ ماوێ چوار ساڵان بەردەوام دبیت، دگەل پرۆگرامێن دبلۆم، ماستەر و دکتۆرا ل هەندەک پشکان. ئەڤ کۆلیژە ب پسپۆریێن خۆ یێن جودا جودا ژ شەش پشکێن سەرەکی پێکدهێت:

* پشکا ئابووری

* پشکا کارگێریا کار

* پشکا ژمێریاری

* پشکا ئامار و زانیاری

* پشکا زانستێن دارایی و بانکی

* پشکا کارگێریا بازارگەری

نڤشەکێ نوی ژ سەرکردەیێن کارگێڕی و ئابووری

دەرچوویێن کۆلیژێ یێن سالێن بۆری نوکە ل کەرتێن حکومی و تایبەت، بانک، و بوارێن ئابووری، کارگێری، دارایی، ژمێریاری و ئامار و زانیاری کار دکەن، و هەندەک ژ وان ژی ڤەکۆلین و خواندنا بلند بەردەوام دکەن.

وەک پێنگاڤەکا سەردەمیانە بۆ ئامادەکرنا ڤی نڤشێ نوی، ل سالا ٢٠٢٥ـێ و ل دویڤ ڕێنمایێن وەزارەتا خواندنا بلند و ڤەکۆلینێن زانستی، کۆلێژا کارگێڕی و ئابووری وەک دەستپێشخەری پڕۆژەکێ تاقیگەری (Pilot Program) دەستپێکر بۆ پرۆگرامێ خواندنێ یێ "شارەزاییێن کارکرنێ" (Employability Skills) بۆ قوتابیێن قۆناغا چوارێ ل هەمی پشکێن زانستی. ل ساڵا ٢٠٢٦ـێ و پشتی سەرکەڤتنا ڤی پڕۆژەی، ئەڤ پرۆگرامە ب شێوەیەکێ فەرمی ل قوناغا چوارێ و د وەرزی دووێ دا هاتیە جێگیرکرن. هەروەسا، ل دویڤ پلانێ، پڕۆگرامێ دووێ یێ "كارسازی" (Entrepreneurship) دێ ل ساڵا خواندنێ یا داهاتی ل سەر ئاستێ هەمی پشکێن زانستی هێتە بجهئینان.

چیرۆکەکا گۆڕانکاریێ

ئەڤ گالەرییا وێنەیان ب تنێ کۆمەکا وێنەیان نینە — ڕووماڵکرنا ٣٠ ساڵ ژ هەوڵ، فێربوون و سەرکەڤتنا كۆلیژێ یە. هەر گەرەکا دەرچوونێ چیرۆکەکا تایبەت هەبوویە، و ئەڤ گەرا ٣١ـێ نیشانا وێ یەکێ ددەت کو ئەڤ کۆلیژە ب بەردەوامی ل خزمەتا قوتابیان دایە.

رۆژا وێنەگرتنێ وەک هەمیشە ب تنێ بۆ وێنەگرتنێ نینە، بەلکو ڕۆژا شانازی، پێزانین و هەستێن جوانە. ڕۆژەکا وەسایە کو تێدا کەیفخۆشیا قوتابیان، پشتگیریا مامۆستایان و پشکداریا خێزانێ ب ئاشکرایی دیار دبیت. هەر وێنەیەک ل ڤێ گالەریێ دا چیرۆکەکا تایبەت ل پشت خۆ هەیە — چیرۆکا هەوڵ، ماندیبوون و گەهشتن ب ئارمانجەکێ گرنگ ل ژیانا قوتابیان.

پشکداری کەیفخۆشیێ ببن

ب ڕێز و شانازی ڤە داخوازێ ژ هەمی دەرچوویان، قوتابیان و خێزانێن قوتابیان دکەین کو ئەڤ گالەرییا خۆلا ٣١ـێ ببینن و خۆشیا ئەڤێ سەرکەڤتنێ پارڤە بکەن. پیروزباهیێ ژ دل ل هەمیان دکەین.

بۆ زانیاریێن زێدەتر ل سەر پشک و پرۆگرامێن کۆلیژا کارگێری و ئابووری، سەردانا مالپەرێ فەرمی یێ زانکۆیا دهۆک و مالپەرێ کۆلیژێ بکەن.

ڤێرە کلیک بکە بۆ دیتنا گالەرییا وێنەیێن دەرچوونێ

نڤیسینگەها راگەهاندنا زانکۆیێ، ٣١ـی گولانا ٢٠٢٦

ڕاپۆرت ژلایێ: فاطمە محمود عەلی، سەربەست سەعید ئیسماعیل

وێنەگرتن ژلایێ: محەمەد ع. تاهر، عەلی حەبیب حەبیب، هەرمان جانگیر ئەحمەد