زانکۆیا دهۆك – 9ـی ئیلۆنا 2026، نڤیسینگەها راگەهاندنا زانکۆیێ | د چارچۆڤێ سەرەدانا خۆ یا فەرمی بۆ پارێزگەها دهۆکێ، و ل 8ـی ئیلۆنا 2026ـێ، سەماحەتا سەید عەمار ئەلحەکیم ڕێبەرێ رەوتا حیکمە یا نیشتیمانی و سەرۆکێ هەڤپەیمانیا هێزێن دەولەتا نیشتیمانی، سەرەدانا زانکۆیا دهۆك کر، کو ژ لایێ د. داود سلێمان ئەتروشی سەرۆکێ زانکۆیێ، و ئەندامێن جڤاتا زانکۆیێ و رێڤەبەرێن سەنتەرێن ڤەکۆلینان ڤە پێشوازی لێ هاتە کرن، ب یاوەریا شاندێ دگەل دا.

د پەیڤا پێشوازیکرنێ دا، سەرۆکێ زانکۆیا دهۆك گرنگیا ڤێ سەرەدانێ وەك ئێکەم سەرەدانا کەسایەتیەکا سیاسی یا دیارا عیراقێ بۆ زانکۆیێ بەرچاڤکر، و هیڤی خواست کو دەرگەهێن نوی بۆ پەیوەندیکرنا د ناڤبەرا سەرکردەیێن نیشتیمانی و زانکۆیان دا ڤەبکەت، و ئەکادیمی، ڤەکۆلەر و گەنجان پشکدار بکەت د دانوستاندنا پرسێن مەزن دا کو ئایندەیێ عیراقێ وێنە دکەن. هەروەسا تەکەز کر کو ئایندەیێ عیراقێ ب تنێ ل دامەزراوەیێن سیاسی ناهێتە ئاڤاکرن، بەلکو ل زانکۆ و سەنتەرێن ڤەکۆلینان و هزرێن گەنجان ژی دهێتە ئاڤاکرن، و گرنگیا وێ چەندێ دیار کر کو داڕشتنا سیاسەتێن گشتی پێدڤیە ل سەر بنەمایێ زانین و ڤەکۆلینا زانستی بیت.

هەروەسا د. ئەتروشی پرسا دامەزراندنا سێ قوتابیێن یەکەم ل سەر ئاستێ پشکێن زانستی و مرۆڤایەتی ل زانکۆیێن هەرێما کوردستانێ بەحس کر، و ئاماژە ب وێ چەندێ دا کو ئەڤ قوتابیە هەر ژ سالا 2017ـێ وەرە مافێ خۆ یێ دامەزراندنێ ب دەستڤە نەئیناینە وەك هەڤتایێن خۆ ژ دەرچوویێن زانکۆیێن دی یێن عیراقێ. داخوازا دیتنا چارەسەریەکا دادپەروەرانە بۆ ڤێ پرسێ ژی کر ب هەماهەنگیێ د ناڤبەرا حکومەتا فیدراڵی و حکومەتا هەرێمێ دا، ب شێوەیەکێ کو مافێن دەرچوویان مسۆگەر بکەت و باوەریا وان ب دادپەروەریێ و دامەزراوەیێن دەولەتێ بهێزتر بکەت.

د لایەکێ دی یێ پەیڤا خۆ دا، سەرۆکێ زانکۆیێ ئاماژە ب پەیوەندیا دیرۆکی یا د ناڤبەرا هەردوو بنەمالێن ئال حەکیم و بارزانی دا کر، کو د قۆناغێن سەخت یێن دیرۆکا عیراقێ دا ل سەر بنەمایێ رووبڕووبوونا زۆرداری و ستەمکاریێ، و باوەریبوون ب دیمۆکراتیێ و مافێن پێکهاتەیێن گەلێ عیراقێ هاتبوو ئاڤاکرن. هەروەسا هیڤی خواست کو ئەڤ پەیوەندیە بەردەوام بیت وەك بنەمایەك بۆ ئاڤاکرنا پرێن نوی و بهێزکرنا باوەریێ د ناڤبەرا بەغدا و هەولێرێ دا و پشتەڤانیکرنا هەڤپشکیا دەستووری و ئایندەیێ عیراقا دیمۆکراتی.

پاشان، ژمارەیەك ژ راگرێن کۆلێژان و رێڤەبەرێن سەنتەرێن ڤەکۆلینان دەرگەهێ دانوستاندن و پێشنیاران ڤەکر و چەندین پرسێن نیشتیمانی باس کرن، ژ وان ژی مادەیێن دەستووری، مافێن کوردان، و هەڤسەنگی و هەڤپشکی ل عیراقێ، و تەکەزی ل سەر گرنگیا دیالۆگا ئەکادیمی و نیشتیمانی کر بۆ چارەسەرکرنا پرسێن هەڤپشك.

ژ لایێ خۆ ڤە، سەماحەتا سەید عەمار ئەلحەکیم پەیڤەك پێشکێشکر و تێدا تەکەزی ل سەر گرنگیا ئێکخستنا نێرین و بۆچوونان، و گۆهداریکرنا ئەکادیمی و هزرێن نیشتیمانی کر، و دیار کر کو سەرەدانا وی بۆ زانکۆیێ د چارچۆڤێ گرنگیدانا وی دایە بۆ هایداربوون ژ رەوشا جادا کوردی و گۆهداریکرنا سەرکردەیێن ئەکادیمی. هەروەسا پشتەڤانیا خۆ بۆ چەمکێ هەرێمان دوپات کر، و تەکەزی ل سەر بەردەوامیا پشتەڤانیا وان بۆ ڤی بنەمای د چارچۆڤێ دەستوورێ عیراقێ دا کر.

شاندێ یاوەرێ سەماحەتی ژی پێکهاتبوو ژ حەجی ریزا جەواد تەقی ئەندامێ مەکتەبا سیاسی، مامۆستا عەبدوڵڵا زەیدی شێوەرمەندێ سەرۆك کۆماری، سەباح سالحی نوینەرێ نڤیسینگەها رەوتا حیكمە ل هەرێمێ، و فازل حەیدەری نوینەرێ رەوتا حیکمە ل هەولێر و دهۆکێ.

ل دوماهیا سەرەدانێ ژی، دیاریێن بیرئینانێ د ناڤبەرا زانکۆیا دهۆك و شاندێ مێڤان دا هاتنە گۆهڕین، د کەشوهەوایەکێ دا کو رەنگڤەدانا گرنگیا پەیوەندی و دیالۆگێ بوو د ناڤبەرا دامەزراوەیێن ئەکادیمی و سەرکردەیێن نیشتیمانی دا.

ڤێرە کلیک بکە بۆ دیتنا وێنەیان

نڤیسینگەها راگەهاندنا زانكۆیێ، 9ـی ئیلۆنا 2026
بەرهەڤکرن: فاطمە محمود عەلی
وێنە: محەمەد ع. تاهر، عەلی حەبیب حەبیب