زانکۆیا دهۆک، تەباخا ٢٠٢٦ | نڤیسینگەها ڕاگەهاندنا زانکۆیێ (UNPO) – زانکۆیا دهۆک ب ئاوایەکێ فەرمی ناڤەندا نوی یا ژیرییا دەستکرد بۆ ڤەكۆلینێ (AI

Research Hub) ل پەرتووکخانا ناڤەندی ڤەکر، کو ئەڤە ژی گۆڕەپانەکا نوی یا پابەندبوونا زانکۆیێ یە بەرڤ بلندکرنا ئاستێ ڤەکۆلینان، نویگەرییێ و ڤەگۆهاستنا دیجیتالی.

ئەڤ ڕێوڕەسمە ب ئامادەبوونا د. لوقمان هادی حەسەن، هاریکارێ سەرۆکێ زانکۆیێ بۆ کاروبارێن زانستی و خواندنا بلند؛ د. نەبەز ئیبراهیم محەمەد، هاریکارێ سەرۆکێ زانکۆیێ بۆ کاروبارێن قوتابیان؛ د. کاروان جەعفەر دوسکی، ڕێڤەبەرێ پەرتووکخانا

ناڤەندی؛ و ژمارەکا ڕاگرێن کۆلیژان، ڕێڤەبەر، نوینەرێن دامەزراوەیێن ژ دەرڤەی زانکۆیێ و مێهڤانێن دیار و پسپۆڕێن بوارێن جودا جودا هاتە ئەنجامدان.

پێشئێخستنا ڤەکۆلینان ب ڕێیا ژیرییا دەستکرد

د. لوقمان هادی حەسەن بگەرمی بخێرهاتنا پشکداران کر و تیشک ئێخستە سەر گرنگییا دامەزراندنا سەنتەرێ ڤەکۆلینێن

ژیرییا دەستکرد وەک پێنگاڤەک بۆ بهێزکرنا ژینگەها ڤەکۆلینێ ل زانکۆیێ و بکارئینانا تەکنۆلۆژیایێن نوی کو دشێن پشتەڤانییا ڤەکۆلەران بکەن و کوالیتییا کارێ ئەکادیمی باشتر بکەن. دامەزراندنا ڤی سەنتەری ڕەنگڤەدانا بزاڤێن زانکۆیا دهۆکە بۆ دابینکرنا

ژێدەرێن ڤەکۆلینێ یێن هەڤچەرخ بۆ جڤاکێ ئەکادیمی و ڕەخساندنا دەلیڤەیان بۆ ڤەکۆلەران دا کو شارەزایی یێن خۆ د بکارئینانا ژیرییا دەستکرد دا ب ئاوایەکێ بەرپرسیارانە و کاریگەر پێشبێخن.

دوو سمینار ل دۆر ژیرییا دەستکرد و دۆکیومێنتکرنا کەلتۆری ڕێوڕەسمێن ڤەکرنێ

دوو سمینارێن تایبەتمەند بخۆڤەگرتن: "تێگەهێن پەرتووکخانێن زانکۆیان د سەردەمێ ژیرییا دەستکرد دا" ژ لایێ د. ئامەد دەمیرهان، ڕێڤەبەرێ یادگەها بارزانی یا نەتەوەیی و "دۆکیومێنتکرن وەک ئامرازەک بۆ پاراستنا کەلتۆرێ نەتەوەیی" ژ لایێ د. سەلاح محەمەد

سەلیم ڤە هاتنە پێشکێشکرن. ل دویڤ هەردوو سمیناران، دانوستاندن و پرسیار و بەرسڤ هاتنە ئەنجامدان، کو دەلیڤە دا پشکدار و پسپۆڕان دیتنێن خۆ لێکبگۆهرن و گەنگەشەیا ڕۆلێ تەکنۆلۆژیایێن نوی، ڤەکۆلین، پەرتووکخانە و دۆکیومێنتکرنێ د پشتەڤانیکرنا

پێشکەڤتنا ئەکادیمی و کەلتۆری دا بکەن.

ناڤەندا ژیرییا دەستکرد بۆ ڤەكۆلینێ ب فەرمی هاتە ڤەکرن

پشتی سمینار و گەنگەشەیان، ناڤەندا ژیرییا دەستکرد بۆ ڤەكۆلینێ ب فەرمی ل پەرتووکخانا ناڤەندی هاتە ڤەکرن، کو ئەڤە دەستپێکەکا نوی یە د دابینکرنا پشتەڤانییا ڤەکۆلینێن هەڤچەرخ ل زانکۆیا دهۆک. ناڤەندا ژیرییا دەستکرد یۆ ڤەكۆلینێ خزمەتگوزارییان پێشکێشی مامۆستا، ڤەکۆلەرێن خواندنا بلند و قوتابیێن بەکالۆریۆسێ دکەت ب ڕێیا دابینکرنا ئامرازێن پێشکەڤتی یێن ڤەکۆلینێ ب پشتەڤانیا ژیرییا دەستکرد، راهێنانێن پسپۆڕی، و ڕێنماییکرن ل سەر بکارئینانا ئێتیکی یا ژیرییا دەستکرد د ڤەکۆلینێن ئەرکدار دا. ب ڕێیا پلاتفۆرمێن مۆڵەتپێدای و سمینار و وۆرکشۆپێن بەردەوام، ئەڤ ناڤەندە هەولددەت کو ئاستێ کوالیتییا ڤەکۆلینان بلند بکەت، هاندانا نویگەرییێ بکەت، دەستپاکییا ئه‌كادیمی بهێزبێخێت، و ڤەکۆلەران ب شارەزایی یێن دیجیتالی پێبگەهینیت دا کو بشێن بەرسڤا

پێداویستیێن خواندنا بلند بدەن.

ئامرازێن ژیرییا دەستکرد پشتەڤانییا پرۆسەیا ڤەکۆلینێ دکەن

ناڤەندا ژیرییا دەستکرد بۆ ڤەكۆلینێ دەستگەهشتنا دامەزراوەیی بۆ کۆمەکا هەلبژارتی ژ ئامرازێن مۆڵەتدای یێن ب پشتەڤانیا ژیرییا دەستکرد دابین دکەت، کو هەر ئێک ژ وان پشتەڤانییا قۆناغێن جودا یێن پرۆسەیا ڤەکۆلینا زانستی و نڤیسینا ئەکادیمی دکەت. ئەڤ ژێدەرە ب مەرەما هاریکاریکرنا مامۆستا، ڤەکۆلەرێن خواندنا بلند، و قوتابیان هاتینە دارێژتن بۆ وێ

چەندێ کارێن خۆ ب کاریگەریەكا پتر ئەنجام بدەن دگەل پاراستنا دەستپاکییا ئەکادیمی و

هەلسەنگاندنا ڕەخنەیی.

ژ وان ئامرازێن کو ل ناڤەندێ بەردەستن:

- ChatGPT: پشتەڤانییا بەرهەمئینان و گەنگەشەکرنا هزرێن ڤەکۆلینێ،

ئامادەکرنا نەخشەیان، نڤیسینا ماددەیێن دەستپێکی یێن ڤەکۆلینێ، و ئەنجامدانا شڕۆڤە و

گەنگەشەیێن هویر ل سەر بابەتێن ڤەکۆلینێ دکەت.

- Grammarly: هاریکارییا ڤەکۆلەران دکەت د باشترکرنا ڕێزمان، پێکهاتەیا رستان،

شێوازێ ئەکادیمی، و تۆنێ نڤیسینێ دا، بۆ بەرهەمئینانا نڤیسینەکا ئەکادیمی یا

ڕوون و پوخت.

- Moonlight: خوینەرەکێ ئەکادیمی یێ PDF یە ب پشتەڤانیا ژیرییا دەستکرد کو

هاریکارییا ڤەکۆلەران دکەت د تێگەهشتنا ئەدەبیاتێن زانستی دا ب ڕێیا دیارکرنا

میتۆدۆلۆژیایێن سەرەکی، شڕۆڤەکرنا زاراڤەیێن ئالۆز، و دابینکرنا هاریکارییێ بۆ

هاوکێشە و خشتەیان.

- Julius: پشتەڤانییا شڕۆڤەکرنا داتایێن چەندایەتی دکەت و هاریکارییا

ڤەکۆلەران دکەت د کارکرن و شڕۆڤەکرنا داتایێن ڤەکۆلینێ دا.

- Elicit: هاریکارییا ڤەکۆلەران دکەت د دیتن و ڕێکخستنا ئەدەبیاتێن ئەکادیمی یێن

پەیوەندیدار دا، هەروەسا دروستکرنا خشتەیێن ڤەکۆلینێ ل سەر بنەمایێ ڤەکۆلینێن

دەستنیشانکری.

- Consensus: پلاتفۆرمەکا گەڕیانا ئەکادیمی یە ب پشتەڤانیا ژیرییا دەستکرد کو

هاریکارییا ڤەکۆلەران دکەت بۆ دیتن، ڕێکخستن، و شڕۆڤەکرنا ئەنجامێن ئەدەبیاتێن

زانستی یێن پێداچوون بۆ کری.

- Turnitin: پشتەڤانییا دەستپاکییا ئەکادیمی دکەت ب ڕێیا دەستنیشانکرنا لێکچوونان

د کارێن پێشکێشکری دا و دابینکرنا ئامرازان کو هاریکارن د پاراستنا ڕەسەنایەتی

و پراکتیزەکرنا بەرپرسیارانە یا ئەکادیمی دا.

ڤەکرنا ناڤەندا ژیرییا دەستکرد بۆ ڤەكۆلینێ دەستكەڤتەکێ گرنگە بۆ زانکۆیا دهۆک و پابەندبوونا وێ ب ئاڤاکرنا ژینگەهەکا ڤەکۆلینێ یا هەڤچەرخ و پشتەڤانیکری ب تەکنۆلۆژیایێ بهێزتر دکەت، کو جڤاکێ وێ یێ ئەکادیمی پێش دێخیت و پشکدارییێ د بەرەڤپێشبرنا زانینێ دا دکەت.

ڤێرە كلیك بکە بۆ دیتنا وێنەیان

نڤیسینگەها ڕاگەهاندنا زانکۆیێ، تەباخا ٢٠٢٦

ئامادەکرن: فاطمە محمود علی

وێنەگرتن: محەمەد ع. تاهەر