زانکۆیا دهۆك، ٧ـی چریا دووێ، ٢٠٢٦، نڤیسینگەها راگەهاندنا زانکۆیێ (UNPO) | ژ پێخەمەت بهێزکرنا هەڤکاریا هەرێمی و ناڤدەولەتی د پاراستنا بۆماوێ کەلتۆری دا، زانکۆیا دهۆك وەك رێکخەرا سەرەکی یا پرۆژێ (Erasmus+ TRANSITION)، پشکداری د ئێکەمین کۆنفرانسێ جەماوەری دا کر کو ژ لایێ زانکۆیا زاخۆ ڤە ل رۆژێن ٢–٣ـی چریا دووێ ٢٠٢٦ـێ هاتبوو مێهڤانداریکرن. کۆنفرانسی نوینەرێن زانکۆیێن هەڤپشک، دەستە و رێڤەبەریێن کەلەپؤری، بسپۆرێن ئەکادیمی و لایەنێن پەیوەندیدار کۆمکرن دا کو گەنگەشێ ل سەر وان مەترسیان بکەن یێن رووبرووی بۆماوێ بەرجەستە و نەبەرجەستە) دبن، دگەل گەریان ل دویڤ رێیێن هەڤپشک بۆ پاراستنا وان.

ب ناڤێ زانکۆیا دهۆك، د. دلشاد عەبدولجەبار حەلیم، هاریکارێ سەرۆکێ زانکۆیێ و رێکخەرێ پرۆژێ TRANSITION، دگەل شاندەکێ رێڤەبەریا پەیوەندیێن ناڤدەولەتی (DOIR) پشکداری د کۆنفرانسی دا کر. د. دڵشاد پەیڤا ڤەکرنێ پێشکێشکر و تێدا ئارمانجێن پرۆژەی و بەرنامێ کۆنفرانسی بەرچاڤکرن، و دوپاتی ل سەر گرنگیا هەڤکاریا د ناڤبەرا سازیێن ئەکادیمی و لایەنێن پەیوەندیدار کر بۆ چارەسەرکرنا ئاستەنگێن پاراستنا بۆماوێ کەلتۆری.

کۆنفرانس ل ژێر درووشمێ "بڕێڤەبرنا مەترسیان بۆ کەلەپوورێ کەلتووری یێ د مەترسیێ دا" بڕێڤە چوو، و رێکێن دەستنیشانکرن، شیکاریکردن، هەلسەنگاندن، چارەسەرکرن و چاڤدێریکرنا وان مەترسیان گەنگەشە کرن یێن گەفێ ل کەلەپووری دکەن. بەرنامێ کۆنفرانسی چەندین گوتارێن سەرەکی، دانوستاندنێن بسپۆران و پانێلێن گەنگەشەیێ بخۆڤەگرتبوو، کو بوویە سەکۆیەك بۆ ئاڵوگۆڕکرنا زانین و ئەزموونان دەربارەی پاراستنا بۆماوەی ل عیراقێ و دەڤەرێ ب گشتی.

د روينشتنێن سەرەکی دا، خانم ئانا کارڤالۆ ژ زانکۆیا ئێڤۆرا یا پورتوگالی پێشکێشکرنەک دەربارەی مەترسی و دەرفەتێن گرێدایی بڕێڤەبرنا بۆماوەیێ بەرجەستە و نەبەرجەستە پێشکێشکر، ل دویڤ دا د. کارمێل عەقیل ژ زانکۆیا دهۆك بابەتەک ل دۆر بزاڤێن فرەلایەن بۆ پاراستنا بۆماوەیێ د مەترسیێ دا ل عیراقێ و دەڤەرێ پێشکێشکر.

هەروەسا پانێلەکێ تایبەت ل ژێر ناڤونیشانێ "کێ بۆماوەیێ د مەترسیێ دا دپارێزیت؟ دامەزراوە، هێزێن ئەمنی، زانکۆ و جڤاکێن خۆجهی" ب پشکداریا نوینەرێن دەزگەهێن کەلەپووری، ئەکادیمی و جڤاکێ مەدەنی هاتە سازکرن بۆ دانوستاندنێ ل دۆر بەرپرسیارەتیێن سازیاتی و رۆلێ جڤاکێن خۆجهی. بەرنامەی دیسان روینشتنێن دی ل دۆر بۆماوەیێ کەلتۆری، جڤاکێن کێمینە و شێوازێن کرداری بۆ بڕێڤەبرنا مەترسیان بخۆڤەگرتبوو.

کۆنفرانس ب گەنگەشەیەکا ڤەکری و پێشکێشکرنا چەندین راسپاردەیان ل سەر کارێن ل پێشین یێن پاراستنا بۆماوەی ب دوماهی هات. دەرئەنجامێن کۆنفرانسی دێ پشکداریێ د ئامادەکرنا پەرێ هەلویست (Position Paper) یێ پرۆژێ TRANSITION دا کەن بۆ دارێژتنا ستراتیژیەتەکا هەڤپشک بۆ پاراستنا بۆماوەی.

پرۆژێ ناڤدەولەتی یێ Erasmus+ TRANSITION، کو ل ژێر ناڤێ "پاراستنا بۆماوەیێ کەلتۆری یێ بەرجەستە و نەبەرجەستە یێ جڤاکێن کێمینە ل هەرێما کوردستانا عیراقێ و ل یەمەنێ" دهێتە ئەنجامدان، هەشت دامەزراوەیان کۆمدکەتەڤە: زانکۆیا دهۆك (رێکخەرا

پرۆژەی)، زانکۆیا ئێڤۆرا ل پورتوگال، زانکۆیا ساپینزا ل رۆما، ئێکەتیا زانکۆیێن دەریایا ناڤەراست (UNIMED)، زانکۆیا عەدەن، زانکۆیا سلێمانیێ، زانکۆیا زاخۆ، و زانکۆیا سۆران. ب رێیا ڤێ هەڤپشکیێ، پرۆژە هەوڵا بهێزکرنا شیانێن سازیاتی، ئاڵوگۆڕیا زانینێ، و پشتەڤانیکرنا بۆماوێ کێمینەیان ددەت.

پشتی کۆنفرانسێ زاخۆ، هەڤپشکێن پرۆژەی بەرنامێ خۆ ب ئەنجامدانا دوویەمین کۆنفرانس ل

زانکۆیا سلێمانیێ ل رۆژێن ٤–٥ـی چریا دووێ ٢٠٢٦ـێ بەردەوام کرن ل ژێر ناڤێ:

"پاراستنا بۆماوەیێ کەلتۆری یێ بەرجەستە و نەبەرجەستە و مافێن کەلتۆری". ئەڤ هەردوو کۆنفرانسە پشکەکن ژ پاکێجا کارێ پێنجێ (WP5) یا پرۆژەی و دگەل دا کۆمبوونێن ئاڤاکرنا شیانان، راهێنانا راهێنەران (ToT)، و بەردەوامیپێدانا پرۆژەی دهێنە ئەنجامدان.

پرۆژێ TRANSITION ڕاستەوخۆ دگەل پلانا ستراتیژی یا زانکۆیا دهۆك (٢٠٢٣–٢٠٣٨) دگونجیت، نەخاسمە د ستوونێن "پشکداریا کارتێکەر د جڤاکی دا"، "دامەزراوەیا پێشەنگ د

خواندنا بلند دا"، و "بهێزکرنا شیانێن قوتابیان".

ڤێرە کلیک بکە بۆ دیتنا وێنەیان

نڤیسینگەها راگەهاندنا زانکۆیێ، ٧ـی چریا دووێ، ٢٠٢٦

راپۆرت: فاطمە مەحمود عەلی