ب ئامادەبوونا سەرۆکێ حکومەتا هەرێما کوردستانێ، زانکۆیا دهۆك ئاهەنگا دەرچوونا قوتابیێن گەرا ٣١ـێ گێرا
زانکۆیا دهۆک، ٥ـی چریا ئێکێ ٢٠٢٦ | نڤیسینگەها راگەهاندنا زانکۆیێ (UNPO) — ئەڤرۆ ئێڤاری، ل یاریگەها دهۆک یا وەرزشی و د کەشوهەوایەکێ پڕ ژ شانازی و خۆشیێ دا، زانکۆیا دهۆک ئاهەنگا دەرچوونا گەرا ٣١ـێ بۆ پتر ژ سێ هزار قوتابیێن خۆ سازکر. ئەڤ رێورەسمە ب چاڤدێری و ئامادەبوونا رێزدار مەسرور بارزانی، سەرۆکێ حکومەتا هەرێما کوردستانێ، و پ. د. داود سلێمان ئەتروشی، سەرۆکێ زانکۆیا دهۆک، دگەل ژمارەیەکا زۆر ژ بەرپرسێن حکومی، سياسی، ئەکادیمی، مامۆستا و بنەمالێن دەرچوویان بڕێڤەچوو.
د پەیڤا خۆ یا ڤەکرنێ دا، سەرۆکێ زانکۆیا دهۆک، پ. د. داود سلێمان ئەتروشی، پیرۆزباهییەکا گەرم ئاراستەی دەرچوویان و مالباتێن وان کر، و جەخت ل سەر رۆلێ گرنگێ زانکۆیێ کر وەک پێشەنگەکا ئەکادیمی بۆ ئاڤاکرنا پاشەڕۆژەکا روون بۆ کوردستانێ. هەروەسا تیشک ئێخستە سەر پێنگاڤێن پرۆسەیا چاکسازیێ، بەرفرەهکرنا بەکارهێنانا ژیرییا دەستکرد (AI)، و خزمەتکرنا جڤاکی ل زانکۆیا دهۆک.
سەرۆکێ حکومەتا هەرێما کوردسنانێ، رێزدار مەسرور بارزانی پیرۆزباهیێن گەرم ئاراستەی قوتابیێن دەرچووی کرن. پاشان سوپاسی و دەستخۆشی ل سەرۆکێ زانکۆیا دهۆك، مامۆستا و فەرمانبەرێن زانكۆیێ كرن بۆ ماندیبوونا وان د سەرئێخستنا ڤێ پرۆسا فێركرنێ دا و ئامادەكرنا نڤشەكێ نوی یێ پسپۆر وشارەزایان كو خزمەتا كوردستانێ بكەن.
د درێژاهیا پەیڤا خۆ دا، رێزدار سەرۆكێ حكومەتێ بۆ دەرچوویان دا دیاركرن كو ئاڤەدانكرنا وەلاتی ل سەر ملێ وانە و پیدڤیە ئەو زانست و زانینا وان ل زانكۆیێ وەرگرتی بكاربینن بۆ خزمەتكرنا خۆ و كەسوكارێن خۆ و وەلات و جڤاكی خۆ.
زانکۆیا دهۆک کو ژ ١٩ کۆلیژ و پەیمانگەهەکێ پێک دهێت، د ڤێ گەرێ دا دەرچوویێن ٩٥ پشکێن زانستی یێن جودا پێشکێشی کۆمەلگەهێ کرن، وەک بەشەک ژ ئارمانجا خۆ یا ستراتیژی بۆ ئاڤاکرنا نفشەکێ زانا و شیاندار کو بشێت سەرکردایەتیا پاشەڕۆژا وەلاتێ مە بکەت.
پێزانین دێ هێنە نوییکرن…
ڤێرە كلیك بكە بۆ دیتنا وێنەیان
نڤیسینگەها راگەهاندنا زانكۆیێ، ٥ـی چریا ئێکێ، ٢٠٢٦
فاطمە محمود عەلی
وێنە: عەلی حەبیب حەبیب، هەرمان جانگیر ئەحمەد